រាជធានីភ្នំពេញ ៖ នារីវ័យក្មេងម្នាក់ ត្រូវបានក្រុមសន្តិសុខចាប់ប្រទាញប្រទង់យ៉ាងវក់វីលើស្ពានបេឡេត៍ ធ្វើឲ្យចរាចរណ៍ឆ្លងកាត់ ត្រូវកកស្ទះអស់មួយរយៈ ។ ការភ្ញាក់ផ្អើលនោះ ក៏លាយឡំទៅដោយសំឡេងស្រែកយំរបស់នារីរូបនោះផងដែរ ។ ហេតុការណ៍ត្រូវបានគេដឹងភ្លាមៗថា គឺជាការរារាំងនារីរូបនេះ ដែលប៉ុនប៉ងលោតទឹកសម្លាប់ខ្លួន ហើយត្រូវបានសន្តិសុខ និងអ្នកដំណើរឯទៀត បាននាំគ្នាចាប់ឃាត់យ៉ាងប្រទាញប្រទង់យកឈ្នះ កុំឱ្យគិតខ្លីបែបនេះ ។
នារីវ័យក្មេងម្នាក់នេះ បានធ្វើដំណើរមកលោតទឹកសម្លាប់ខ្លួន ដែលហេតុការណ៍ប៉ុនប៉ងធ្វើអត្តឃាតនេះបង្កឲ្យមានការភ្ញាក់ផ្អើលកាលពីវេលាម៉ោង១២ និង៤០នាទីរសៀលថ្ងៃទី៧ វិច្ឆិកា នៅលើស្ពានបេឡេត៍ស្ថិតនៅក្នុងភូមិមិត្តភាព សង្កាត់ឫស្សីកែវ ខណ្ឌឫស្សីកែវ ។ នារីដែលមានវិបត្តិរូបនោះ ត្រូវបាននគរបាលឲ្យដឹងថា ឈ្មោះ ស្រី ណុច អាយុ១៨ឆ្នាំ ជាបុគ្គលិកលក់សំបុត្ររថយន្តក្រុងរបស់សាលារាជធានីភ្នំពេញ មានផ្ទះស្នាក់នៅម្តុំវត្តនិរោធន៍ សង្កាត់និរោធន៍ ខណ្ឌច្បារអំពៅ ។ តាមព័ត៌មានឲ្យដឹងថា នៅមុនពេលកើតហេតុគេឃើញនាងធ្វើដំណើរដោយថ្មើរជើងឡើងលើស្ពានពីលិចទៅកើត ។
នៅពេលមកដល់កណ្តាលស្ពានក៏បានឈប់ ហើយតោងបង្កាន់ដៃស្ពានប្រុងលោតចុះទៅក្នុងទន្លេ តែត្រូវបានសន្តិសុខដែលប្រចាំការលើស្ពានបានឃាត់នាំនាងមកគល់ស្ពាន ហើយទាក់ទងនគរបាលឲ្យមកនាំនាងទៅសាកសួរ ។ តាមព័ត៌មានឲ្យដឹងទៀតថា ខណៈនោះគេឃើញ នាងយំក្រាញននៀល មិនចង់ទៅណាក្រៅពីចង់លោតទឹកឡើយ នៅចំណុចស្ថានីយប្រេងសូគីម៉ិច ជាគល់ស្ពាន ដោយត្រូវបានកម្លាំងនគរបាលនាំគ្នាចាប់សែងយកទៅប៉ុស្តិ៍ ព្រោះនាងធាក់ក្រាញពេក ដើម្បីរង់ចាំបងប្អូនមកទទួល ។
បន្ទាប់ពីនាំទៅដល់ប៉ុស្តិ៍ ដោយសារតែនាងខំរើបំរះយំខ្លាំងនិងស្រែកផងនោះ បណ្តាលឲ្យសន្លប់មួយសន្ទុះ ។ បន្តិចក្រោយមក នារីរូបនោះបានឲ្យដឹងថា មូលហេតុដែលធ្វើឲ្យនាងគិតខ្លី ចង់ស្លាប់ដោយសារតែតូចចិត្តខ្លួនឯង ដែលឪពុកម្តាយដាក់គំនាប និងខឹងសង្សាររបស់នាងយល់ចិត្តមិត្តភក្តិជាងខ្លួននាងជាសង្សារ ។ នារីរូបនោះបានរៀបរាប់ទាំងទឹកភ្នែកឲ្យដឹងទៀតថា នាងបានលេបថ្នាំប៉ងសម្លាប់ខ្លួនម្តងមកហើយ កាលពីថ្ងៃទី៦ វិច្ឆិកា តែមិនស្លាប់ ។
នាងថា ក្រោយពេលលេបថ្នាំ សង្សាររបស់នាងបានឌុបនាងទៅចាក់ថ្នាំបន្សាបនៅផ្ទះពេទ្យបងប្អូននៅជ្រោយចង្វារ ។ នៅពេលដែលត្រឡប់មកវិញ ដល់គល់ស្ពានជ្រោយចង្វារខាងលិច ស្ទះចរាចរណ៍ផងនោះ នាងក៏បានលោតចុះពីលើម៉ូតូគេចខ្លួន ហើយធ្វើដំណើរដោយថ្មើរជើងមកលើស្ពានដើម្បីលោតទឹកសម្លាប់ខ្លួនពីលើស្ពានបេឡេត៍ តែមិនទាន់បានលោតផង ត្រូវសន្តិសុខស្ពានឃាត់ទាន់ ។ តាមព័ត៌មានចុងក្រោយឲ្យដឹងថា នៅរសៀលនោះនគរបាលបានទាក់ទងទៅក្រុមគ្រួសារនៅឯខេត្តព្រះសីហនុ ឲ្យមកយកនាងត្រឡប់ទៅផ្ទះវិញ ៕
https://www.youtube.com/watch?v=tEEzzsMytwY
ចែករំលែកព័តមាននេះ