ខេត្តស្វាយរៀង ៖ បុរសម្នាក់បានស្លាប់ភ្លាមៗនៅនឹងកន្លែងគួរឲ្យញាក់សាច់បណ្តាលមកពីគ្រោះថ្នាក់ ចរាចរមួយបានកើតឡើងរវាងរថយន្តបែនដឹកដី និងម៉ូតូបានបុកគ្នាយ៉ាងពេញទំហឹងលាន់ដូចរន្ទះ ហើយកិនម៉ូតូ និងមនុស្សអូសជាង៣០ម៉ែត្រ ខ្ទេចសាច់ចេញពោះវៀនមកក្រៅគួឲ្យសង្វេគ។ ករណីគ្រោះថ្នាក់ចរាចរណ៍នេះកើតឡើងនៅលើកំណាត់ផ្លូវជាតិលេខ១ ត្រង់ចំណុចភូមិសាមគ្គី សង្កាត់ស្វាយតឿ ក្រុងស្វាយរៀង នៅរសៀលថ្ងៃទី៧ ខែវិច្ឆិកា ឆ្នាំ២០១៨នេះ ធ្វើឲ្យជនរងគ្រោះស្លាប់ភ្លាមៗមួយរំពេច រីឯរថយន្តបង្កបុក ហើយអូសជាង៣០ម៉ែត្រ ទើបជាន់ហ្វ្រាំងជាប់។
បើតាមប្រភពពីប្រជាពលរដ្ឋដែល បានឃើញហេតុការណ៍ខាងលើបានឲ្យដឹងថា នៅមុនពេលកើតហេតុគេឃើញមានរថយន្ត ដឹកដីមួយ គ្រឿងបើកយ៉ាងលឿនមកពីទិសខាងលិច ឆ្ពោះទៅទិសខាងកើតស្របទិសដៅគ្នាលុះដល់ត្រង់ ចំណុចកើតហេតុស្រាប់តែមានម៉ូតូពីរគ្រឿង បើកវ៉ាជែងគ្នាបណ្ដាលឲ្យរេចង្កូតចូលចំផ្លូវរថយន្ត ដែលកំពុងតែបើកបរស្របទិសដៅគ្នា ត្រង់ចំណុចភូមិកើតហេតុខាងលើបានបុកយ៉ាងពេញទំហឹងរួចកិនពីលើម៉ូតូ និងមនុស្សអូសចម្ងាយជាង៣០ម៉ែត្រ បណ្តាលឲ្យជនរងគ្រោះដាច់សាច់ដាច់ជើង ធ្លាយពោះស្លាប់ភ្លាមៗនៅនឹងកន្លែងតែម្តង។
សមត្ថកិច្ចបានឲ្យដឹងថា ជនរងគ្រោះឈ្មោះ ហេង ភេទប្រុស អាយុ៤១ឆ្នាំ រស់នៅភូមិ បន្ទាយឃុំកណ្ដៀងរាយ ស្រុកស្វាយទាប មុខរបជាអ្នកលក់សាច់គោ រីឯរថយន្តបង្កពាក់ស្លាកលេខ កំពង់ចាម 3A-5751បើកបរដោយបុរសឈ្មោះ ពត ដឹម អាយុ៣៤ឆ្នាំ មុខរបរបើករថយន្ត បច្ចុប្បន្នរស់នៅ ភូមិព្រៃគគីរ ឃុំព្រៃគគីរ ស្រុកចន្ទ្រា។ ក្រោយពេលកើតហេតុសមត្ថកិច្ចបានឃាត់ខ្លួន អ្នកបើកបររថយន្តយកទៅអធិការរដ្ឋាន នគបាលស្រុកស្វាយទាប រង់ចាំដោះស្រាយតាមនីតិវិធីច្បាប់។ រីឯសពជនរងគ្រោះសមត្ថកិច្ច បានប្រគល់ឱ្យទៅសាច់ញាតិយកទៅធ្វើបុណ្យតាមប្រពៃណីរីឯវត្ថុតាង ទាំងអស់សមត្ថកិច្ចកំពុងកសាង សំណុំរឿងបញ្ជូនទៅអធិការស្រុកស្វាយទាបរង់ចាំការដោះស្រាយតាមនីតិវិធីច្បាប់។
សូមបញ្ជាក់ថា នៅត្រង់ចំណុចកើតហេតុគ្រោះថ្នាក់ខាងលើនេះខាងលិចស្ពានប្រសូត្រចម្ងាយប្រហែល ជាង១គីឡូម៉ែត្រ គឺជួបប្រទះគ្រោះថ្នាក់ចរាចរណ៍ញឹកញាប់ណាស់ ហើយសុទ្ធសឹងតែស្លាប់ធ្វើឱ្យ ប្រជាពលរដ្ឋមួយចំនួន ហៅថាកន្លែងជើងកបហើយពួកគាត់ចង់ឲ្យអាជ្ញាធរនិមន្តព្រះសង្ឃ និងអាចារ្យធ្វើ ពិធីសូត្រមន្តដើម្បីកុំឱ្យកើតមាននូវគ្រោះថ្នាក់ដ៏សាហាវៗដូច្នេះទៀត៕
ចែករំលែកព័តមាននេះ