ខេត្តប៉ៃលិន ៖ មានករណីអំពើហិង្សាដោយចេតនាមួយបានកើតឡើង ដែលបង្កឡើងដោយ ក្មេងទំនើងពីរក្រុម បានទំនាស់ពាក្យដីដាក់គ្នាទៅវិញទៅមកកាលពីជាង២ខែមុន ត្រង់ចំណុចផ្លូវកែងចំណតរថយន្តថ្មី លុះទាំងពីរក្រុមបានឃើញគ្នាភ្លាមក៏ស្ទុះទៅកាប់ចាក់គ្នាបណ្តាលឱ្យរងរបួសទាំងសងខាងតែម្តង ។
ហេតុការណ៍នេះបានកើតឡើងកាលពីវេលាម៉ោង៥និង៣០នាទីល្ងាចថ្ងៃទី៥ ខែវិច្ឆិកា ឆ្នាំ២០១៨ ស្ថិតក្នុងភូមិបរឌិននៀវ សង្កាត់ប៉ៃលិន ក្រុងប៉ៃលិន ខេត្ដប៉ៃលិន ។
ប្រភពព័ត៌មានពីសមត្ថកិច្ចនគរបាលជំនាញនៃស្នងការខេត្តប៉ៃលិនបានឱ្យដឹងថា ជនរងគ្រោះ ឈ្មោះ ម៉ុក ចាន់ថេន ភេទប្រុស អាយុ២០ឆ្នាំ រងរបួសដៃខាងឆ្វេង រស់នៅភូមិអូរតាពុកលើ សង្កាត់ប៉ៃលិន ក្រុងប៉ៃលិន ខេត្ដប៉ៃលិន ។
ចំណែកជនសង្ស័យមួយក្រុមដែលមានគ្នា៣នាក់ ១-ឈ្មោះ កូប ហ្វីន ភេទប្រុស អាយុ២០ឆ្នាំ រស់នៅភូមិឃុំកើតហេតុខាងលើ រងរបួសចំក្បាល ជាជនដៃដល់ ២-ឈ្មោះ ផា នាង ភេទប្រុស អាយុ២៣ឆ្នាំ រស់នៅភូមិកូនខ្លុង សង្កាត់អូរតាវៅ ក្រុងប៉ៃលិន និងជនសង្ស័យម្នាក់ទៀតបានរត់គេចខ្លួន បន្ទាប់ពីវាយកាប់ចាក់គ្នារួច ។
ក្រោយពេលកើតហេតុ ក្រុមគ្រួសារជនរងគ្រោះបានទៅដាក់ពាក្យបណ្តឹងនៅការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តប៉ៃលិន ខណ:អ្នករងរបួសទាំង២នាក់ កំពុងសម្រាកព្យាបាលនៅក្នុងមន្ទីរពេទ្យបង្អែកខេត្តប៉ៃលិន ។
ពាក់ព័ន្ធនឹងបញ្ហានេះ បច្ចុប្បន្នកម្លាំងជំនាញកំពុងកសាងសំណុំរឿង ដើម្បីតាមស្រាវជ្រាវរកជនសង្ស័យមួយចំនួនទៀត ដើម្បីនាំមកចាត់ការតាមនីតិវិធីច្បាប់ ៕
ចែករំលែកព័តមាននេះ