រាជធានីភ្នំពេញ ៖ បុរសជាជនសង្ស័យម្នាក់បានផ្ទុះហិង្សាវាយតប់លើស្ត្រីជាប្រពន្ធរហូតស្ត្រីជាប្រពន្ធព្យាយាមរត់គេចចូលផ្ទះអ្នកជិតខាងបំណងគេចខ្លួនពីប្តី តែបែរជាបុរសជាប្តីតាមទៅរករឿងដល់ផ្ទះប្រជាពលរដ្ឋដែលប្រពន្ធរត់ទៅសម្ងំនោះរហូតកើតជាហិង្សាទាស់ពាក្យសម្តី និងឈានដល់ការវាយតប់គ្នាបណ្តាលអោយជនរងគ្រោះជាម្ចាស់ផ្ទះត្រូវស្លាប់ បង្កការភ្ញាក់ផ្អើលកាលពីវេលាម៉ោង០៨និង៣០នាទីយប់ ថ្ងៃទី០៤ ខែវិច្ឆិកា ឆ្នាំ២០១៨ នៅចំណុចផ្ទះជួលមួយកន្លែង ស្ថិតតាមបណ្តោយផ្លូវប៉េតុង ក្នុងភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ ។
ជនរងគ្រោះមានឈ្មោះ សុខ សឺង ភេទប្រុស អាយុ១៨ឆ្នាំ ជាជនជាតិវៀតណាម មានមុខរបរជាកម្មករសំណង់ ស្នាក់នៅចំណុចកើតហេតុ ។ ចំណែកជនសង្ស័យមានគ្នា២នាក់ជាបងប្អូនបង្កើតមានឈ្មោះ កែវ សុភក្ត្រ ហៅអាញ៉ាញ់ អាយុ២៧ឆ្នាំ មុខរបរមិនពិតប្រាកដ (ជាបុរសដែលប្រើហិង្សាលើប្រពន្ធ) និងឈ្មោះ កែវ សុផាន ហៅតឿ ភេទប្រុស អាយុ២១ឆ្នាំ (ត្រូវជាប្អូនបង្កើតឈ្មោះ កែវ សុភក្ត្រ) មុខរបរមិនពិតប្រាកដ ទាំង២នាក់ស្នាក់នៅផ្ទះជួលក្បែរកន្លែងកើតហេតុ ។
តាមប្រភពព័ត៌មានអោយដឹងថា នៅវេលាយប់ថ្ងៃកើតហេតុ ឈ្មោះ កែវ សុភក្ត្រ បានឈ្លោះប្រកែកគ្នាជាមួយស្ត្រីជាប្រពន្ធរបស់ខ្លួនរហូតកើតជាហិង្សាវាយដំលើរាង្គកាយស្ត្រីជាប្រពន្ធយ៉ាងខ្លាំងខ្លា ធ្វើអោយរូបនាងទ្រាំពុំបានក៏ព្យាយាមរត់ចេញមកខាងក្រៅដើម្បីស្រែករកគេឯងអោយជួយ ។
ស្របពេលជាមួយគ្នានោះដែរ ក្រុមគ្រួសារជនរងគ្រោះមានមនុស្សប្រុសស្រីប្រមាណ៤ទៅ៥នាក់កំពុងហូបចុកនៅលើផ្ទះរបស់ខ្លួននៅក្បែរនោះដែរជាហេតុធ្វើអោយស្ត្រីជាប្រពន្ធជនសង្ស័យបានរត់ចូលទៅក្នុងផ្ទះរបស់ជនរងគ្រោះតែម្តងដើម្បីគេចពីការតាមវាយធ្វើបាបពីសំណាក់បុរសជាប្តី ។
ភ្លាមៗនោះជនសង្ស័យជាប្តីក៏បានរត់ដេញតាមប្រពន្ធរហូតដល់ចំណុចមុខផ្ទះជនរងគ្រោះដែលកំពុងមានកម្មវិធីហូបចុកផងនោះជនសង្ស័យក៏បានធាក់ម៉ូតូជនរងគ្រោះដែលចតនៅមុខផ្ទះបណ្តាលអោយដួល ហើយភ្លាមនោះបងប្អូនជនរងគ្រោះក៏ចុះមកសួរនាំជនសង្ស័យ ប៉ុន្តែត្រូវជនសង្ស័យដកកាំបិតប៉័ងតោចេញពីចង្កេះប្រុងកាប់ប្រហារទៅលើពួកគេ ជាហេតុធ្វើអោយពួកគេភ័យស្លន់ស្លោររត់ចេញពីចំណុចកើតហេតុបាត់ស្រមោល ។
អំឡុងពេលជាមួយគ្នានោះស្ត្រីចំណាស់ជាម្តាយក្មេងជនរងគ្រោះក៏ចុះទៅសួរនាំជនសង្ស័យវិញម្តង តែត្រូវជនសង្ស័យវាយ៣ទៅ៤ដៃ ជាហេតុធ្វើអោយបុរសជាជនរងគ្រោះ និងបងប្រុសរបស់ខ្លួនម្នាក់ទៀត រត់ចុះទៅជួយម្តាយដោយបានប្រតាយប្រតប់គ្នាទៅវិញទៅមកជាមួយជនសង្ស័យ ។
ស្របពេលជាមួយគ្នានោះស្រាប់តែលិចមុខជនសង្ស័យម្នាក់ទៀតឈ្មោះ កែវ សុផាន ត្រូវជាប្អូនបង្កើតជនសង្ស័យបានរត់ចូលមកជួយវាយតប់គ្នាជាមួយបុរសជាបង ហើយឆ្លៀតឱកាសនោះឈ្មោះ កែវ សុភក្ត្រ ដែលជាបងបានយកដំបងឈើធំមួយទៅវាយទៅលើជនរងគ្រោះចំក្បាលពីក្រោយពេញទំហឹងបណ្តាលអោយជនរងគ្រោះសន្លប់ស្តូកស្តឹងនៅហ្នឹងកន្លែងតែម្តង ហើយក្រុមជនសង្ស័យបានរត់គេចបាត់ស្រមោលអស់ ។
បន្ទាប់ពីកើតហេតុ សាច់ញាតិជនរងគ្រោះបានដឹកជនរងគ្រោះយកទៅព្យាបាលតែគ្រូពេទ្យមិនទទួលដោយសារអាការជនរងគ្រោះធ្ងន់ធ្ងរពេក ។ រហូតមកទល់នឹងយប់ថ្ងៃទី៥ ខែវិច្ឆិកា ឆ្នាំ២០១៨ វេលាម៉ោង១០និង១៥នាទីយប់ ជនរងគ្រោះក៏ដាច់ខ្យល់ស្លាប់តែម្តង ។
សូមបញ្ជាក់ថា នៅយប់ថ្ងៃកើតហេតុ សាច់ញាតិជនរងគ្រោះក៏បានទៅដាក់ពាក្យបណ្តឹងនៅប៉ុស្តិ៍រដ្ឋបាលនគរបាលមូលដ្ឋានផងដែរ ហើយកម្លាំងនគរបាលក៏បានចុះទៅដល់កន្លែងកើតហេតុដែរ តែក្រុមជនសង្ស័យបានរត់គេចខ្លួនអស់ទៅហើយ ។
លុះមកទល់នឹងម៉ោង១០ព្រឹកថ្ងៃទី៦ ខែឆ្នាំដដែល កម្លាំងសមត្ថកិច្ចបានឃាត់ខ្លួនបានម្នាក់ឈ្មោះ កែវ សុផាន ដែលត្រូវជាប្អូនប្រុសជនដៃដល់ ខណៈដែលរូបគេត្រឡប់ចូលទៅផ្ទះវិញ ។
សូមបញ្ជាក់បន្ថែមថា តាមសមត្ថកិច្ចជំនាញកោសល្យវិច្ច័យបញ្ជាក់ថា ជនរងគ្រោះពិតជាត្រូវបានស្លាប់ដោយសារការវាយនឹងដំបងឈើប្រាកដមែន ដោយជនសង្ស័យបានវាយមួយទំហឹងបណ្តាលអោយផ្នែកក្បែរខាងក្នុងត្រូវគ្រាំខ្លាំងរហូតដល់ស្លាប់តែម្តង ។
យ៉ាងណាមិញបច្ចុប្បន្នសពត្រូវប្រគល់ជូនក្រុមគ្រួសារធ្វើបុណ្យតាមប្រពៃណី ។ ចំណែកជនសង្ស័យត្រូវឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌច្បារអំពៅរងចាំកសាងសំណុំរឿងបញ្ចូនទៅតុលាការចាត់ការតាមនីតិវិធីច្បាប់ផងដែរ ។ ដោយឡែកចំពោះជនសង្ស័យម្នាក់ទៀតសមត្ថកិច្ចកំពុងស្រាវជ្រាវក្នុងការតាមចាប់ខ្លួនយកមផ្តន្ទាទោសផងដែរ ៕
ចែករំលែកព័តមាននេះ