នរណាៗក៏នាំគ្នានិយាយអំពីការសម្រុកចូលរបស់ចិនទៅកាន់ខេត្តព្រះសីហនុ ។ ប៉ុន្តែរឿងដ៏គួរ អោយបារម្ភបានកើតឡើង នោះ គឺការដកថយរបស់ប្រជាជនកម្ពុជានៅក្នុងការទៅកម្សាន្តនៅខេត្តសមុទ្រដ៏ស្រស់ស្អាតមួយនេះ ដោយលើកហេតុផលថា ចិនច្រើនពេក ហើយអ្វីៗឡើងថ្លៃហួសហេតុ ។
ប៉ុន្តែតើប្រជាជនខ្មែរគួរតែនាំគ្នាដកថយឈប់ទៅលេងខេត្តព្រះសីហុន ឬយ៉ាងណា ? ឆ្នាំ២០១៨នេះ មានការនិយាយច្រើនអំពីបញ្ហាកំណើនជនជាតិចិនទៅកាន់ខេត្តព្រះសីហនុទាំងចំនួនអ្នកទេសចរណ៍ និងអ្នករស់នៅ ។ កំណើនជនជាតិចិន និងសកម្មភាពវិនិយោគ និងរកស៊ីរបស់ជនជាតិចិននៅខេត្តព្រះសីហនុបានធ្វើអោយអ្នករស់នៅខេត្តព្រះសីហនុដែលមានផ្ទះនិងដីញញឹមបិទមាត់មិនជិត ដោយសារតែពួកគេជួល និងលក់ដី ឬផ្ទះបានថ្លៃ ។ រហូតដល់មានអ្នកខ្លះបានក្លាយទៅជាអ្នកមាន ដោយសារតែកំណើនជនជាតិចិននៅខេត្តព្រះសីហនុ ។
នៅពេលដែលអ្នកទទួលផលពីវត្តមានជនជាតិចិនសប្បាយរីករាយនោះប្រជាជនកម្ពុជានៅ កន្លែងផ្សេងៗទៀតទាំងនៅភ្នំពេញ និងនៅតាមបណ្តាខេត្តនានាមានអារម្មណ៍ផ្សេង ។ ពួកគេបាននាំគ្នាញញើតនៅក្នុងការធ្វើដំណើរទៅកម្សាន្តខេត្តព្រះសីហនុ ដោយសារហេតុផលតម្លៃផ្ទះសំណាក់ និងសណ្ឋាគារព្រមទាំងម្ហូបអាហារមានតម្លៃកើនឡើងខ្លាំង ។ ដោយពិចារណាទៅលើតម្លៃដែលត្រូវចំណាយវាសមហេតុផលនឹងធ្វើអោយប្រជាជនកម្ពុជាជាច្រើនបាត់បង់ការចាប់អារម្មណ៍ចំពោះខេត្តព្រះសីហនុ ។ ប៉ុន្តែទោះបីជាយ៉ាងណាក្តីការដកថយបែបនេះវានឹងធ្វើអោយបាត់បង់នូវអារម្មណ៍មួយដែលថាខេត្តព្រះសីហនុ គឺជារបស់កម្ពុជា ហើយទាំងប្រជាជនកម្ពុជា និងប្រទេសកម្ពុជាទាំងមួល ត្រូវតែទទួលផលជាអតិបរមាពីខេត្ដដ៏មានសក្តានុពលសេដ្ឋកិច្ច និងទេសចរណ៍មួយនេះ ។
ខេត្តព្រះសីហុនត្រូវតែបន្តធ្វើខ្លួនជាខេត្តទេសចរណ៍មួយដែលប្រជាជនកម្ពុជានាំគ្នាទៅកម្សាន្តលំហែកាយទទួលយកខ្យល់បរិសុទ្ធ និងសម្រាកលំហែកាយ ។ ចំណែកប្រជាជនកម្ពុជានៅក្នុងខេត្តនេះក៏ត្រូវតែទទួលបានការការពារចំពោះមុខរបរ និងការស់នៅប្រកបដោយសេចក្តីសុខ ។ ប្រជាជនកម្ពុជាគួរតែបន្តនាំគ្នាទៅលេង និងលំហែកាយនៅខេត្តព្រះសីហនុទៅតាមលទ្ធភាពរបស់ខ្លួន ដើម្បីរក្សាទំនាក់ទំនងជាមួយខេត្តជាប់សមុទ្រមួយនេះជាកម្មសិទ្ឋិរបស់ខ្លួន ។ ម្យ៉ាងទៀតនោះវាក៏អាចធ្វើអោយពួកគេយល់ច្បាស់ផងដែរ អំពីស្ថានភាពរបស់ខេត្តនេះថា តើអ្វីៗពិតជាឡើងថ្លៃហួសហេតុរហូតដល់គ្មានជម្រើសសម្រាប់ពួកគេធ្វើដំណើរទៅកម្សាន្ត ឬយ៉ាងណា ? ការឈប់បន្តទៅលេងនៅខេត្តនេះក៏អាចនឹងដាក់សម្ពាធថែមទៀតដល់ប្រជាជនដែលប្រកបរបរចិញ្ចឹមជីវិតនៅក្នុងខេត្តព្រះសីហនុ ។
កាលបើលែងមានប្រជាជនកម្ពុជាទៅកម្សាន្ត វានឹងធ្វើអោយអ្នកប្រកបរបរនៅទីនោះមិនអាច រកស៊ីបាន ហើយត្រូវបិទទ្វារដែលនឹងជាចរន្តមួយទៀតនឹងនាំអោយពួកគេចាកចេញពីខេត្តព្រះសីហនុទៅប្រកបរបរចិញ្ចឹមជីវិតនៅតាមខេត្តផ្សេង ។ នេះក៏ព្រោះថា ជនជាតិចិនបាននាំគ្នាប្រកបមុខរបរស្ទើរគ្រប់ប្រភេទនៅខេត្តព្រីសហនុ ហើយអ្នកទេចរណ៍ចិនក៏ចូលចិនទិញ និងប្រើសេវាជនជាតិចិនដូចគ្នា ។ ជាផលវិបាកនោះនៅក្នុងរយៈពេលវែងខេត្តព្រះសីហនុមិនត្រឹមតែនឹងលែងមានប្រជាជនកម្ពុជាទៅលេងកម្សាន្តទេ ។
សូម្បីតែប្រជាជនកម្ពុជាដែលរស់នៅ និងប្រកបរបរនៅខេត្តព្រះសីហនុក៏ត្រូវចាកចេញទៅរស់ នៅ និងរកស៊ីកន្លែងផ្សេងដែរ ។ និន្នាការបែបនេះវានឹងធ្វើអោយប្រជាជនកម្ពុជាបាត់បង់កម្មសិទ្ធខេត្តព្រះសីហនុជាខេត្តរបស់ខ្លួន ។ វានឹងជាការដកថយដ៏គួរអោយសោកស្តាយបំផុត ។ ចំណែករដ្ឋាភិបាល និងអាជ្ញាធរខេត្តមានភារកិច្ចរៀបចំ និងអនុវត្តផែនការដែលធានាថាប្រទេសកម្ពុជា និងប្រជាជនកម្ពុជាទទួលបានផលប្រយោជន៍ជាអតិបរមាពីការអភិវឌ្ឍន៍ខេត្តព្រះសីហនុ ។ គេគួរមាននយោបាយ និងវិធានការដ៏ជាក់លាក់ ដើម្បីគាំទ្រដល់ការរស់នៅ និង រកស៊ីប្រកបរបររបស់ប្រជាជននៅខេត្តនោះក៏ដូចជា ផែនការ ដើម្បីទាក់ទាញប្រជាជនកម្ពុជាអោយបន្តទៅកម្សាន្តខេត្តព្រះសីហនុ ។ ការពង្រីកការអភិវឌ្ឍន៍ខេត្ត និងកិច្ចការពារតំបន់ឆ្នេរនឹងអាចបន្តរក្សាប្រជាជនកម្ពុជាអោយបន្តធ្វើដំណើរទៅកម្សាន្តខេត្តព្រះសីហនុ ។ នៅពេលដែលខេត្តមានការរីកចម្រើនកាន់តែខ្លាំងវានឹងធ្វើអោយមានឪកាសកាន់តែច្រើនសម្រាប់ការប្រកបរបនៅទីនោះ ហើយតម្លៃផ្ទះសំណាក់ និងសណ្ឋាគារអាចមានជម្រើសច្រើនទៅតាមលទ្ធភាពសេដ្ឋកិច្ចរបស់ប្រជាជនដើម្បីទៅកម្សាន្ត ។
ដូច្នេះទាំងរដ្ឋាភិបាល ប្រជាជនកម្ពុជាទូទាំងប្រទេស និងអ្នករស់នៅខេត្តព្រះសីហនុ ត្រូវរក្សា អោយបានភាពជាកម្មសិទ្ធិលើខេត្តព្រះសីហនុ ។ ការដកថយមិនមែនជាជម្រើសដ៏ល្អឡើយ ។ ការរួមគ្នាដោះស្រាយជាជម្រើសដ៏ល្អសម្រាប់ថែរក្សារខេត្តព្រះសីហនុជាខេត្តដ៏ទាក់ទាញបំផុតមួយសម្រាប់ដំណើរទេសចរណ៍របស់ប្រជាជនកម្ពុជា ៕
ចែករំលែកព័តមាននេះ