រាជធានីភ្នំពេញ ៖ រថយន្តកុងតឺន័ររបស់ក្រុមហ៊ុនផែស្ងួតមួយគ្រឿងបានបើកទៅកៀរ និងប្រអប់កុងទ័រភ្លើងដែលជាប់បង្គោលភ្លើង នៅតាមចិញ្ចើមផ្លូវ បណ្ដាលឲ្យដាច់ធ្លាក់អស់ចំនួនពីរប្រអប់ ។ ហេតុការណ៍នេះកើតឡើង កាលពីវេលាម៉ោង១និង២០នាទីរំលងអធ្រាត្រឈានចូលថ្ងៃទី០៧ ខែវិច្ឆិកា ឆ្នាំ២០១៨ ត្រង់ចំណុចខាងជើងស្ពានអាកាសផ្សារដីហុយប្រមាណ៥០ម៉ែត្រ តាមបណ្ដោយផ្លូវហាណូយ ស្ថិតក្នុងសង្កាត់ទឹកថ្លា ខណ្ឌសែនសុខ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសម្នាក់បើកបររថយន្តកុងតឺន័រមួយគ្រឿងម៉ាកហ៊ីយ៉ាន់ដាយ ពណ៌ប្រផេះ ពាក់ស្លាលេខ ភ្នំពេញ 3A-6010 ដែលទើបតែបើកចេញមកពីផែនៅម្តុំជម្ពូវ័ន ហើយបំណងដឹកយកអ៊ីវ៉ាន់ដែលក្នុងទូកុងតឺន័រទៅដាក់នៅឃ្លាំងម្តុំផ្សារដីហុយ ដោយធ្វើដំណើរតាមបណ្តោយផ្លូវហាណូយ ក្នុងទិសដៅពីត្បូងទៅជើង ។
លុះមកដល់ចំណុចកើតហេតុរថយន្តកុងតឺន័រខាងលើក៏បើកអែបទៅចិញ្ចើមផ្លូវ ដោយខ្វះការប្រុងប្រយ័ត្នក៏បណ្តាលឲ្យទូកុងតីន័ររបស់រថយន្តខាងលើទៅទាក់នឹងប្រអប់ដាក់កុងទ័រភ្លើងដែលនៅលើបង្គោល បង្កឲ្យដាច់របេះពីបង្គោលចំនួនពីរប្រអប់ ហើយភ្លាមៗនោះក៏ត្រូវបានសមត្ថកិច្ចចរាចរណ៍ដែលប្រចាំការនៅគោលដៅខាងក្រោមស្ពានអាកាសផ្សារដីហុយ ឃើញក៏ចេញមកធ្វើការស្ទាក់ឃាត់រថយន្តបង្កខាងលើភ្លាមៗតែម្ដង ។
ក្រោយពេលកើតហេតុរថយន្តបង្កខាងលើក៏ត្រូវបានសមត្ថកិច្ចជំនាញយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយជាបន្តទៀតនៅពេលក្រោយ ៕
ចែករំលែកព័តមាននេះ