រាជធានីភ្នំពេញ ៖ មន្ត្រីជាន់ខ្ពស់ក្រសួងមហាផ្ទៃបានអំពាវនាវដល់ប្រជាពលរដ្ឋឈប់ជឿ និងទិញឱសថតាមបណ្តាញអនឡាញ ដើម្បីជៀសវាងប៉ះចំឱសថក្លែងក្លាយ និងអន់គុណភាព ហើយគ្មានច្បាប់អនុញ្ញាត ។
ការអំពាវនាវនេះខណៈដែលសព្វថ្ងៃនេះមានអ្នកលេងសង្គមហ្វេសប៊ុក ប៊ីហ្គោឡាយជាច្រើន បានលក់ផលិតផលឱសថតាមអនឡាញដោយគ្មានឃើញសមត្ថកិច្ចហាមឃាត់ ដើម្បីសួរនាំនៅឡើយ ។
នាយឧត្តមសេនីយ៍ មៀច សុផាន់ណា រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយបានលើកឡើងក្នុងសន្និសីទសារព័ត៌មានស្ដីពីការប្រយុទ្ធប្រឆាំងឱសថក្លែងក្លាយអន់គុណភាព និងគ្មានច្បាប់អនុញ្ញាតកាលពីថ្ងៃទី០៦ ខែវិច្ឆិកា ឆ្នាំ២០១៨នៅសណ្ឋាគារសូហ្វីទែលបានអំពាវនាវទៅដល់ប្រជាពលរដ្ឋទាំងអស់កុំទិញឱសថតាមអនឡាញជៀសវាងឱសថក្លែងក្លាយអន់គុណភាព និងគ្មានច្បាប់អនុញ្ញាតត្រឹមត្រូវ ។ លោកបន្តថា ដើម្បីមានលទ្ធភាព និងមានសិទ្ធិលក់ចែកចាយនៅក្នុងទីផ្សារបានត្រូវតែមានការអនុញ្ញាតចុះបញ្ជីការត្រឹមត្រូវទៅតាមផ្លូវច្បាប់ពីក្រសួងសុខាភិបាលផងដែរ ។ ជាមួយគ្នានោះដែរលោកប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយក៏បានព្រមានយ៉ាងដូច្នេះថា « ដោយឡែករាល់អ្នកដែលកំពុងផ្សព្វផ្សាយលក់ឱសថនៅទីផ្សារអនឡាញ ពិសេសនៅក្នុងហ្វេសប៊ុកក្រសួងមហាផ្ទៃ និងអាជ្ញាធរពាក់ព័ន្ធទាំងអស់នឹងប្រើប្រាស់គ្រប់មធ្យោបាយទាំងអស់ ដើម្បីឈានទៅដល់ការបិទហ្វេសប៊ុកគណនីទាំងនោះនៅពេលអ្នកជំនាញមានព័ត៌មានជាក់លាក់នោះ» ។
លោកប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយក៏បានបង្ហាញចំណេះដឹងមួយចំនួនដល់រដ្ឋរួមមានទី១ – នៅលើការវេចខ្ចប់ឱសថមិនមានភាពត្រឹមត្រូវ ពោលការសរសេរអក្សរខុសជាដើម ទី២-ការវេចខ្ចប់ខុសទ្រង់ទ្រាយ ខុសសណ្ឋាន ទី៣- ក្លិន និងពណ៌ សម្បុរ (ដាច់រហែក ក្លិនដូចអាស៊ីតដូចថ្នាំពុល) ទី៤- លេខបញ្ជីការ ទី៥ – មានបកប្រែជាភាសាខ្មែរនៅក្នុងប្រអប់ដែលណែនាំអំពីរបៀបប្រើប្រាស់ ទី៦-មានបញ្ជាក់ពីប្រភពដើមប្រទេសផលិតច្បាស់លាស់ និងទី៧-កាលបរិច្ឆេទប្រើប្រាស់ត្រឹមត្រូវ ។
ឆ្លៀតឱកាសនោះដែរ ជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយក៏បានព្រមានទៅដល់ក្រុមឧក្រិដ្ឋជនទាំងអស់ដែលកំពុងផលិត ចរាចរណ៍ឱសថក្លែងក្លាយ និងអន់គុណភាពនោះថា រាជរដ្ឋាភិបាលនឹងមិនព្រងើយកន្ដើយ និងយកចិត្តទុកដាក់ផងដែរ ។ ប្រធានគណៈកម្មការបន្ថែម គ្រប់សកម្មភាពទាំងអស់ ដើម្បីបង្ក្រាបការផលិត ការចរាចរណ៍ ចែកចាយឱសថខុសច្បាប់នេះ ដោយមិនលើកលែងឲ្យជាដាច់ខាតដែលអ្នកទាំងនោះនឹងត្រូវផ្ដន្ទាទោសតាមផ្លូវច្បាប់ ។ មានប្រសាសន៍បិទសន្និសីទថ្នាក់តំបន់ស្តីពីការប្រយុទ្ធប្រឆាំងឱសថក្លែងក្លាយអន់គុណភាព និងគ្មានច្បាប់អនុញ្ញាត្តិសម្តេចក្រឡាហោមស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានថ្លែងថា បច្ចុប្បន្នតម្រូវការឱសថកំពុងមានកើនឡើងពីមួយថ្ងៃទៅមួយថ្ងៃទើបជនឆ្លៀតឱកាសនិយមមួយចំនួនបានលបលួចផលិតឱសថក្លែងក្លាយ និងអន់គុណភាពមកចរាចរណ៍នៅលើទីផ្សារកម្ពុជា ។
សម្ដេច ស ខេងបន្តថា សន្និសីទជាអន្តរជាតិនាពេលនេះធ្វើឡើងស្របតាមកាលៈទេសៈ របស់កម្ពុជាទៅនឹងការប្រយុទ្ធប្រឆាំងឱសថក្លែងក្លាយ និងអន់គុណភាពដែលកំពុងយកចិត្តទុកដាក់ជាខ្លាំង ។ សម្តេចបន្តថា ដោយសារសុខសន្តិភាព ស្ថិរភាពនយោបាយបានធ្វើឲ្យកម្ពុជាក៏ដូចជាប្រទេសនៅក្នុងតំបន់កាន់តែមានតម្រូវការលើការប្រើប្រាស់ទំនិញគ្រប់ប្រភេទ ។
សម្តេចគូសបញ្ជាក់ថា «ទន្ទឹងនឹងតម្រូវការប្រើប្រាស់ឱសថទើបជនល្មើសឆ្លៀតឱកាសខិតខំធ្វើការផលិតចរាចរណ៍ និងចែកចាយលើឱសថក្លែងក្លាយ និងអន់គុណភាព លើទីផ្សារដែលនាំឲ្យពលរដ្ឋរងគ្រោះ និងថែមទាំងខាតថវិកាយ៉ាងច្រើនសន្ធឹកសន្ធាប់ និងករណីខ្លះបណ្តាលឲ្យប៉ះពាល់ដល់អាយុជីវិតថែមទៀតផង» ។ ជាមួយគ្នានោះដែរសម្តេចឧបកនាយករដ្ឋមន្ត្រីក្រសួងមហាផ្ទៃអះអាងថា កម្ពុជាបានទទួលរងផងដែរនូវការចរាចរណ៍ឱសថក្លែងក្លាយ និងអន់គុណភាពក្នុងស្ថានភាពជាប្រទេសប្រើប្រា ស់ ៕
ចែករំលែកព័តមាននេះ