រាជធានីភ្នំពេញ ៖ កាលពីព្រឹកថ្ងៃទី៦ វិច្ឆិកា នៅសាលាខណ្ឌ៧មករា មានធ្វើពិធីប្រកាសតែងតាំង និងផ្ទេរភារកិច្ចប្រធានគណៈកម្មការផ្សារអូរឫស្សី ក្រោយអធិបតីភាពលោក លីម សុភា អភិបាល គណៈអភិបាលខណ្ឌ ។
ពិធីនោះធ្វើឡើងបន្ទាប់ពីលោក ឃួង ស្រេង អភិបាលរាជធានីភ្នំពេញ បានចេញសេចក្ដីសម្រេចតែងតាំងលោក ហ៊ត វ៉ាន់ធី អតីតអនុប្រធានផ្សារអូរឫស្សី ត្រូវបានតែងតាំងជាប្រធានគណៈកម្មការគ្រប់គ្រងផ្សារអូរឫស្សី ជំនួសលោក ឡេង គឹមស្រុង អតីតប្រធានគណៈកម្មការគ្រប់គ្រងផ្សារអូរឫស្សីថ្មី ត្រូវបានសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ប្រកាស និងតែងតាំងឲ្យទៅកាន់តំណែងជានាយករដ្ឋបាលសាលាក្រុងព្រះសីហនុ ខេត្តព្រះសីហនុ ។
គួរកត់សំគាល់ថា លោក ហ៊ត វ៉ាន់ធី អតីតជាអនុប្រធានផ្សារអូឬស្សីច្រើនឆ្នាំ ដែលជាមនុស្សចាស់ទុំក្នុងការដឹកនាំ ដោយបទពិសោធន៍ស្រាប់ ដូច្នេះបានសង្កេតឃើញថា រដ្ឋាភិបាលបានតែងតាំងលោក ហ៊ត វ៉ាន់ ជាប្រធានគណៈកម្មការគ្រប់គ្រងផ្សារអូរឫស្សីនេះ ពិតជាស័ក្តិសមតាមសមត្ថភាពរបស់លោកដែលប្រឹងប្រែងអនុវត្តនាពេលកន្លងនោះ ។
ចំណែកលោក ឡេង គឹមស្រុង អតីតៈជាមន្ត្រីបម្រើការងារនៅផ្សារអូរឫស្សីច្រើនឆ្នាំ រហូតបានឡើងជាប្រធានគណៈកម្មការគ្រប់គ្រងផ្សារជិត១០ឆ្នាំ ក៏មិនធម្មតាដែរ ពោលគឺលោកមានបទពិសោធន៍កិច្ចការងាររដ្ឋបាលជាក់លាក់ ដូច្នេះហើយទើបត្រូវបានរាជរដ្ឋាភិបាលមានទំនុកចិត្ត តែង តាំងទៅជានាយករដ្ឋបាលសាលាក្រុងព្រះសីហនុ ខេត្តព្រះសីហនុនោះ ៕
ចែករំលែកព័តមាននេះ