ខេត្តកំពង់ធំ ៖ មានប្រជាពលរដ្ឋច្រើននាក់ហើយ ដែលស្គាល់ពីឈ្មោះរង្វាន់ Power Bark តាមរយៈការទូរស័ព្ទចូលប្រាប់ថា «ត្រូវរង្វាន់របស់ក្រុមហ៊ុន» តែទីបំផុតរង្វាន់នោះមិនមានទេ គឺល្បិចបង្ខំឱ្យទិញទំនិញដែលគេចុះតម្លៃ៥០%…
ខេត្តកំពង់ធំ ៖ មានប្រជាពលរដ្ឋច្រើននាក់ហើយ ដែលស្គាល់ពីឈ្មោះរង្វាន់ Power Bark តាមរយៈការទូរស័ព្ទចូលប្រាប់ថា «ត្រូវរង្វាន់របស់ក្រុមហ៊ុន» តែទីបំផុតរង្វាន់នោះមិនមានទេ គឺល្បិចបង្ខំឱ្យទិញទំនិញដែលគេចុះតម្លៃ៥០% ។ តាមការពិតតម្លៃដែលចុះ៥០%នោះ គឺបោកសុទ្ធ ព្រោះតម្លៃទំនិញពិតនោះ មិនស្មើពាក់កណ្តាលនៃការចុះតម្លៃនោះផង ។
រឿងរ៉ាវថ្មីទៀត បានកើតឡើងនៅខេត្តកំពង់ធំ គួរឱ្យចង់ដឹងណាស់ ។ តាមសេចក្តីរាយការណ៍ឱ្យដឹងថា ក្រោយពីមានពលរដ្ឋ រួមទាំងមន្ត្រីរាជការមួយចំនួន ត្រូវបានក្រុមហ៊ុនទូរស័ព្ទមកប្រាប់ថា ត្រូវរង្វាន់ផូ
វើបេង (Power Benk) ដែលជាការបញ្ជោតឱ្យចូលទៅកន្លែងទីតាំងរបស់ខ្លួន ងាយស្រួលបង្ខំឲ្យទិញសម្ភារ ដែលមានតម្លៃចាប់ពី១ពាន់ដុល្លារ រហូតដល់ទៅ៣ពាន់ដុល្លារ តាមរយៈការចាប់ឆ្នោត ដែលត្រូវបានគេរៀបជាអន្ទាក់នោះ ត្រូវបានពលរដ្ឋ ដែលក្លាយជាជនរងគ្រោះបានប្តឹងសមត្ថកិច្ច ឱ្យធ្វើការសួរនាំក្រុមហ៊ុន ឌូវេរ៉ាឃិតឈិន ខេមបូឌា DUVERA KITCHEN Cambodia ដោយសង្ស័យគ្មានច្បាប់អនុញ្ញាតឲ្យប្រកបអាជីវកម្ម ។
លោក អុិត សុធា ព្រះរាជអាជ្ញាអមសាលាដំបូងខេត្តកំពង់ធំ និងលោក ញ៉ែម ឈុនលី អធិការក្រុងស្ទឹងសែន មានប្រសាសន៍បន្ទាប់ពីទទួលបានព័ត៌មានពីប្រជាពលរដ្ឋ ដែលជាជនរងគ្រោះ លោកបានដឹកនាំកម្លាំងចុះទៅពិនិត្យទីតាំងដែលក្រុមហ៊ុនឌូវេរ៉ាឃិតឈិន ខេមបូឌា ជួលធ្វើការនៅសណ្ឋាគារដំរីជាន់ខ្លាវល្លិមាស ជាន់ទី១ នៅរសៀលថ្ងៃទី៥ វិច្ឆិកា ស្ថិតក្នុងភូមិដំរីជាន់ខ្លា សង្កាត់ដំរីជាន់ខ្លា ក្រុងស្ទឹងសែន ។
តាមការពិនិត្យទីតាំង គឺការដាក់តាំងលក់សម្ភារក្នុងសណ្ឋាគារស្ងាត់ៗ ក្នុងបន្ទប់តូច និងមិនបានបើកចំហជាសាធារណៈ សម្រាប់អតិថិជនទេ គឺឃើញតែម៉ាស៊ីនម៉ាស្សាខ្នង បំពង់ចម្រោះទឹកស្អាត ឆ្នាំងដាំបាយ ជើងក្រាន រួមទាំងថ្នាំមួយចំនួន ដែលផលិតផលទាំងនេះ មានសរសេរលាយឡំគ្នា ខ្លះជាភាសាជប៉ុន ខ្លះភាសា អង់គ្លេស ខ្លះភាសាចិន ។ ប៉ុន្តែបុគ្គលិកប្រចាំការបានអួតប្រាប់ថា ជាផលិតផលរបស់អាមេរិកទាំងអស់ ។ ក្នុងការត្រួតពិនិត្យសមត្ថកិច្ច ក៏បាននាំនារីដែលជាបុគ្គលិកក្រុមហ៊ុនចំនួន៧នាក់មកសួរនាំនៅស្នងការដ្ឋាននគរបាលខេត្ត ។
តាមការរៀបរាប់របស់ជនរងគ្រោះបានឱ្យដឹងថា ក្រុមហ៊ុនឌូវេរ៉ាឃិតឈិន ខេមបូឌា បានទូរស័ព្ទចូលហើយប្រាប់ថា ត្រូវរង្វាន់ផូវើបេង ឲ្យគាត់មកទទួលយកនៅទីតាំងខាងលើ ។ លុះមកដល់គេបាននិយាយរៀបរាប់និងបង្ហាញពីផលិតផលផ្សេងៗជាហូរហែ បន្ទាប់មកក៏បានឲ្យជនរងគ្រោះដេកលើ ម៉ាស៊ីនម៉ាស្សាខ្លួន ដែលប្រើប្រាស់ ដោយចរន្តអគ្គិសនី ។ ក្រោយមកក៏បានយកសន្លឹកឆ្នោតជាច្រើនសន្លឹកឲ្យចាប់ឆ្នោតដើម្បីទទួលបានរង្វាន់ធំ ។
ក្រោយពីចាប់ហើយ ក៏ស្រាប់តែបុគ្គលិកក្រុមហ៊ុននាំគ្នាហ៊ោរកញ្ច្រៀវធ្វើជាត្រេកអរពីការត្រូវរង្វាន់ធំ ដែលមានតម្លៃជាង២ពាន់ដុល្លារ តែត្រូវបានបញ្ចុះតម្លៃត្រឹមជាងមួយពាន់ដុល្លារ ។ ខណៈពេលដែលគេថាត្រូវរង្វាន់ មានបុគ្គលិកដើរតួសម្តែងទូរស័ព្ទទៅរាយការណ៍ជូនមេធំរបស់គេនៅភ្នំពេញ ដើម្បីឲ្យមេបញ្ជាក់ថា ជនរងគ្រោះជាមនុស្សសំណាង ល្អណាស់ ដែលត្រូវរង្វាន់បញ្ចុះតម្លៃជាង១ពាន់ដុល្លារ ហើយបានបង្ខំឲ្យជនរងគ្រោះទិញសម្ភារទាំងនោះភា្លមៗដែលជារង្វាន់ ដោយមិនទុកឱកាសឲ្យពិភាក្សាពីក្រុមគ្រួសារឡើយ តែបើមិនទិញទេ បុគ្គលិកទាមទារប្រាក់កក់១០០ដុល្លារ ។
ជនរងគ្រោះបានបញ្ជាក់ថា ទំនិញនោះអន់បំផុតហើយទើបលក់ ក៏មានតម្លៃគឺថោកដែរ តាមគាត់ដឹង តែក្រុមបុគ្គលិកក្រុមហ៊ុនប្រើមធ្យោបាយបង្ខំឲ្យទិញ ដោយមិនឲ្យគាត់ចាកចេញទៅណា ឬក៏សួរនាំអ្នកណាឡើយ សូម្បីតែទូរស័ព្ទក៏មិនឲ្យជនរងគ្រោះទាក់ទងបានដែរ តែបើអត់លុយទិញទេ គឺក្រុមហ៊ុននឹងមានលុយឲ្យខ្ចីបន្ថែមទៀតធ្វើដូចចិត្តល្អណាស់ ។ ដោយឡែក ក្រោយពីចាប់ឆ្នោតបានគឺគេឲ្យចុះហត្ថលេខា រីឯរង្វាន់ដែលត្រូវបានគឺមិនបានឲ្យយើងទេ គឺបង្ខំឲ្យយើងទិញអីវ៉ាន់ផ្សេងស្មើទំនិញហ្នឹងដែរ ។
នេះគឺជាល្បិចបោកថ្មី គឺសន្លឹកឆ្នោតត្រូវតែទាំងអស់ គ្មានសន្លឹកណាមិនត្រូវនោះទេ បន្ទាប់ពីត្រូវឆ្នោតហើយ បង្ខំឲ្យទិញអីវ៉ានមានតម្លៃស្មើនឹងរង្វាន់ ។ បើក្រុមហ៊ុនធ្វើដូច្នេះមិនចាំបាច់ចាប់ឆ្នោតធ្វើអី ចង់បានមកទិញតែម្តងទៅ ?
លោក អុិត សុធា ព្រះរាជអាជ្ញាអមសាលាដំបូងខេត្តកំពង់ធំ បានអំពាវនាវដល់បងប្អូនប្រជាពលរដ្ឋក្នុងខេត្តកំពង់ធំក៏ដូចជាទូទាំងប្រទេសផងដែរ សូមកុំឲ្យមានការជឿលើក្រុមហ៊ុន ដែលពុំមានទីតាំងច្បាស់លាស់ និងពុំបានបើកចំហជាសាធារណៈ ពុំបានសហការជាមួយអាជ្ញាធរ និងពុំមានច្បាប់អនុញ្ញាតអាចនិងត្រូវបានក្រុមឆបោកទាំងនេះ ប្រើប្រាស់ល្បិចកលដើម្បីបញ្ឆោតឲ្យទិញទំនិញរបស់គេតែប៉ុណ្ណោះ ៕
ចែករំលែកព័តមាននេះ