រាជធានីភ្នំពេញ ៖ ជនសង្ស័យកាប់ប្លន់យកម៉ូតូ និងជួញដូរគ្រឿងញៀនចំនួន៥នាក់ ត្រូវបាននគរបាលខណ្ឌឬស្សីកែវធ្វើសន្និសីទកាសែតបង្ហាញមុខជាសាធារណៈ កាលពីវេលាម៉ោង៣និង៣០នាទីរសៀលថ្ងៃទី០៦ ខែវិឆ្ឆិកា ឆ្នាំ២០១៨ ។
ជនសង្ស័យដែលបង្ហាញមុខ១- ឈ្មោះ ឌឹក វុត្ថា ហៅតូច ភេទប្រុស អាយុ៣៦ឆ្នាំ ស្នាក់នៅភូមិ បឹងកក់ សង្កាត់ស្រះចក ខណ្ឌដូនពេញ ២- ឈ្មោះ លី ចាន់ដារ៉ា ហៅធី ភេទប្រុស អាយុ១៨ឆ្នាំ ស្នាក់នៅផ្លូវរថភ្លើងក្នុងភូមិចុងខ្សាច់ សង្កាត់ទួលសង្កែទី១ ខណ្ឌឬស្សីកែវ ៣- ឈ្មោះ គឿង សុជាតិ ហៅឧត្តម ភេទប្រុស អាយុ៣១ឆ្នាំ ស្នាក់នៅភូមិចុងខ្សាច់ សង្កាត់ទួលសង្កែទី១ ខណ្ឌឬស្សីកែវ ។ជនសង្ស័យទាំង៣នាក់បានធ្វើសកម្មភាពប្លន់ ។ ៤- ឈ្មោះ ស៊ីត យូសុះ ភេទប្រុស អាយុ២២ឆ្នាំ ស្នាក់នៅភូមិឬស្សីជ្រោយ ឃុំឬស្សីជ្រោយ ស្រុកមុខកំពូល និង៥- ឈ្មោះ កែវ សកក្កដា ភេទប្រុស អាយុ១៨ឆ្នាំ ស្នាក់ភូមិចុងខ្សច់ សង្កាត់ទួលសង្កែ១ ខណ្ឌឬស្សីកែវ ។ អ្នកទាំង២នាក់ជួញដូរគ្រឿងញៀន ។
នៅក្នុងសន្និសីទកាសែតលោកវរៈសេនីយ៍ទោ គល់ យី អធិការនគរបាលខណ្ឌឬស្សីកែវបានឲ្យដឹងថា ជនសង្ស័យទាំង៥នាក់ ដែលបង្ហាញមុខនៅពេលនេះ មានករណីផ្សេងពីគ្នាដែលករណីទី១ គឺជាជនសង្ស័យដែលធ្វើសកម្មភាពប្លន់មានគ្នាចំនួន៣នាក់ និង២នាក់ទៀតជាក្រុមជួញដូរគ្រឿងញៀនដែលត្រូវបានកម្លាំងនគរបាលខណ្ឌឬស្សីកែវស្រាវជ្រាវ ចាប់បានជាបន្តបន្ទាប់ នៅថ្ងៃទី៥ និងទី៦ ខែវិឆ្ឆិកា ឆ្នាំ២០១៨ ។
លោកវរៈសេនីយ៍ទោ គល់ យី បានឲ្យដឹងទៀតថា បន្ទាប់ពីមានករណីកាប់ប្លន់យកម៉ូតូម៉ាកSUZUKI SMASH ពណ៌ខ្មៅលាយក្រហម ពាក់ស្លាកលេខភ្នំពេញ 2BL-8439 មួយគ្រឿង កាលពីវេលាម៉ោង៨និង៤៥នាទីយប់ ថ្ងៃទី៣ ខែវិច្ឆិកា ឆ្នាំ២០១៨ នៅចំណុចផ្លូវរថភ្លើងភូមិចុងខ្សាច់សង្កាត់ទួលសង្កែ១ ខណ្ឌឬស្សីកែវ កម្លាំងនគរបាលខណ្ឌឬស្សីកែវក៏បានធ្វើការស្រាវជ្រាវហើយឈានទៅឃាត់ខ្លួនជនសង្ស័យជាបន្តបន្ទាប់ចំនួន៣នាក់ កាលពីថ្ងៃទី០៥ ខែវិច្ឆិកា ឆ្នាំ២០១៨ នៅសង្កាត់ឬស្សីកែវ ដោយដកហូតបានម៉ូតូជនរងគ្រោះមួយគ្រឿង ។
លោកអធិការបានឲ្យដឹងទៀតថា ដោយឡែនជនសង្ស័យ២នាក់ ត្រូវបានកម្លាំងនគរបាលខណ្ឌឬស្សីកែវស្រាវជ្រាវឃាត់ខ្លួន កាលពីវេលាម៉ោង៧និង២០នាទីយប់ ថ្ងៃទី០៥ ខែវិច្ឆិកា ឆ្នាំ ២០១៨ នៅសង្កាត់ច្រាំងចំរេះទី១ បាន៩កញ្ចប់ ។ ជនសង្ស័យទាំង៥នាក់ត្រូវបានបង្ហាញមុខនៅពេលនេះ ។
គួរបញ្ជាក់ថា កាលពីវេលាម៉ោង៨និង៤៥នាទីយប់ ថ្ងៃទី៣ ខែវិច្ឆិកា ឆ្នាំ២០១៨ ជនសង្ស័យ២នាក់បានធ្វើសកម្មភាពកាប់ប្លន់យកម៉ូតូមួយគ្រឿង នៅចំណុចផ្លូវរថភ្លើងភូមិចុងខ្សាច់សង្កាត់ទួលសង្កែ១ ខណ្ឌឬស្សីកែវ ហើយកាប់ទៅលើឈ្មោះ កន នាង ភេទប្រុស អាយុ៤៧ឆ្នាំ មុខរបរអ្នករត់ម៉ូតូឌុប ស្នាក់នៅបន្ទប់ជួលភូមិទ្រុងមាន់ សង្កាត់អូបែកក្អម ខណ្ឌសែនសុខ បណ្តាលឲ្យរងរបួសដៃ ហើយយកម៉ួតូទៅបាត់ ។ ការកាប់ប្លន់នេះ ខណៈពេលដែលជនជនរងគ្រោះដឹកនារី២នាក់ ហើយអង្គុយចាំយកលុយក៏ត្រូវជនសង្ស័យកាប់ប្លន់តែម្តង ៕
ចែករំលែកព័តមាននេះ