ខេត្តប៉ៃលិន ៖ គេសង្កេតឃើញប្រជាពលរដ្ឋមួយគ្រួសារបានដំណាំម្នាក់ៗជាច្រើនគុម្ព ហើយកំពុងទទួលបានផលបេះលក់នៅក្នុងរោងខាងមុខផ្ទះរបស់ខ្លួន តែអ្វីដែលគួរឱ្យកត់សម្គាល់នោះ គឺតម្លៃមានការចុះថោកដោយ១ផ្លែលក់បានត្រឹមតែ៥០០ ទៅ១០០០រៀលប៉ុណ្ណោះ ខណៈម្នាស់ជាច្រើនត្រូវឈ្មួញនាំចូលមកពីខេត្តបាត់ដំបង ។
ហេតុការណ៍ប្រមូលផលផ្លែម្នាស់នេះបានធ្វើឡើង កាលពីរសៀលថ្ងៃទី០៤ ខែវិច្ឆិកា ឆ្នាំ២០១៨ ស្ថិតនៅក្នុងភូមិអណ្តូងថ្ម ឃុំស្ទឹងកាច់ ស្រុកសាលាក្រៅ ។ ប្រភពព័ត៌មានពីស្ត្រីម្នាក់ឈ្មោះ ម៉ី ដា អាយុ៣៩ឆ្នាំ រស់នៅក្នុងភូមិខាងលើបានរៀបរាប់ឱ្យដឹងថា គាត់បានដាំដំណាំម្នាស់ចំនួន៣ម៉ឺនដើម អស់រយៈពេលជាង២ឆ្នាំមកហើយក៏បានប្រមូលផលចំនួន២សារមកហើយដែរ ។
គាត់បន្តទៀតថា ការដាំម្នាស់នេះមិនត្រូវការថែទាំច្រើនប៉ុន្មាននោះទេគ្រាន់តែជម្រះស្មៅ និងស្រោចទឹកពេលរដូវរាំងស្ងួតហួតហែងប៉ុណ្ណោះលុះដល់លូតលាស់ល្អ គាត់គ្រាន់តែបាញ់ជាតិថ្មស្អុយ ដើម្បីឱ្យម្នាស់ចេញផ្កានោះជាការស្រេច ។ ចម្ការម្នាស់របស់គាត់មិនបានដាក់ថ្នាំជាតិគីមីបំប៉នឱ្យធំនោះទេ គឺទុកឱ្យដុះលូតលាស់តាមលក្ខណៈធម្មជាតិដូច្នេះហើយទើបផ្លែមិនសូវធំដូចជា ម្នាស់ដែលគេដឹកចូលមកពីតាមបណ្តាខេត្តបាត់ដំបង ។ គាត់បញ្ជាក់ថា ការប្រមូលផលដំណាំម្នាស់លក់១ផ្លែ គាត់លក់បានត្រឹមតែ៥០០រៀល ហើយបើផ្លែធំជាងនេះបន្តិច គាត់លក់១ផ្លែត្រឹមតែ១០០០រៀលប៉ុណ្ណោះ ហើយបើសិនជាទិញច្រើនគាត់ក៏មានការបញ្ចុះតម្លៃថែមទៀតផងដែរ ។
គាត់ចង់យកទៅលក់ដូរនៅក្នុងផ្សារក្រុងប៉ៃលិនដែរ តែដោយសារតម្លៃទាបពេក ព្រោះគេនាំចូលមកពីតាមកន្លែងផ្សេងៗជាច្រើន ហើយម្នាស់គេធំៗល្អលំបាកក្នុងការលក់ដូរទើបគាត់សុខចិត្តដាក់លក់នៅក្នុងតូបមុខផ្ទះរបស់ខ្លួនតែម្តង ។ បើសិនជានៅឆ្នាំក្រោយៗទៀតលំបាកក្នុងការរកទីផ្សារគាត់ប្រហែលជាប្តូរទៅដាំដំណាំផ្សេងទៀតដូចជា ពោត ឬដំឡូងមីម្តងវិញ ព្រោះបើបន្តដាំហើយម្នាស់ ហើយគ្មានទីផ្សារអាចធ្វើឱ្យជីវភាពរបស់គាត់កាន់តែលំបាកឡើងៗ ៕
ចែករំលែកព័តមាននេះ