រាជធានីភ្នំពេញ ៖ រយៈពេលជាងមួយឆមាសនេះ គេសង្កេតឃើញតម្លៃជ្រូកក្នុងស្រុក ហាក់មានភាពល្អប្រសើរឡើងវិញ បន្ទាប់ពីបានធ្លាក់ដាំក្បាលចុះអស់រយៈពេលជាង១ឆ្នាំមក ថែមទាំងបានធ្វើឲ្យកសិករ និងម្ចាស់កសិដ្ឋានមួយចំនួនបោះបង់ការចិញ្ចឹមជាបន្ដបន្ទាប់ ។ បើទោះជាតម្លៃជ្រូកពេលនេះបានងើបឡើងវិញក្តី…
រាជធានីភ្នំពេញ ៖ រយៈពេលជាងមួយឆមាសនេះ គេសង្កេតឃើញតម្លៃជ្រូកក្នុងស្រុក ហាក់មានភាពល្អប្រសើរឡើងវិញ បន្ទាប់ពីបានធ្លាក់ដាំក្បាលចុះអស់រយៈពេលជាង១ឆ្នាំមក ថែមទាំងបានធ្វើឲ្យកសិករ និងម្ចាស់កសិដ្ឋានមួយចំនួនបោះបង់ការចិញ្ចឹមជាបន្ដបន្ទាប់ ។ បើទោះជាតម្លៃជ្រូកពេលនេះបានងើបឡើងវិញក្តី តែអ្នកពាក់ព័ន្ធថាតម្លៃជ្រូកក្នុងស្រុកនៅតែពឹងលើទីផ្សារបរទេសដែលសំដៅលើប្រទេសថៃ និងវៀតណាមដដែល ។
លោក ជេត ភីរម្យ អនុប្រធានសមាគមអ្នកចិញ្ចឹមជ្រូកកម្ពុជា បានឲ្យដឹងថា តម្លៃជ្រូករស់បានងើបឡើងវិញចាប់តាំងពីបុណ្យចូលឆ្នាំខ្មែរមក ហើយបន្ដរក្សាតម្លៃបានល្អណាស់ គឺចន្លោះពី៨ពាន់ដល់៩ពាន់រៀលក្នុង១គីឡូក្រាម ។ លោកថា ៖« ការងើបឡើងវិញនៃតម្លៃជ្រូកនៅកម្ពុជា បានផ្ដល់ប្រយោជន៍ជាច្រើនដល់កសិករ និងម្ចាស់កសិដ្ឋាន ជាពិសេសនោះ គឺធានាបានថាពលរដ្ឋកម្ពុជា នឹងទទួលបានសាច់ជ្រូកក្នុងស្រុក និងដឹងប្រវត្តិច្បាស់លាស់ »។ លោកបន្តថា ចាប់តាំងពីតម្លៃងើបឡើងវិញ កសិករដែលហៀបនឹងបោះបង់ចោលការចិញ្ចឹមនោះ បានពង្រីកការចិញ្ចឹមឡើងវិញ ហើយកសិករផ្សេងៗទៀត ក៏បានចាប់អារម្មណ៍រៀបចំកសិដ្ឋានចិញ្ចឹមឡើងវិញដែរ ។ ជាក់ស្ដែងបើតាមប្រភពពីក្រុមហ៊ុន M’s Pig របស់ឧកញ៉ា ម៉ុង ឫទ្ធី ដែលជាក្រុមហ៊ុនផ្គត់ផ្គង់ជ្រូកពូជធំជាងគេនៅកម្ពុជាបានឲ្យដឹងថា ការផ្គត់ផ្គង់កូនជ្រូកទៅកសិករ និងម្ចាស់កសិដ្ឋាន មិនទាន់ទៅតាមតម្រូវការនោះឡើយ ។ ដូចនេះបញ្ជាក់ថា កំណើននៃអ្នកចិញ្ចឹមចាប់ផ្ដើមឡើងខ្ពស់វិញហើយ ។
លោកបន្ថែមថា តាមពិតទៅ កត្តាដែលធ្វើឲ្យជ្រូកក្នុងស្រុកឡើងថ្លៃ នៅតែពាក់ព័ន្ធនឹងទីផ្សារក្រៅស្រុកដដែល ព្រោះបច្ចុប្បន្ន ជ្រូកនៅវៀតណាម បានឡើងថ្លៃដូចគ្នា ដែលធ្វើឲ្យឈ្មួញនាំចូលបានកាត់បន្ថយការនាំចូល និងងាកមករកការចាប់ជ្រូកក្នុងស្រុកផ្ដល់ជូនតាមកុងស៊ី កាប់ជ្រូកនានាវិញ ។ ម្យ៉ាងទៀត បើតាមដែលលោកដឹង រដ្ឋាភិបាលវៀតណាមក៏បានកំណត់គោលដៅច្បាស់លាស់ក្នុងការផលិតជ្រូកសម្រាប់ផ្គត់ផ្គង់ទីផ្សារក្នុង និងក្រៅប្រទេស ពីព្រោះកន្លងមក វៀតណាមធ្លាប់ជួបបទពិសោធន៍ជូរចត់ម្ដងរួចមកហើយ គឺផលិតលើសតម្រូវការ ហើយប្រទេសចិនក៏បានបដិសេធក្នុងការនាំចូល ទើបវៀតណាមបង្ខំចិត្តលក់ជ្រូកទាំងខាតមកកាន់ឈ្មួញនាំចូលមកកម្ពុជា ជាជាងទុកនៅកាន់តែខាងច្រើន ។ លោកថា ៖« បច្ចុប្បន្ននេះ ការនាំចូលភាគច្រើនពីប្រទេសថៃ មកកម្ពុជា ក៏ប៉ុន្តែការនាំចូលពីថៃ គឺមានតម្លៃខ្ពស់ ហើយក៏មិនមានចំនួនច្រើនលើសលប់ដូចកាលនាំចូលពីវៀតណាមដែរ » ។
លោកបញ្ជាក់ថា ទីផ្សារជ្រូកក្នុងស្រុក អាចនឹងមានស្ថានភាពល្អបែបនេះយូរអង្វែងទៀត ក៏ប៉ុន្តែក្នុងនាមសមាគមអ្នកចិញ្ចឹមសត្វកម្ពុជា ក៏សូមស្នើដល់រាជរដ្ឋាភិបាល ឲ្យពិនិត្យមើលបន្ថែម ពីការនាំចូលដោយមិនមានច្បាប់ត្រឹមត្រូវ និងមិនបានត្រួតពិនិត្យសុខភាពសត្វមុននាំចូល ។ បើពុំនោះទេ សត្វដែលនាំចូលអាចជាសត្វឈឺ បណ្ដាលឲ្យចម្លងដល់សត្វក្នុងស្រុក ជាពិសេសប៉ះពាល់ដល់អ្នកបរិភោគផងដែរ ។
បើតាមលោក មុត ពិសិដ្ឋ ជំនួយការក្រុមប្រឹក្សាភិបាល នៃក្រុមហ៊ុនស៊ីភី ខេមបូឌា ដែលជាក្រុមហ៊ុនផ្គត់ផ្គង់សាច់ដ៏ធំមួយនៅកម្ពុជា បានឲ្យដឹងដែរថា ជាការពិតណាស់ តម្លៃជ្រូករស់ ក្នុងស្រុកឃើញថាមានភាពល្អប្រសើរឡើងវិញ ក្នុងរយៈពេលជាងមួយឆមាសកន្លងទៅនេះ ដែលធ្វើឲ្យក្រុមហ៊ុនជំរុញការផលិតបន្ថែម ដើម្បីផ្គត់ផ្គង់ឆ្លើយតបនឹងតម្រូវការក្នុងស្រុក ។ លោកបន្តថា នៅពេលតម្លៃជ្រូក បានឡើងថ្លៃ ការនាំចូលក៏បានកាត់បន្ថយច្រើន ដែលធ្វើឲ្យអាជីវករក្នុងស្រុកមានទឹកចិត្តក្នុងការចិញ្ចឹមជ្រូកឡើងវិញ និងធានាបាននូវសាច់ល្អ ព្រោះសាច់ផលិតបានភ្លាមផ្គត់ផ្គង់ទៅកាន់ទីផ្សារភ្លាម ។
គួរបញ្ជាក់ផងដែរថា ក្នុងពេលតម្លៃជ្រូកធ្លាក់ចុះខ្លាំង កាលពីជាងមួយឆ្នាំមុន បានធ្វើឲ្យកម្ពុជា ត្រូវខាតបង់ប្រាក់រាប់លានដុល្លារអាមេរិក ដែលជាហេតុធ្វើឲ្យអ្នកមានទុនតិចតួចបោះបង់ចោលការចិញ្ចឹម ពីព្រោះតែមិនអាចទប់ទល់នឹងការខាតបង់ជាបន្តបន្ទាប់បាន ៕
ចែករំលែកព័តមាននេះ