ខេត្តឧត្តរមានជ័យ ៖ ចំណុចសំខាន់ៗរបស់លោកហ៊ុន ម៉ាណែត តំណាងដ៏ខ្ពង់ខ្ពស់សម្ដេចតេជោ ហ៊ុន សែន និងសម្ដេចកិត្ដិព្រឹទ្ធបណ្ឌិតថ្លែងក្នុងពិធីសម្ពោធដាក់ឱ្យប្រើប្រាស់សាលាសង្ឃភត្ត និងសមិទ្ធផលនានាក្នុងវត្តជ័យរុក្ខារាម ហៅវត្តថ្លាត…
ខេត្តឧត្តរមានជ័យ ៖ ចំណុចសំខាន់ៗរបស់លោកហ៊ុន ម៉ាណែត តំណាងដ៏ខ្ពង់ខ្ពស់សម្ដេចតេជោ ហ៊ុន សែន និងសម្ដេចកិត្ដិព្រឹទ្ធបណ្ឌិតថ្លែងក្នុងពិធីសម្ពោធដាក់ឱ្យប្រើប្រាស់សាលាសង្ឃភត្ត និងសមិទ្ធផលនានាក្នុងវត្តជ័យរុក្ខារាម ហៅវត្តថ្លាត ស្ថិតក្នុងភូមិទួលក្រឡាញ់ ឃុំថ្លាត ស្រុកអន្លង់វែង ខេត្តឧត្តរមានជ័យ នៅថ្ងៃទី៤ វិច្ឆិកា ២០១៨ ។
១-សូមថ្លែងអំណរគុណ និងកោតសរសើរដោយស្មោះចំពោះព្រះតេជគុណព្រះសង្ឃគ្រប់ព្រះអង្គ សប្បុរសជនដែលបានចូលរួមចែករំលែកកសាងសមិទ្ធផលទាំងអស់នេះ ។ បើយើងមិនមានការចូលរួមប្រហែលជាយើងមិនអាចកសាងសមិទ្ធផលទាំងនេះបានទេ បើយើងមិនមានការចូលរួមក៏យើងមិនអាចកសាងបានលឿនបែបនេះដែរ ។ ថ្ងៃនេះយើងសម្ពោធសមិទ្ធផល ដើម្បីអបអរនូវអ្វីដែលយើងបានធ្វើរួមគ្នា ដើម្បីប្រជាពលរដ្ឋនៅទីនេះនៅថ្ងៃនេះក៏ដូចជា ទៅថ្ងៃអនាគត ។ ២-គោលនយោបាយរបស់សម្ដេចតេជោ ហ៊ុន សែន គឺធ្វើបុណ្យជាមួយប្រជាពលរដ្ឋ ដើម្បីឆ្លើយតបទៅនឹងតម្រូវការរបស់ពួកគាត់ ។
ជាក់ស្តែងអាជ្ញាធរ និងក្រុមការងារគ្រប់លំដាប់ថ្នាក់បានចូលរួមបម្រើប្រជាពលរដ្ឋ និងកសាងបុណ្យជាមួយគ្នាក្នុងកាលៈទេសៈដែលយើងមានសុខសន្តិភាព ។ នេះហើយ គឺជាស្មារតីដែលយើងរួមគ្នាធ្វើពិតប្រាកដនៅក្រោមគោលនយោបាយរបស់សម្ដេចតេជោ និងការខិតខំប្រឹងប្រែងរបស់រាជរដ្ឋាភិបាល ។ ៣-សូមថ្លែងអំណរគុណប្រជាពលរដ្ឋនៅស្រុកអន្លង់វែងដែលបានគាំទ្រការដឹកនាំរបស់សម្ដេចតេជោ និងបោះឆ្នោតជូនគណបក្សប្រជាជនកម្ពុជា ។
លោកតាលោកយាយ បងប្អូន ប្រជាពលរដ្ឋបានបោះឆ្នោតត្រូវ គឺមានថ្នាក់ដឹកនាំដែលទទួលខុសត្រូវ គិតគូរពីប្រជាជនធ្វើបុណ្យជាមួយប្រជាជនខិតខំប្រឹងប្រែងធ្វើអំពើល្អជួយប្រជាជនឲ្យមានភាពកក់ក្តៅ និងខិតខំកែលម្អធ្វើយ៉ាងណាឱ្យមានលំនឹងសុខសន្តិភាព ។ ជាក់ស្តែងយើងជួបគ្នាថ្ងៃនេះយើងសប្បាយរីករាយជាមួយគ្នាក្នុងការសម្ពោធសមិទ្ធផលថ្មីៗ ។ បើយើងបោះឆ្នោតខុស ប្រទេសជាតិនឹងក្រឡាប់ចាក់ដូចដែលយើងធ្លាប់បានជួបប្រទះនៅក្នុងអតីតកាល ។ ៤-អន្លង់វែង គឺជាកន្លែងដែលកំសត់ជាងគេ ដែលជាទីកន្លែងសមរភូមិវាយប្រយុទ្ធគ្នា ប៉ុន្តែឥឡូវយើងមានសុខសន្តិភាព មានការអភិវឌ្ឍលើគ្រប់វិស័យកូនចៅប្រជាពលរដ្ឋមានឱកាសរៀនសូត្រ មានឱកាសការងារធ្វើ ដែលអាចធ្វើអោយកូនចៅជំនាន់ក្រោយលែងលំបាកទៀតហើយ ។ យើងនៅតែបន្តធ្វើតទៅទៀត ហើយក៏យើងមិនធ្វើដើម្បីបរទេសទេ គឺធ្វើដើម្បីកូនចៅប្រជាពលរដ្ឋជំនាន់ក្រោយ ។ នៅទីនេះយើងជាខ្មែរបានកសាងសមិទ្ធផលក៏ដោយសារខ្មែរដែរ មិនមែនដោយសារបរទេសមិនមែនដោយសារអង្គការសហប្រជាជាតិចំណាយថវិកាអស់រាប់ពាន់លានមិនអាចបញ្ចប់សង្គ្រាមនោះទេ ។ គឺយើងបញ្ចប់សង្គ្រាមដោយសារ សម្តេចតេជោ និងថ្នាក់ដឹកនាំគ្រប់ភាគីទាំងអស់របស់អតីតខ្មែរក្រហមដែលយើងរួមគ្នាបញ្ចប់សង្គ្រាម យើងមានសុខសន្តិភាព យើងកសាងដោយខ្មែររួមគ្នាធ្វើរហូតដល់សព្វថ្ងៃ ។ ៥-ស្មារតីជាតិនិយមរបស់សម្តេចតេជោ គឺអត់លត់ជង្គង់ចំពោះបរទេសទេ ព្រោះយើងកសាងប្រទេសដោយខ្លួនឯង យើងធ្វើដើម្បីប្រជាពលរដ្ឋខ្មែរ ។
យើងកសាងសមិទ្ធផលរួមមានសាលារៀនផ្លូវថ្នល់ និងសមិទ្ធផលនានាជាច្រើនទៀតយើងស្វែងរកទីផ្សារសម្រាប់កសិផលរបស់ប្រជាពលរដ្ឋ យើងបង្កើតឱកាសការងារជាច្រើនក៏ដោយសារខ្មែរបង្កើតការងារឲ្យកូនចៅប្រជាពលរដ្ឋរាប់ម៉ឺនរាប់សែននាក់ដោយសារខ្មែរ គឺសម្តេចតេជោ ប្រមុខរាជរដ្ឋាភិបាលខ្មែរមិនមែនដោយសារបរទេសនោះទេ ខុសពីអ្នកនយោបាយខ្លះទៅពឹងបរទេសឲ្យមកធ្វើបាបខ្មែរ ។ ៦-ថ្នាក់ដឹកនាំរបស់យើង គឺសម្ដេចតេជោធ្វើអ្វីៗដើម្បីខ្មែរ ដើម្បីបុព្វហេតុជាតិ កងកម្លាំងប្រដាប់អាវុធខិតខំពង្រឹងសន្តិសុខ ការពារសុខសន្តិភាព មន្ត្រីរាជការត្រូវបានដំឡើងប្រាក់បៀវត្ស ដើម្បីលើកស្ទួយកម្រិតជីវភាព យើងលើកទឹកចិត្តប្រជាពលរដ្ឋអោយចូលរួមកសាងក្នុងការពង្រឹងវិស័យសាសនា យើងធ្វើទាំងអស់នេះ ដើម្បីអ្នកណា គឺដើម្បីខ្មែរយើងតែមួយដើម្បីខ្មែរយើងកាន់តែខ្លាំង ៕
ចែករំលែកព័តមាននេះ