ខេត្តបន្ទាយមានជ័យ ៖ ករណីលួចកាយដី និងថ្មភ្នំធ្វើអាជីវកម្មនៅតែបន្តកើតមានក្នុងខេត្តបន្ទាយមានជ័យ ដែលខ្លះអត់ច្បាប់ និងខ្លះមានច្បាប់ តែក្រោមរូបភាពកន្ទេលធំបន្លំដេក ហើយសកម្មភាពនេះ ហាក់ដូចជាត្រូវបានលាក់លៀមស្ងាត់ឈឹងតែម្តង ទាល់តែមានហេតុការណ៍រងគ្រោះ ទើបបែកធ្លាយ ។ ភ្នំទ្រយោង ស្ថិតក្នុងភូមិទ្រយោង ឃុំភ្នំលៀប ស្រុកព្រះនេត្រព្រះ មានគ្រោះអកុសលមួយ ដែលបុរសម្នាក់ត្រូវរថយន្តដឹកដីក្រឡាប់សង្កត់ស្លាប់ នៅក្នុងរណ្តៅលួចកាយដីនិងថ្មភ្នំ ដោយសាររថយន្តរអិលថយក្រោយ ។
ហេតុការណ៍នេះ បានកើតឡើងកាលពីព្រឹកថ្ងៃទី៤ វិច្ឆិកា កន្លងទៅ ។ ជនរងគ្រោះឈ្មោះ ឃិញ ស៊ី ភេទប្រុស អាយុ២៧ឆ្នាំ មានទីលំនៅក្នុងភូមិឃុំកើតហេតុខាងលើ ជាអ្នកស៊ីឈ្នួលបើកបររថយន្តដឹកថ្មឲ្យឈ្មោះ យឿន សំបូរ ភេទប្រុស អាយុ៣៣ឆ្នាំ រស់នៅភូមិភ្នំលៀបកើត ឃុំភ្នំលៀប ស្រុកព្រះនេត្រព្រះ ។
ប្រភពព័ត៌មាននៅកន្លែងកើតហេតុបានឲ្យដឹងថា ដំបូងជនរងគ្រោះបើករថយន្តម៉ាកហុីណូ ពាក់ផ្លាកលេខ បាត់ដំបង ៣A-១០០៧ ឡើងទៅទីតាំងរណ្តៅជីកថ្មដើម្បីឲ្យគ្រឿងចក្រកាយថ្មដាក់លើរថយន្ត ។ ពេលទៅដល់ចំណុចកើតហេតុរថយន្តនោះមិនបានពន្លត់ម៉ាស៊ីនទេ ហើយ បុរសអ្នកបើកបរបានចេញពីក្នុងកា
ប៊ីនឡើងទៅលើដំបូលកាប៊ីន ជាចៃដន្យស្រាប់តែរថយន្តរអិលថយក្រោយ ធ្លាក់ទៅក្រោមដែលមានជម្រៅប្រហែល៦០ទៅ៧០ម៉ែត្រ ។
ប្រភពព័ត៌មានបន្តទៀតថា ខណៈរថយន្តរអិលនោះ ជនរងគ្រោះបានលោតចូលទៅក្នុងទ្រុងរថយន្តក្រែងបញ្ចៀសបញ្ហា តែជាគ្រោះដ៏ធំរថយន្តបានក្រឡាប់ជាច្រើនត្រឡប់ផ្ងារជើងឡើងលើសង្កត់ជនរងគ្រោះស្លាប់តែម្តង ។
ពាក់ព័ន្ធនឹងភ្នំទ្រយោងនេះ គេឃើញមានការលួចកាយយកដីនិងថ្មស្ទើរជុំវិញ ហើយបើតាមប្រភពព័ត៌មានថា ក្រុមហ៊ុនដែលចូកកាយដីនិងថ្មភ្នំនៅទីនោះមានមិនតិចជាង៣ក្រុមហ៊ុនឡើយ ។ មិនតែប៉ុណ្ណោះ ទីតាំងកាយជុំវិញភ្នំនេះកន្លែងខ្លះគេប្រុងបោះរបងយកធ្វើជាកម្មសិទ្ធិថែមទៀត ។
ជុំវិញករណីខាងលើ លោក អែម ណុយ មេឃុំភ្នំលៀប ប្រាប់កោះសន្តិភាពថា ពិតជាមានការកាយជើង
ភ្នំទ្រយោងមែន ប៉ុន្តែលោកថាក្រុមហ៊ុនមួយជារបស់ឧកញ៉ាម្នាក់ ដឹកយកទៅធ្វើផ្លូវនានាក្នុងខេត្តសៀមរាប ហើយអ្នកកាយម្នាក់ទៀតគេមានប្លង់កម្មសិទ្ធិដីនៅជើងភ្នំនោះ ។
លោកមេឃុំបន្តថា ដីជើងភ្នំដែលគេគ្រោងព័ទ្ធរបងយក តាមពិតមានម្ចាស់ត្រឹមត្រូវគ្រាន់តែថា កន្លែងខ្លះ
គេឈូសឆាយពង្រាបឲ្យស្មើតែប៉ុណ្ណោះ ។ ដោយឡែក ទីតាំងមានគ្រោះថ្នាក់គឺម្ចាស់រថយន្តលួចកាយយកថ្មភ្នំជាយូរមកហើយ លុះលើកនេះទាល់តែជួបគ្រោះថ្នាក់មានមនុស្សស្លាប់ទើបបែកធ្លាយពីការលួចកាយ
បំផ្លាញភ្នំធ្វើអាជីវកម្ម ហើយមិនដឹងជាអាជ្ញាធរឬក្រុមមន្ត្រីជំនាញនឹងមានវិធានការបែបណាទេ ៕
ចែករំលែកព័តមាននេះ