រាជធានីភ្នំពេញ ៖ កិច្ចសហការពីក្លិបអ្នកកាសែតកម្ពុជាឯកអគ្គរដ្ឋទូតសហភាពអឺរ៉ុបប្រចាំកម្ពុជា បានដឹកនាំអ្នកកាសែតមួយក្រុមដែលមកពីច្រើនស្ថាប័នចុះទៅពិនិត្យដោយផ្ទាល់នូវគម្រោងដែលទទួលបានថវិកាគាំទ្រពីសហភាពអឺរ៉ុបក្នុងខេត្តព្រៃវែង និងស្វាយរៀង ។
ដំណើរទស្សនកិច្ចនោះធ្វើឡើងក្នុងរយៈពេល២ថ្ងៃគឺ ថ្ងៃទី៦-៧ ខែវិច្ឆិកា ឆ្នាំ២០១៨ ។ លោក George Edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជាបានថ្លែងថា ដំណើរទស្សនកិច្ចរបស់អ្នកសារព័ត៌មានមកពិនិត្យមើលគម្រោងរបស់សហភាពអឺរ៉ុបនៅខេត្តព្រៃវែង និងស្វាយរៀង គឺជាមធ្យោបាយមួយក្នុងចំណោមមធ្យោបាយជាច្រើន ដើម្បីសង្កេតមើលប្រសិទ្ធភាពនៃការប្រើប្រាស់មូលនិធិរបស់សហភាពអឺរ៉ុប ដើម្បីឆ្លើយតបចំពោះតម្រូវការរបស់ប្រជាពលរដ្ឋក្នុងខេត្តពីរនេះ ។
តាមរយៈនោះអ្នកសារព័ត៌មាននឹងបានស្វែងយល់កាន់តែច្បាស់អំពីការលំបាកដែលអាជ្ញាធររួមទាំងសហគមន៍មូលដ្ឋានកំពុងជួបប្រទះក្នុងពេលអនុវត្តគម្រោងនីមួយៗ ខណៈដែលគម្រោងទាំងនោះរួមមានដូចជា វិស័យអប់រំសិក្សាវិស័យកសិកម្ម បរិស្ថាន រហូតដល់ការគ្រប់គ្រងហិរញ្ញ វត្ថុសាធារណៈ និងការផ្តល់ជំនួយពាក់ព័ន្ធនឹងពាណិជ្ជកម្មដែលផ្តល់ផលប្រយោជន៍ដល់ពលរដ្ឋកម្ពុជារាប់លាននាក់ ។
លោក George Edgar បានបញ្ជាក់ថា សហភាពអឺរ៉ុប គឺជាអ្នកគាំទ្រដ៏សំខាន់មួយដល់ការ អភិវឌ្ឍន៍ប្រកបដោយចីរភាពនៅកម្ពុជា និងរបៀបវរៈឆ្នាំ២០៣០ ។ ផ្តើមពីនោះលោកក៏បាន បង្ហាញនូវមោទនភាពចំពោះអ្វីដែលសហភាពអឺរ៉ុប និងកម្ពុជាបានសម្រេចរួមគ្នាកន្លងមក ហើយលោករំពឹងថា កិច្ចសហប្រតិបត្តិការដ៏ជិតស្និទ្ធរវាងកម្ពុជា និងសហភាពអឺរ៉ុប និងនៅតែមានបន្តទៀត ។ ឯកអគ្គរដ្ឋទូតរូបនោះបានរម្លឹកថា សហភាពអឺរ៉ុបមានទំនាក់ទំនងជិតស្និទ្ធជាយូរមក ហើយជាមួយនឹងប្រទេសកម្ពុជាចាប់ពីការគាំទ្រដល់ការស្តារហេដ្ឋារចនាសម្ព័ន្ធ និងប្រព័ន្ធសារគមនាគមន៍ឡើងវិញ ការបង្កើនផលិតកម្មកសិកម្មការធ្វើមាតុភូមិនិវត្តន៍ជនភៀសខ្លួន និងការដោះមីនរាប់លានគ្រាប់ក្នុងទស្សវត្សរ៍១៩៩០ រហូតដល់ការអនុវត្តកម្មវិធីផ្តល់ ជំនួយ អភិវឌ្ឍន៍ យ៉ាងច្រើនសន្ធឹកសន្ធាប់ ។
ផ្តើមពីនោះកិច្ចប្រជុំត្រូវបានរៀបចំឡើងរៀងរាល់ពីរឆ្នាំម្តង ដោយគណៈកម្មាធិការចម្រុះដែលជាឱកាស ដើម្បីឱ្យសហភាពអឺរ៉ុប និងរាជរដ្ឋាភិបាលកម្ពុជាដាក់ចេញនូវគោលដៅរួមគ្នា ស្របតាមអាទិភាពដែលបានឯកភាពគ្នា និងរឹតចំណងភាពជាដៃគូកាន់តែស៊ីជម្រៅបន្ថែមទៀត ។
យោងតាមសេចក្តីប្រកាសព័ត៌មានរបស់សហភាពអឺរ៉ុបបានឲ្យដឹងថា ទំនាក់ទំនងរវាងសហភាពអឺរ៉ុប និងកម្ពុជាដែលបានចាប់ផ្តើម កាលពីដើមទសវត្សរ៍១៩៩០ មានវឌ្ឍនភាពយ៉ាងច្រើនចាប់តាំងពីការបើកការិយាល័យប្រតិភូសហភាពអឺរ៉ុបប្រចាំទីក្រុងភ្នំពេញកាលពីដើមទសវត្សរ៍២០០០ កន្លងមក ។ ក្នុងប្រទេសកម្ពុជាគម្រោងផ្តួចផ្តើមក្នុងវិស័យផ្សេងៗដែល ទទួលបានថវិកាគាំទ្រពីសហភាពអឺរ៉ុបចាប់ពីវិស័យអប់រំ និងកសិកម្មរហូតដល់ការគ្រប់គ្រង ហិរញ្ញវត្ថុ សាធារណៈ និងការផ្តល់ជំនួយពាក់ព័ន្ធនឹងពាណិជ្ជកម្ម បានផ្តល់ប្រយោជន៍ដល់ ប្រជាពលរដ្ឋកម្ពុជារាប់លាននាក់ ។
ផ្តើមពីកិច្ចសហប្រតិបត្តិការនោះសហភាពអឺរ៉ុបបានគាំទ្រដល់កិច្ចខិតខំប្រឹងប្រែងរបស់ប្រទេសកម្ពុជាក្នុងដំណើរឆ្ពោះទៅសម្រេចការអភិវឌ្ឍប្រកបដោយចីរភាព និងសមធម៌តាមរយៈជំនួយឥតសំណងដែលត្រូវបានរៀបចំឡើង ដើម្បីជួយអនុវត្តគោលនយោបាយនានា របស់រាជរដ្ឋាភិបាលកម្ពុជា ៖ ដោយកម្មវិធីនានារបស់សហភាពអឺរ៉ុបត្រូវបានរៀបចំឡើងស្របតាមអាទិភាព និងយុទ្ធសាស្ត្ររបស់រដ្ឋាភិបាលកម្ពុជា ។
សេចក្តីប្រកាសព័ត៌មានបានបញ្ជាក់បន្ថែមថា ជំនួយអភិវឌ្ឍន៍ដែលសហភាពអឺរ៉ុបផ្តល់ដល់ប្រទេសកម្ពុជាបច្ចុប្បន្នមានចំនួនសរុប៤១០លានអឺរ៉ូ ក្នុងរូបភាពជាកិច្ចសហប្រតិបត្តិការទ្វេភាគីពីឆ្នាំ២០១៤-២០២០ និងថវិកាជាច្រើនផ្សេងទៀតក្នុងខ្ទង់ថវិកាតាមវិស័យ ។
ចំណែកយុទ្ធសាស្ត្រស្តីពីកិច្ចសហប្រតិបត្តិការអភិវឌ្ឍន៍របស់អឺរ៉ុបសម្រាប់ប្រទេសកម្ពុជា ២០១៤-២០១៨ ដាក់ចេញនូវចក្ខុវិស័យរយៈពេលវែងរួមគ្នាសម្រាប់កិច្ចសហប្រតិបត្តិការអភិវឌ្ឍន៍របស់ដៃគូអឺរ៉ុបក្នុងប្រទេសកម្ពុជា និងគូសបញ្ជាក់សារជាថ្មីពីការប្តេជ្ញាចិត្តរបស់ដៃគូទាំងនេះក្នុងការគាំទ្រ និងឆ្លើយតបចំពោះតម្រូវការរបស់ប្រទេសកម្ពុជាដូចដែលត្រូវបានដាក់ចេញដោយរាជរដ្ឋាភិបាលកម្ពុជា ៕
ចែករំលែកព័តមាននេះ