រាជធានីភ្នំពេញ ៖ នគរបាលខណ្ឌដង្កោធ្វើការស្រាវជ្រាវចាប់ខ្លួនជនសង្ស័យ ដែលប្រព្រឹត្តបទល្មើសលួចទ្រព្យសម្បត្តិតាមផ្ទះបានចំនួន៨នាក់ជាបន្តបន្ទាប់ កាលពីថ្ងៃទី៤ ខែវិច្ឆិកា នៅភូមិម័ល សង្កាត់ដង្កោ និងនៅភូមិរកាកុះ សង្កាត់ព្រៃ.ស…
រាជធានីភ្នំពេញ ៖ នគរបាលខណ្ឌដង្កោធ្វើការស្រាវជ្រាវចាប់ខ្លួនជនសង្ស័យ ដែលប្រព្រឹត្តបទល្មើសលួចទ្រព្យសម្បត្តិតាមផ្ទះបានចំនួន៨នាក់ជាបន្តបន្ទាប់ កាលពីថ្ងៃទី៤ ខែវិច្ឆិកា នៅភូមិម័ល សង្កាត់ដង្កោ និងនៅភូមិរកាកុះ សង្កាត់ព្រៃ.ស ខណ្ឌដង្កោ ។ មន្ត្រីនគរបាលឱ្យដឹងថា បទល្មើសទី១ គឺសកម្មភាពលួចមានស្ថានទម្ងន់ទោស បង្កឡើងដោយជនសង្ស័យ១ក្រុមមានគ្នា៣នាក់ បានធ្វើសកម្មភាពគាស់ទ្វារតូបជួសជុលនិងលក់គ្រឿងអគ្គិសនីមួយកន្លែង លួចយកបានម៉ូតូហុងដាស្គូពី ស៊េរីឆ្នាំ២០១៦មួយគ្រឿង ពណ៌ក្រហម ពាក់ផ្លាកលេខភ្នំពេញ ១FX-៨៩៥១ ។
ហេតុការណ៍នេះ កើតឡើងកាលពីថ្ងៃទី១៤ ខែតុលាកន្លងទៅ វេលាម៉ោង២ និង៣០នាទីរសៀល ដែលតូបជួសជុលនិងលក់គ្រឿងអគ្គិសនីខាងលើ ស្ថិតនៅតាមផ្លូវលេខ២១៧ ក្នុងភូមិម័ល សង្កាត់ដង្កោ ខណ្ឌដង្កោ ។ ម្ចាស់តូបឈ្មោះ វ៉ាន់ឈី សុធា ភេទប្រុស អាយុ២៩ឆ្នាំ ស្នាក់នៅកន្លែងកើតហេតុខាងលើ ។ ចំណែកជន សង្ស័យទាំង៣នាក់នោះមាន ១-ឈ្មោះ ឈុន រ៉ាវី ហៅពៅ អាយុ១៨ឆ្នាំ ២-ឈ្មោះ មាស វុត្ថា ហៅទ្រី ភេទប្រុស អាយុ១៨ឆ្នាំ និង៣-ឈ្មោះ សាន ពិសី ហៅឆីង អាយុ១៨ឆ្នាំ ទាំង៣នាក់មានទីលំនៅក្នុងភូមិខាងលើដែរ ។
ប្រភពដដែលបន្តថា កាលពីថ្ងៃទី៥ ខែតុលា វេលាម៉ោង៧និង៣០នាទីព្រឹក ជនរងគ្រោះបានបិទទ្វារផ្អាកការលក់ដូរ រួចចាកចេញទៅលេងស្រុកកំណើតនៅឯភូមិគងជ័យ ឃុំគងជ័យ ស្រុកអូររាំងឪ ខេត្តត្បូងឃ្មុំ ។ រហូតដល់ថ្ងៃទី១៧ ខែតុលា ឆ្នាំ២០១៨ វេលាម៉ោង៧ និង៣០នាទីយប់ ទើបត្រឡប់ពីស្រុកកំណើតមកដល់ផ្ទះវិញ ស្រាប់តែឃើញទ្វារផ្ទះខាងមុខរបើក និងបាត់ម៉ូតូក៏បានទៅដាក់ពាក្យបណ្តឹងសុំឲ្យនគរបាលជួយអន្តរាគមន៍ ។
បន្ទាប់មក លោកវរសេនីយ៍ឯក ជឹម ស៊ីថា អធិការនគរបាលខណ្ឌ បានដឹកនាំបញ្ជាកម្លាំងនគរបាលខណ្ឌធ្វើការស្រាវជ្រាវរហូតដល់ថ្ងៃទី៤ ខែវិច្ឆិកា វេលាម៉ោង៣រសៀល ទើបឃាត់ខ្លួនបានទាំង៣នាក់ រួចនាំទៅធ្វើការសាកសួរ ។ ជនសង្ស័យសារភាពថា ពួកគេពិតជាបានធ្វើសកម្មភាពលួចគាស់សោទ្វារតូបលួចយកម៉ូតូខាងលើនោះមែន រួចយកទៅលក់នៅម្ដុំផ្សារឃ្លាំងរំសេវ ក្នុងសង្កាត់ទឹកល្អក់ទី៣ ខណ្ឌទួលគោក បានលុយចំនួន២០០ដុល្លារ និងនាំគ្នាផឹកស៊ី ព្រមទាំងទិញថ្នាំញៀនជក់អស់ហើយ ។
ដោយឡែក បទល្មើសទី២ ជាសកម្មភាពលួចម៉ូតូបង្កឡើងដោយជនសង្ស័យ២នាក់ កើតឡើងកាលពីវេលាម៉ោង១០យប់ថ្ងៃទី២ ខែវិច្ឆិកា នៅចំណុចផ្ទះជួល ស្ថិតតាមផ្លូវបេតុង ក្នុងភូមិម័លដែរ ។ ជនសង្ស័យ២នាក់ត្រូវបានចាប់ខ្លួនដែលម្នាក់ឈ្មោះ កើត ម៉ាគ្រឌី ហៅទូច អាយុ៣០ឆ្នាំ និងម្នាក់ទៀតឈ្មោះ អាន សុធារ៉ា អាយុ២៨ឆ្នាំ ស្នាក់នៅជាមួយគ្នានៅផ្ទះគ្មានលេខ ក្នុងភូមិម័ល ។
ជនសង្ស័យបានលួចយកម៉ូតូ១គ្រឿងម៉ាក MSX ពណ៌សខ្មៅ ពាក់ផ្លាកលេខ ភ្នំពេញ ១DD-៥៧៣០ លេខតួនិងលេខម៉ាស៊ីន១៥០១៣៨៩ ខណៈជនរងគ្រោះទុកនៅមុខផ្ទះដោយចាក់សោ.ក និងសោបូមមុខត្រឹមត្រូវ ។ ម៉ូតូនោះគឺជាកម្មសិទ្ធិរបស់ឈ្មោះ ហ៊ុយ ហួ អាយុ២៦ឆ្នាំ មុខរបរជាងដែក ស្នាក់នៅបន្ទប់ជួលក្នុងភូមិខាងលើ ។
ក្រោយពេលលួចបាន ពួកគេយកទៅបញ្ចាំនៅម្ដុំផ្សារឃ្លាំងរំសេវ ក្នុងសង្កាត់ទឹកល្អក់ទី៣ខណ្ឌទួលគោក បានលុយចំនួន១០០ដុល្លារ រួចនាំគ្នាផឹកស៊ីអស់ ។ ចំណែកម្ចាស់ម៉ូតូបានដាក់ពាក្យបណ្ដឹងឲ្យនគរបាលជួយអន្តរាគមន៍ ហើយលោកវរសេនីយ៍ឯក ជឹម ស៊ីថា អធិការនគរបាលខណ្ឌ បានធ្វើការស្រាវជ្រាវរហូតដល់ថ្ងៃទី៤ ខែវិច្ឆិកា ទើបចាប់ខ្លួនជនសង្ស័យទាំង២នាក់នោះបាន ។
ប្រភពខាងលើឲ្យដឹងទៀតថា បទល្មើសទី៣ គឺសកម្មភាពលួចដែកថ្នាំងអំពៅដែលមានតម្លៃជាង១ពាន់ដុល្លារ បង្កឡើងដោយជនសង្ស័យ៣នាក់ កាលពីវេលាម៉ោង៩និង៣០នាទីយប់ថ្ងៃទី២៧ ខែតុលា ឆ្នាំ២០១៨ នៅមុខផ្ទះមួយក្នុងភូមិរកាកុះ សង្កាត់ព្រៃស ខណ្ឌដង្កោ ។ ជនរងគ្រោះជាម្ចាស់ដែកឈ្មោះ ពាង
ជាវ័ន្ដ ភេទប្រុស អាយុ២៧ឆ្នាំ មុខរបរជាងក្រឡឹង មានទីលំនៅភូមិរកាកុះ សង្កាត់ព្រៃស ខណ្ឌដង្កោ ។
ចំណែកជនសង្ស័យទាំង៣នាក់មាន ១-ឈ្មោះ គីម ពន្លឺ ហៅហេង អាយុ២០ឆ្នាំ មានទីលំនៅក្នុងភូមិព្រៃទីទុយ សង្កាត់ព្រៃស ខណ្ឌដង្កោ ២-ឈ្មោះ ធឿន ចំរើន អាយុ១៨ឆ្នាំ មានទីលំនៅក្នុងភូមិរកាកុះ សង្កាត់ព្រៃស និង៣-ឈ្មោះ សំ មីនា អាយុ១៨ឆ្នាំ មានទីលំនៅក្នុងភូមិរកាកុះ សង្កាត់ព្រៃស ខណ្ឌដង្កោ ។
ប្រភពដដែលបន្តថា មុនពេលកើតហេតុជនរងគ្រោះបានទៅទិញដែកថ្នាំងអំពៅទំហំ៣២លីចំនួន៣២ដើម សរុបជាទឹកប្រាក់ចំនួន១២៨០ដុល្លារអាមេរិក ទៅទុកនៅខាងមុខផ្ទះរបស់ខ្លួន ។ ខណៈនោះជនសង្ស័យបានទៅយកអស់ចំនួន២៧ដើម សរុបជាទឹកប្រាក់ចំនួន១.០៨០ដុល្លារ ។ ក្រោយពីដឹងថាបាត់ដែក ជនរងគ្រោះបានទៅដាក់ពាក្យប្ដឹងសុំឲ្យនគរបាលខណ្ឌដង្កោជួយអន្តរាគមន៍ ខណៈនោះនគរបាលខណ្ឌដឹកនាំដោយលោកវរសេនីយ៍ឯក ជឹម ស៊ីថា អធិការនគរបាលខណ្ឌ បានស្រាវជ្រាវរហូតដល់ថ្ងៃទី៤ ខែវិច្ឆិកា
ទើបចាប់ខ្លួនបាន ។
នៅពេលសាកសួរជនសង្ស័យសារភាពថា ពិតជាបានលួចដែកនោះមែន និងយកទៅលក់នៅឃ្លាំងអេតចាយ តាមផ្លូវ៣០ម៉ែត្រ ក្នុងភូមិព្រៃធំ សង្កាត់ព្រៃស ខណ្ឌដង្កោ បានលុយចំនួន៨០.០០០រៀល ហើយនាំ
គ្នាយកទៅផឹកស៊ីអស់ហើយ ៕
ចែករំលែកព័តមាននេះ