រាជធានីភ្នំពេញ ៖ ជនសង្ស័យម្នាក់ក្នុងចំណោមពីរនាក់ត្រូវបានប្រជាពលរដ្ឋចាប់ប្រគល់ឲ្យសមត្ថកិច្ចបន្ទាប់ពីសកម្មភាពឆក់ទូរស័ព្ទដៃមួយគ្រឿងពីនារីពីរនាក់បងប្អូន បង្កឲ្យមានការភ្ញាក់ផ្អើលឡើងកាលពីវេលាម៉ោង៩និង២០នាទីយប់ថ្ងៃទី៥ ខែវិច្ឆិកា ឆ្នាំ២០១៨ ត្រង់ចំណុចខាងក្រោយវិទ្យាល័យជាស៊ីមសាមគ្គីប្រមាណ១០០ម៉ែត្រ តាមបណ្តោយផ្លូវ៦៦៤ ស្ថិតក្នុងសង្កាត់បឹងសាឡាង ខណ្ឌទួលគោក។
ជនសង្ស័យឈ្មោះ លី វ៉ាន់ណាត ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅសង្កាត់ទឹកថ្លា ខណ្ឌសែនសុខ។ ចំណែកនារីរងគ្រោះឈ្មោះ ឯម ស្រីណុត អាយុ២៦ឆ្នាំ ។
តាមសម្តីនារីរងគ្រោះជាបងបានឲ្យដឹងថា នៅមុនពេលកើតហេតុ គាត់និងប្អូនស្រីបានជិះម៉ូតូមួយគ្រឿងម៉ាក ធូដេ ពណ៌កាប់ស្តាំង ពាក់ស្លាកលេខ ភ្នំពេញ១GM-៦៥៥១ ដែលទើបតែជិះចេញមកពីញ៉ាំភីហ្សានៅខាងមុខវិទ្យាល័យជាស៊ីម សាមគ្គី គោលបំណងជិះត្រឡប់ទៅផ្ទះវិញនៅក្បែរនិងកន្លែងកើតហេតុ ដោយធ្វើដំណើរតាមបណ្តោយផ្លូវ៦៦៤ ក្នុងទិសដៅពីត្បូងទៅជើង។
លុះមកដល់ចំណុចកើតហេតុក៏ស្រាប់តែលេចមុខជនសង្ស័យខាងលើ និងបក្សពួកជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៨ មិនចាំស្លាកលេខ។ ជិះមកពីក្រោយហើយក៏បានធ្វើសកម្មភាពឆក់ទូរស័ព្ទដៃមួយគ្រឿងម៉ាកអាយហ្វូនសិចភ្លើស ពីជនរងគ្រោះជាប្អូនស្រី បានសម្រេច ហើយព្យាយាមជិះរត់គេចខ្លួន។
ភ្លាមៗនោះជនរងគ្រោះក៏ស្រែកឆោឡោ បង្កឲ្យជនសង្ស័យខាងលើភ័យស្លន់ស្លោក៏ជិះម៉ូតូទៅបុកនឹងរថយន្តមិនចាំម៉ាកមួយគ្រឿង បណ្តាលឲ្យដួលម៉ូតូរបស់ជនសង្ស័យ ហើយក៏ត្រូវបានប្រជាពលរដ្ឋដែលឃើញហេតុការណ៍នៅក្បែរនោះបានចេញមកជួយចាប់បានជនសង្ស័យខាងលើដែលជាអ្នកអង្គុយខាងក្រោយ និងជាអ្នកធ្វើសកម្មភាពឆក់ទូរស័ព្ទដៃខាងលើ។
ដោយឡែកបក្សពួកម្នាក់ទៀត បានលើកម៉ូតូជិះរត់គេចខ្លួនបាត់ស្រមោល ដោយបន្សល់ទុកជនសង្ស័យនៅកន្លែងកើតហេតុក៏ត្រូវប្រជាពលរដ្ឋស្វាគមន៍ម្នាក់មួយដៃមួយជើងបណ្តាលឲ្យហើមមុខ ហើយប្រគល់ទៅឲ្យសមត្ថកិច្ចមូលដ្ឋាននាំខ្លួនយកទៅសួរនាំ។
ក្រោយពេលកើតហេតុ ជនសង្ស័យខាងលើរួមទាំងវត្ថុតាងត្រូវបានសមត្ថកិច្ចប៉ុស្តិ៍នគរបាលរដ្ឋបាលបឹងសាឡាងធ្វើការសាកសួរនាំ និងកសាងសំណុំរឿងបញ្ជូនខ្លួនទៅអធិការដ្ឋាននគរបាលខណ្ឌទួលគោករង់ចាំធ្វើការចាត់ការទៅតាមនីតិវិធី ៕
ចែករំលែកព័តមាននេះ