រាជធានីភ្នំពេញ ៖ លោកគង់ គាំ អតីតមន្ត្រីជាន់ខ្ពស់គណបក្សប្រឆាំងដែលធ្លាប់តែងតែរិះគន់រាជរដ្ឋាភិបាលមិនញញើតបានប្តូរជំហរគោលនយោបាយ១៨០ដឺក្រេ និងថាមិនមែនជាបក្សប្រឆាំងទៀតទេ ។ លោក គង់ គាំ…
រាជធានីភ្នំពេញ ៖ លោកគង់ គាំ អតីតមន្ត្រីជាន់ខ្ពស់គណបក្សប្រឆាំងដែលធ្លាប់តែងតែរិះគន់រាជរដ្ឋាភិបាលមិនញញើតបានប្តូរជំហរគោលនយោបាយ១៨០ដឺក្រេ និងថាមិនមែនជាបក្សប្រឆាំងទៀតទេ ។
លោក គង់ គាំ បានសរសេរលើបណ្តាញសង្គមនៅថ្ងៃទី៦ វិច្ឆិកា ឆ្នាំ២០១៨ថា ថ្មីៗចុងក្រោយនេះមានព្រឹត្តិការណ៍ដែលអតីតមេដឹកនាំ CNRP និងអ្នកមានទំនោរស្របគ្នាបានលើកអំពីការប្តូរជំហរនយោបាយ១៨០ដឺក្រេរបស់ខ្ញុំ ដែលជាអតីតមេដឹកនាំប្រឆាំង ។ លោកបញ្ជាក់ថា« ទាំងកាលវេលាទាំងកាយវិការបន្តបន្ទាប់ដូចបានបញ្ជាក់កន្លងមកថា រូបខ្ញុំមិនមែនជាមេដឹកនាំ CNRP អ្វីនោះទេ ។ បើមិនជាប់បម្រាមទាំងគ្មានកំហុសទេ ខ្ញុំជាពលរដ្ឋខ្មែរដូចប្រជាពលរដ្ឋខ្មែរគ្រប់រូបដែលមានសិទ្ធិឈរឈ្មោះឲ្យគេបោះឆ្នោត និងមានសិទ្ធិបោះឆ្នោតតាមការយល់ឃើញរបស់ខ្ញុំ» ។ លោកបន្តថា ពលរដ្ឋរូបណាក៏គិតពីសន្តិសុខរូបកាយ ទ្រព្យសម្បត្តិ និងការងារផ្ទាល់ខ្លួនដូចៗគ្នា មិនមែនជាការរណេបរណបលំអិតលំអោនអ្វីនោះឡើយ ។
លោកគូសបញ្ជាក់ថា«ខ្ញុំជឿហើយ ឆ្មាដែលធ្លាប់រលាកទឹកក្តៅវាខ្លាចទាំងទឹកត្រជាក់ផងដែរ ។ ដូចគ្នានេះមនុស្សធ្លាប់ស៊ិបស៊ុប ដើម្បីមុខមាត់បុណ្យសក្តិ និងលាភសក្ការៈខ្លួនឯងតែងស្រមើស្រម៉ៃថា គេក៏ដូចជាខ្លួនដែរ» ។ លោក គង់គាំក៏បានលើកឡើងថា លិកសុខ ឥសាន អ្នកនាំពាក្យគណបក្សប្រជាជនកម្ពុជាក៏ដូចថ្នាក់ដឹកនាំ CPP ជាច្រើនតែងរាប់អានខ្ញុំជាគ្នាគេដដែលដូចធ្លាប់រួមរស់ជាមួយគ្នាពីគ្រាដើម (ខ្ញុំអរគុណ) ប៉ុន្តែការប្រើភាសាថា ខ្ញុំជាភ្នាក់ងារសម្ងាត់ CIA របស់ CPP នៅក្នុងគណបក្សប្រឆាំងគួរតែជាពាក្យរបស់ថ្នាក់ដឹកនាំគណបក្សប្រឆាំងទេដែលត្រូវហៅខ្ញុំដូចនេះ ។ លោកបន្ថែមថា «ការពិតជាហូរហែរមកក៏មានមជ្ឈដ្ឋានផ្ទៃក្នុងគណបក្សប្រឆាំងមួយចំនួនតូចបំផុតដែលសង្ស័យមមៃគិតថា ខ្ញុំជាមនុស្សបង្កប់របស់ CPP តែមជ្ឈដ្ឋានទូលំទូលាយជាអាទិ៍ មេដឹកនាំកំពូលរបស់គណបក្សប្រឆាំងមិនដែលមន្ទិលសៅហ្មងអំពីរូបខ្ញុំម្តងណាទេ» ។
លោកលើកឡើងទៀតថា ច្បាស់ខ្លាំងណាស់មេដឹកនាំកំពូលរបស់គណបក្សប្រជាជនកម្ពុជាបានស្គាល់បានយល់ពីខ្ញុំគ្មានចន្លោះទេ គឺធ្វើអ្វីៗទៅតាមឧត្តមគតិសម្បជញៈមនសិការបស់ខ្ញុំផ្ទាល់តែប៉ុណ្ណោះ ។ ទាំងមេដឹកនាំគណបក្សប្រឆាំង (លោក សម រង្ស៊ី) ទាំងមេដឹកនាំ CPP (សម្តេចហេង សំរិន សម្តេចជា ស៊ីម សម្តេចហ៊ុន សែន) សុទ្ធតែទទួលការបញ្ជាក់ជាលាយលក្ខអក្សររបស់ខ្ញុំថា ខ្ញុំជ្រើសយកឧត្តមគតិប្រជាធិបតេយ្យសេរីពហុបក្សដែលស្មារតីកិច្ចព្រមព្រៀងទីក្រុងប៉ារីស និងរដ្ឋធម្មនុញ្ញព្រះរាជាណាចក្រកម្ពុជាបានបើកផ្លូវ ។
ថ្នាក់ដឹកនាំគណបក្សឆន្ទៈខ្មែរដែលមានកូនប្រុសខ្ញុំជាប្រធានក្រោយការបោះឆ្នោតថ្ងៃទី២៩ ខែកក្កដា ឆ្នាំ២០១៨ បានសម្រេចផ្តល់កិត្តិយសជូនលោកស្រី សៀក អយ (គង់គាំ) ជាព្រឹទ្ធស្ថាបនិករបស់គណបក្សឆន្ទៈខ្មែរ ព្រោះបានផ្តល់ទីស្នាក់ការ និងថវិកា ដើម្បីការចាប់បដិសន្ធិ និងចូលរួមការបោះឆ្នោតជាប្រវត្តិសាស្ត្រដោយជោគជ័យ ។ ជាមួយគ្នានោះដែរលោក គង់ គាំ ក៏បានគូសបញ្ជាក់ថា«ខ្ញុំសូមឲ្យបរទេស និងអ្នកនយោបាយដែលគោរពស្មារតីកិច្ចព្រមព្រៀងទីក្រុងប៉ារីស និងគោរពរដ្ឋធម្មនុញ្ញ ប៉ុន្តែហៅការបោះឆ្នោត៥ឆ្នាំម្តងយ៉ាងទៀងទាត់ ហើយហៅប្រជាពលរដ្ឋម្ចាស់ឆ្នោតថាក្លែងក្លាយ គឺជាការបំផ្លាញកិច្ចព្រមព្រៀងទីក្រុងប៉ារីស និងរដ្ឋធម្មនុញ្ញដោយខ្លួនឯងទៅវិញទេ»៕
ចែករំលែកព័តមាននេះ