រាជធានីភ្នំពេញ ៖ ស្ត្រីម្នាក់បានជិះម៉ូតូចេញពីផ្សារទិញបន្លែនិងសាច់ ត្រឡប់ទៅផ្ទះវិញ ជិតដល់ពាក់
កណ្ដាលផ្លូវ ក៏ស្រាប់តែមានបុរសជាជនសង្ស័យម្នាក់បានធ្វើសកម្មភាពឆក់យកកាបូបស្ពាយពីស្ត្រីរូបនោះមិនបានសំរេច ហើយត្រូវបានស្ត្រីរងគ្រោះជិះម៉ូតូបំបុកបណ្តាលអោយដួលម៉ូតូទាំងពីរគ្រឿង ចំណែកជនសង្ស័យភ័យពេកក៏បានរត់គេចខ្លួនដោយបន្សល់ទុកម៉ូតូមួយគ្រឿងនៅកន្លែងកើតហេតុ ។
ហេតុការណ៍ខាងលើបានកើតឡើងកាលពីវេលាម៉ោង៤និង៣នាទីទៀបភ្លឺថ្ងៃទី ៦ ខែវិច្ឆិកា ឆ្នាំ២០១៨ ជិតនិងស្ពានអាកាសស្ទឹងមានជ័យ ផ្លូវព្រះមុនីរ៉េត សង្កាត់ស្ទឹងមានជ័យ១ ខណ្ឌមានជ័យ ។
ស្ត្រីរងគ្រោះឈ្មោះ ទិត ដាវ៉ាន់ អាយុ៤៨ឆ្នាំ មុខរបរលក់បាយមុខរោងចក្រ ស្នាក់នៅភូមិព្រែកធំ សង្កាត់ព្រៃស ខណ្ឌដង្កោ ជិះម៉ូតូម៉ាកហុងដាឌ្រីម ស៊េរីឆ្នាំ២០០៦ ពណ៌ខ្មៅ ពាក់ស្លាកលេខ កណ្តាល ១J-២៤៤៦ ។ ចំណែកម៉ូតូរបស់ជនសង្ស័យ ម៉ាកសង់ប៊ិច ពណ៌ខ្មៅ ពាក់ស្លាកលេខ កំពង់ឆ្នាំង ១C-៦១៧៩ ។
តាមសម្តីស្ត្រីរងគ្រោះ បានអោយដឹងថា មុនពេលកើតហេតុ គាត់បានជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ចេញពីទិញបន្លែនិងសាច់នៅផ្សារដើមគ ក្នុងគោលបំណងត្រឡប់ទៅផ្ទះវិញ នៅសង្កាត់ព្រៃស ខណ្ឌដង្កោ ដោយបានធ្វើដំណើរតាមផ្លូវព្រះមុនីរ៉េត ក្នុងទិសដៅ ពីកើតទៅលិច ។
លុះមកដល់ចំណុចកើតហេតុ ក៏ស្រាប់តែលេចមុខជនសង្ស័យម្នាក់ បានជិះម៉ូតូមួយគ្រឿងម៉ាកសង់ប៊ិច ពណ៌ខ្មៅ មួយគ្រឿង មកធ្វើសកម្មភាពឆក់យកកាបូបស្ពាយពីគាត់ តែមិនបានសំរេចនោះទេ ភ្លាមៗនោះដែរ គាត់បានបន្ថែមល្បឿនបំបុកម៉ូតូជនសង្ស័យពីក្រោយ បណ្តាលអោយដួលម៉ូតូទាំងពីរគ្រឿង និងធ្វើអោយគាត់រងរបួសរលាត់ដៃរលាត់ជើងតិចតួច ចំណែកជនសង្ស័យភ័យស្លន់ស្លោក៏បានរត់គេចខ្លួន ដោយបន្សល់ទុកម៉ូតូមួយគ្រឿងនៅកន្លែងកើតតែម្តង ។ នៅក្នុងកាបូបរបស់គាត់ គឺអត់មានលុយនោះទេ ដោយសារតែគាត់ទិញបន្លែ និងសាច់អស់ហើយ ។
ក្រោយពេលកើតហេតុ ឃើញមានកម្លាំងសមត្ថកិច្ច ប៉ុស្តិ៍នគរបាលស្ទឹងមានជ័យ១ បានចុះទៅដល់កន្លែងកើតហេតុ រួចហើយក៏បាន នាំជនរងគ្រោះ ព្រមទាំងម៉ូតូរបស់ជនសង្ស័យ យកទៅសាកសួរនិងដាក់ពាក្យបណ្តឹងនៅប៉ុស្តិ៍នគបាលស្ទឹងមានជ័យ១ ដើម្បីកំណត់មុខសញ្ញា ៕
ចែករំលែកព័តមាននេះ