រាជធានីភ្នំពេញ ៖ តាមប្រភពព័ត៌មានច្បាស់ការណ៍ពីក្រុមអាណាព្យាបាលរបស់សិស្សនៃសាលាបឋមសិក្សាភូមិឫស្សី ស្ថិតក្នុងសង្កាត់ស្ទឹងមានជ័យទី២ ខណ្ឌមានជ័យ បានអោយដឹងថា មួយរយៈធំកន្លងមកនេះ ក្រុមគ្រូៗប្រុសស្រីនៃសាលាខាងលើ បានយកប្រាក់ថ្លៃសិក្សាក្នុងមួយថ្ងៃសិស្សម្នាក់១០០០រៀលពីកូនៗរបស់ពួកគាត់ មិនថាកូនពួកគាត់ជាអ្នកធូរធារ ឬមានក្រនោះឡើយ ។
ប្រភពព័ត៌មានស្និទ្ធិស្នាលដែលកោះសន្តិភាពទទួលបានពីក្រុមអាណាព្យាបាលសិស្ស ដែលសុទ្ធតែជាសិស្សក្រីក្រអោយដឹងថា ជារៀងរាល់ថ្ងៃកូនៗរបស់ពួកគាត់ទៅរៀន គឺគ្រូតម្រូវអោយបង់ប្រាក់ចំនួន១០០០រៀល ប្រចាំថ្ងៃ ឬក៏អាចបង់ជាខែក៏បាន គឺ៥ដុល្លារ ប៉ុន្តែការតម្រូវអោយកូនសិស្សបង់ប្រាក់សម្រាប់ការរៀនសូត្រច្រើនបែរនេះ គឺជាការដាក់គំនាប និងជាការធ្វើបាបដល់កូនសិស្សក្រីក្រ ដែលពួកគេពុំមានលទ្ធភាពច្រើនក្នុងការចំណាយសម្រាប់ការរៀនសូត្រប្រចាំថ្ងៃ ព្រោះតែកត្តាជីវភាពក្នុងគ្រួសារ គឺមានភាពតោកយ៉ាកលំបាកបំផុត ដែលខ្លះកូនដល់ទៅពីរបីនាក់ ។
ប្រភពព័ត៌មានអោយដឹងថា សម្រាប់កូនសិស្សថ្នាក់ទី១ គឺគ្រូតម្រូវអោយបង់៥០០រៀល ចំណែកគិតចាប់ពីថ្នាក់ទី២ ដល់ថ្នាក់ទី៦ គឺតម្រូវអោយបង់១០០០រៀល ក្នុងមួយថ្ងៃ ។
ស្ត្រីជាអ្នកលក់លៀសហាលតាមចិញ្ចើមផ្លូវម្នាក់សុំមិនបញ្ចេញឈ្មោះអោយដឹងថា កូនៗរបស់គាត់២នាក់ ដែលជាសិស្សអង្គការរៀននៅក្នុងសាលាខាងលើ ដែលសិស្សអង្គការនេះ គឺមិនតម្រូវអោយបង់ថវិកាសម្រាប់ការរៀនសូត្រទៅកាន់គ្រូៗនោះទេ ព្រោះខាងអង្គការជាអ្នកចំណាយថវិការអោយរួចទៅហើយ ប៉ុន្តែក្រុមគ្រូៗនៅតែបន្តយកប្រាក់ពីកូនៗរបស់គាត់ដដែល រហូតទាល់តែខាងតំណាងអង្គការចុះមកសួរនាំ ទើបក្រុមគ្រូៗទាំងនោះបញ្ឈប់ការយកប្រាក់ប្រចាំថ្ងៃពីកូនៗរបស់គាត់ ។
ជុំវិញបាតុភាពខាងលើនេះ នាយកសាលាបឋមសិក្សាភូមិឫស្សីខាងលើបានឆ្លើយប្រាប់កោះសន្តិភាព អោយដឹងថា ចំពោះបញ្ហានៃការយកលុយប្រចាំថ្ងៃពីកូនសិស្សនេះ លោកពុំបានដឹងឡើយ ប៉ុន្តែកន្លងមកលោកធ្លាប់បានប្រជុំណែនាំក្រុមគ្រូៗទាំងអស់ គឺមិនអោយមានការយកលុយពីកូនសិស្សលើស៥០០រៀលឡើយ ហើយក្នុងនោះសម្រាប់សិស្សក្រីក្រីជួបការលំបាកខ្លាំង ឬកូនសិស្សរបស់អង្គការ ក៏ពុំតម្រូវអោយមានការយកលុយពីពួកគាត់ផងដែរ ប៉ុន្តែប្រសិនបើមានការធ្វើអ្វីមួយផ្ទុយពីអ្វីដែលលោកធ្លាប់ណែនាំនោះ គឺលោកពុំដឹងឡើយ ដោយលោកនិយាយយ៉ាងខ្លីថា គឺក្រុមគ្រូៗយកលុយពីកូនសិស្សហើយលាក់បាំងព័ត៌មានមិនអោយលោកដែលជានាយកសាលាបានដឹង ។
សូមបញ្ជាក់ថា បើតាមការអះអាងអោយដឹង ពីក្រុមអាណាព្យាបាលសិស្ស គឺបាតុភាពនេះ កើតមានឡើងមកជាយូរហើយ តែមិនដែលមានការកែប្រែណាមួយពីថ្នាក់ដឹកនាំសាលាសោះ។ ពួកគាត់បញ្ជាក់ថា ប្រាក់ចំនួន១០០០រៀលសម្រាប់ការរៀនសូត្រប្រចាំថ្ងៃ គឺវាមិនច្រើននោះឡើយ សម្រាប់កូនសិស្ស ដែលជាកូនអ្នកមានជីវភាពធូរធារក្នុងសង្គម ប៉ុន្តែផ្ទុយទៅវិញប្រសិនបើ សម្រាប់កូនអ្នកក្រីក្រ ក្រខ្សត់លំបាកតោក
យ៉ាកដូចពួកគាត់វិញ គឺពំុមានលិទ្ធភាពបង់ជូនលោកគ្រូអ្នកគ្រូឡើយ ព្រោះពួកគាត់ រកមួយថ្ងៃសម្រាប់រស់មួយថ្ងៃប៉ុណ្ណោះ មិនអាចមានសមត្ថភាពរកលុយអោយកូនបង់ជូនគ្រូច្រើនបែបនោះឡើយ ៕
ចែករំលែកព័តមាននេះ