សារព័ត៌មានបរទេសកាលពីពេលថ្មីៗកន្លងមកផ្សាយថា ប្ដីប្រពន្ធជនជាតិឥណ្ឌា ពេលថត «selfie» ក៏រអិលធ្លាក់ពីលើផ្ទាំងថ្មនៅក្នុងឧទ្យានជាតិ «Yosemite» សហរដ្ឋអាមេរិកបណ្តាលឲ្យស្លាប់ទាំង២នាក់ គឺលោកវីសានុ វីសាវ៉ាណាត(Vishnu Viswanath) អាយុ២៩ឆ្នាំ និងនាងមីណាស៊ី មូរ៉ាទី(Meenakshi Moorthy) ។
ប្តីប្រពន្ធនោះមានអាជីពជាអ្នកណែនាំទេសចរណ៍នៅតាមវ៉េបសាយបានស្លាប់បាត់បង់ជីវិតកាលពីពេល ថ្មីៗកន្លងមក ដោយធ្លាក់នៅចំណុចទស្សនាទេសភាពដ៏ល្បីពីលើផ្ទាំងថ្មក្នុងឧទ្យានជាតិអាមេរិក ដោយបរិវេណនោះគ្មានរបង ។
បុគ្គលិកនៅក្នុងឧទ្យានបញ្ជាក់ថាជនរងគ្រោះបានធ្លាក់ពីកម្ពស់២៤៥ ម៉ែត្រ ក្រុមជួយសង្គ្រោះត្រូវប្រើឧទ្ធម្ភាគចក្រក្នុងការជួយយកសាកសព ។ បច្ចុប្បន្នកំពុងស៊ើបអង្កេតមូលហេតុពីការស្លាប់។ បងប្រុសរបស់បុរសរងគ្រោះបញ្ជាក់ប្រាប់សារព័ត៌មាននៅឥណ្ឌាថា ប្អូនប្រុស និងប្អូនថ្លៃប្រហែលជាស្លាប់ក្នុងពេលព្យាយាមថត «selfie» នៅឯគែមថ្ម ។ ពួកគេទាំង២នាក់រស់នៅសហរដ្ឋអាមេរិក រមែងធ្វើទេសចរណ៍នៅទីតាំងនានាដើម្បីសរសេរពីរឿងរ៉ាវគួរឲ្យទស្សនានៅលើវ៉េបសាយ ។
របាយការណ៍បញ្ជាក់បន្ថែមថាអ្នកស្លាប់ពីការថត«សែលហ្វ៊ី» បច្ចុប្បន្នមានប្រហែល២៥៩នាក់នៅទូទាំងពិភពលោក ។ មូលហេតុដោយសារលង់ទឹក រថយន្តបុក និងធ្លាក់ពីទីខ្ពស់ ប៉ុន្តែនៅឥណ្ឌាមានចំនួន១៥៩នាក់ បន្ទាប់មករុស្ស៊ី អាមេរិក និងប៉ាគីស្ថាន ៕
ចែករំលែកព័តមាននេះ