ទីក្រុងវ៉ាស៊ីនតោន ៖ សហរដ្ឋអាមេរិកបាននិយាយកាលពីថ្ងៃសុក្រមកថា ពួកគេនឹងអនុញ្ញាតជាបណ្តោះអាសន្នឲ្យប្រទេសចំនួន៨បន្តការទិញប្រេងអ៊ីរ៉ង់ ពេលដែលសហរដ្ឋអាមេរិកចាប់ផ្តើមដាក់ទណ្ឌកម្មសេដ្ឋកិច្ចសាជាថ្មីលើអ៊ីរ៉ង់នៅថ្ងៃទី៥ វិច្ឆិកា នេះ ដើម្បីបង្ខំឲ្យប្រទេសនេះបោះបង់កម្មវិធីអាវុធនុយក្លេអ៊ែរចោល ។
មន្ត្រីថ្នាក់ខ្ពស់របស់អាមេរិកម្នាក់បាននិយាយថា ប្រទេសទាំង៨រួមមាន ជប៉ុន, ចិន, ឥណ្ឌា, តួកគី, អ៊ីតាលី, សហព័ន្ធអារ៉ាប់, តៃវ៉ាន និងកូរ៉េខាងត្បូង ។
រដ្ឋមន្ត្រីការបរទេស Mike Pompeo បាននិយាយថា ៖« ពួកយើងនឹងចេញសិទ្ធិបណ្ណោះអាសន្ននេះទៅកាន់ភាគីចំនួន៨ ព្រោះពួកគេបានកាត់បន្ថយការនាំចូលប្រេងជាច្រើន និងបានសហការក្នុងផ្នែកជាច្រើន រួមទាំងបានចេញវិធានការដ៏សំខាន់ដើម្បីកាត់បន្ថយការនាំចូលប្រេងឆៅដល់សូន្យថែមទៀត »។
ប្រទេសជប៉ុនបានស្ថិតក្នុងចំណោមប្រទេសដែលចង់បានការអនុគ្រោះពីការហាមឃាត់ការនាំចូលប្រេងពីអ៊ីរ៉ង់ ហើយប្រេងដែលនាំចូលពីអ៊ីរ៉ង់ ស្មើនឹង៥%នៃប្រេងនាំចូលសរុបរបស់ប្រទេសជប៉ុនផងដែរ ។
លោក Pompeo បានឲ្យដឹងទៀតថា មានប្រទេសចំនួនពីរ នឹងកាត់បន្ថយការនាំចូលប្រេងពីអ៊ីរ៉ង់ដល់កម្រិតសូន្យក្នុងរយៈពេលប៉ុន្មានសប្តាហ៍ខាងមុខនេះ ខណៈដែលប្រទេសចំនួន៦ទៀត នឹងកាត់បន្ថយការនាំចូលយ៉ាងខ្លាំង ។
យោងតាមប្រភពចំនួនពីររូបបានឲ្យដឹងថា ប្រទេសចិនដែលជាប្រទេសនាំមុខក្នុងផ្នែកនាំចូលប្រេងអ៊ីរ៉ង់នៅកំពុងតែចរចាជាមួយនឹងសហរដ្ឋអាមេរិកលើលក្ខខណ្ឌ ប៉ុន្តែនៅស្ថិតក្នុងចំណោមប្រទេសទាំង៨នេះដែរ ។
ជាមួយគ្នានេះផងដែរ អ្នកវិភាគបានឲ្យដឹងថា ការនាំចេញប្រេងរបស់អ៊ីរ៉ង់បានធ្លាក់ចុះពីប្រមាណ២,៥លានធុងក្នុងមួយថ្ងៃកាលពីខែមេសា មកស្មើនឹងប្រមាណ១,៦លានធុងប៉ុណ្ណោះក្នុងមួយថ្ងៃកាលពីខែតុលា ។
គួរបញ្ជាក់ផងដែរថា បន្ទាប់ពីដកសហរដ្ឋអាមេរិកចេញពីកិច្ចព្រមព្រៀងអាវុធនុយក្លេអ៊ែរអ៊ីរ៉ង់ឆ្នាំ២០១៥ លោកប្រធានាធិបតីដូណាល់ត្រាំ (Donald Trump) បានដាក់សម្ពាធលើសេដ្ឋកិច្ចដែលពឹងផ្អែកលើប្រេងរបស់អ៊ីរ៉ង់ និងបង្ខំឲ្យប្រទេសនេះបោះបង់កម្មវិធីអាវុធនុយក្លេអ៊ែរ និងកាំជ្រួចមីស៊ីលចោល និងបញ្ឈប់ការគាំទ្រដល់ក្រុមយោធានៅផ្នែកជាច្រើននៅមជ្ឈិមបូព៌ាជាដើម ។
ចាប់តាំងពីរដ្ឋាភិបាលក្រុងវ៉ាស៊ីនតោន បានប្រកាសដាក់ទណ្ឌកម្មជាលើកទី២កាលពីខែឧសភា លើអ៊ីរ៉ង់មក ការនាំចេញរបស់ប្រទេសនេះបានធ្លាក់ចុះជាបន្ដបន្ទាប់ ។ បើតាមរដ្ឋបាលព័ត៌មានថាមពលរបស់សហរដ្ឋអាមេរិក(EIA) បានរាយការណ៍ថា កាលពីខែកញ្ញាអ៊ីរ៉ង់នាំចេញប្រេងបានតែ១,៩លានធុងក្នុង១ថ្ងៃតែប៉ុណ្ណោះ ដែលជាការធ្លាក់ចុះក្នុងល្បឿនលឿន ។
សេចក្តីរាយការណ៍បានឲ្យដឹងថា ខណៈដែលប្រទេសជាច្រើនបន្តកាត់បន្ថយការនាំចូលប្រេងអ៊ីរ៉ង់ នាវាដឹកជញ្ជូនប្រេងមួយចំនួនរបស់អ៊ីរ៉ង់ត្រូវបានប្រើប្រាស់ជាកន្លែងស្តុកប្រេងលើទឹកវិញ ។
EIA ព្យាករណ៍ថា កំណើនផលិតកម្មប្រេងតាមប្រទេសក្នុងអង្គការនៃប្រទេសនាំចេញប្រេង (OPEC) អាចជំនួសប្រេងអ៊ីរ៉ង់បាន ប៉ុន្តែវាមិនទាន់ច្បាស់នៅឡើយថា អារ៉ាប៊ីសាអូឌីត និងសមាជិកOPEC ដទៃ អាចជំនួសប្រេងអ៊ីរ៉ង់បានកម្រិតណា ។
កាលពីខែឧសភាកន្លងមក សហរដ្ឋអាមេរិកបានដកខ្លួនចេញពីកិច្ចព្រមព្រៀងពហុជាតិ ហើយបានប្រាប់ដល់ប្រទេសផ្សេងទៀតថា ពួកគេត្រូវតែបញ្ឈប់ការនាំចូលប្រេងទាំងអស់ពីអ៊ីរ៉ង់ ចាប់ពីថ្ងៃទី៤ ខែវិច្ឆិកា ខាងមុខនេះទៅ បើមិនដូច្នេះទេ ប្រទេសទាំងនោះនឹងជួបប្រទះវិធានការហិរញ្ញវត្ថុរបស់សហរដ្ឋអាមេរិក ។
ការគំរាមដាក់ទណ្ឌកម្មនេះ បានបង្កឲ្យរូបិយវត្ថុរបស់ប្រទេសអ៊ីរ៉ង់ធ្លាក់ចុះយ៉ាងខ្លាំង ខណៈពាណិជ្ជករនាំគ្នាធ្វើកូដកម្ម ៕
ចែករំលែកព័តមាននេះ