ទីក្រុងបាងកក ៖ កសិករដាំស្រូវអាចនឹងមើលឃើញតម្លៃអង្ករកើនឡើង ព្រោះតែមានតម្រូវការនាំចេញខ្ពស់ ខណៈដែលអង្ករស្តុករបស់រដ្ឋនៅខ្វះខាត ។
លោក Whichai Phochanakij ប្រធានគ្រប់គ្រងនាយកដ្ឋានពាណិជ្ជកម្មក្នុងស្រុករបស់ប្រទេសថៃបាននិយាយថា ទិន្នផលស្រូវប្រចាំឆ្នាំដែលបានចាប់ផ្តើមកាលពីចុងខែតុលា ត្រូវបានព្យាករណ៍ថា ស្មើនឹងប្រមាណ៣៣,៤២លានតោន ។ លោកបន្តថា តម្រូវការទាំងសម្រាប់ការលក់ក្នុងស្រុក និងការនាំចេញអាច នឹងស្មើដល់ទៅ៣៤,០៣លានតោន។
លោក Whichai បានបន្ថែមថា ៖« ដោយមិនមានវត្តមានអង្ករស្តុកទុកជាច្រើនរបស់រដ្ឋាភិបាលដែលបានដាក់សម្ពាធលើទីផ្សារអង្ករពិភពលោក និងតម្រូវការទិញដ៏រឹងមាំ ពួកយើងគិតថា រដូវប្រមូលទិន្នផលប្រចាំឆ្នាំនេះនឹងរកបានប្រាក់ចំណូលកាន់តែខ្ពស់ជាងមុនសម្រាប់កសិករ។ ជាពិសេសតម្លៃអង្ករក្រអូបនឹងកើនឡើងយ៉ាងខ្លាំង ព្រោះតែមានការដាំដុះទាបក្នុងអំឡុងពេលគ្រោះរាំងស្ងូត »។
ផលិតកម្មអង្ករក្រអូបក្នុងអំឡុងពីឆ្នាំ ២០១៨-២០១៩ អាចនឹងធ្លាក់ចុះប្រមាណ ២០% បើធៀបនឹងរដូវមុន ព្រោះតែតំបន់ខាងជើង និងតំបន់ភាគឦសានមានគ្រោះរាំងស្ងួត ។
ការស្ទង់មតិរួមមួយដែលធ្វើឡើងដោយក្រសួងពាណិជ្ជកម្ម និងក្រសួងកសិកម្ម បានឲ្យដឹងថា ផលិតកម្មអង្ករកម្រិតខ្ពស់នៅខេត្តមួយចំនួនដូចជា Roi Et, Nakhon Ratchasima, Sri Sa Ket, Surin, Buri Ram, Khom Kaen និងខេត្ត Chaiyaphum ទទួលរងគ្រោះយ៉ាងខ្លាំងពីគ្រោះរាំងស្ងួតនេះ ។
លោក Whichai បានឲ្យដឹងទៀតថា ៖« បើទោះជាមានការផ្គត់ផ្គង់ច្រើនក្នុងអំឡុងខែវិច្ឆិកា និងខែធ្នូឆ្នាំនេះពិតមែន ពួកយើងនៅតែគិតថាតម្លៃអង្ករនឹងកើនឡើងច្រើនជាងឆ្នាំមុនសម្រាប់គ្រប់ប្រភេទអង្ករ ព្រោះការកុម្មង់ទិញពីអតិថិជនបរទេសដូចជាប្រទេសចិន ឥណ្ឌូណេស៊ី ហ្វីលីពីន ជប៉ុន និងប្រទេសនៅទ្វីបអាហ្វ្រិកនៅបន្តមាននៅឡើយ »។
ឆ្នាំនេះរដ្ឋាភិបាលថៃដាក់គោលដៅនាំចេញអង្ករប្រមាណ១១លានតោន ។ កាលពីឆ្នាំមុនប្រទេសនេះនាំចេញអង្ករបានដល់ទៅ១១,៦លានតោន ឬច្រើនជាងឆ្នាំ២០១៦ដល់ទៅ១៧,៤% ដែលមានតម្លៃទឹកប្រាក់៥,៣១ប៊ីលានដុល្លារ ឬច្រើនជាងឆ្នាំ២០១៦ ប្រមាណ១២,៨% ។
ជុំវិញវិស័យអង្ករនេះដែរ សម្រាប់ចក្ខុវិស័យ មួយចំនួនបានលើកឡើងថា វិស័យនេះកំពុងតែស្ថិតក្នុងពេលវេលាដ៏លំបាកមួយ ខណៈដេលការប្រកួតប្រជែងមានការកើនឡើង បូករួមទាំងកត្តាបម្រែបម្រួលអាកាសធាតុ, កង្វះពលករ និងកង្វះជំនាញបច្ចេកទេសជាដើម ។
ទស្សនវិស័យដដែលបានបង្ហាញថា នៅឆ្នាំ២០៥០ ចំនួនប្រជាជនសរុបជុំវិញពិភពលោកនឹងកើនដល់១០ប៊ីលាននាក់ ព្រោះតែកំណើនចំនួនប្រជាជននៅតំបន់ដែលក្រីក្រនៅអាស៊ី និងអាហ្វ្រិក ដែលការរស់នៅប្រចាំថ្ងៃ ពឹងផ្អែកទាំងស្រុងលើអង្ករជាអាហារ ។
លោក Peter Ford ប្រធានផ្នែកអាស៊ីប៉ាស៊ីហ្វិកនៅក្រុមហ៊ុន Corteva Agriscience បានឲ្យដឹងថា ៖« មានកត្តាជាច្រើនដែលបានបង្កជាបញ្ហាសម្រាប់កសិករ ។ កំណើនចំនួនប្រជាជនមានន័យថា មានតម្រូវការបង្កើនផលិតកម្ម ដើម្បីធានាដល់ការផ្គត់ផ្គង់អាហារជុំវិញពិភពលោក »។
តម្រូវការអង្ករត្រូវបានព្យាករណ៍ថា នឹងកើនប្រមាណដល់២៥%ក្នុងអំឡុងឆ្នាំ២០១០ ទៅ២០៣០ មកស្មើនឹង៥៥០លានតោនក្នុង១ឆ្នាំហើយប្រមាណ២ភាគ៣នៃតម្រូវការនេះ នឹងមកពីតំបន់អាស៊ី ។
បញ្ហាដែលកំពុងតែត្រូវបានប្រឈមដោយប្រជាជន គឺបម្រែបម្រួលអាកាសធាតុ និងការកើនឡើងកម្តៅដែលអាចបង្កឲ្យមានការខាតបង់យ៉ាងធ្ងន់ធ្ងរដល់ការប្រមូលផលស្រូវ និងផលិតកម្មអង្ករ ។ វិទ្យាស្ថានស្រាវជ្រាវគោលនយោបាយអន្តរជាតិ (IFPRI) ព្យាករណ៍ថា តម្លៃអង្ករអាចកើនឡើងច្រើនជាង៣០%ទៅទៀតនៅឆ្នាំ២០៥០ ប្រសិនបើមិនមានវិធានការទប់ស្កាត់។
លោក Lawrence Wong រដ្ឋមន្ត្រីអភិវឌ្ឍន៍ជាតិ និងអនុរដ្ឋមន្ត្រីហិរញ្ញវត្ថុរបស់សិង្ហបុរីបាននិយាយថា ៖« ការលូតលាស់ផលិតកម្មអង្ករបានអន់ថយយ៉ាងខ្លាំង និងយឺតជាងកំណើនចំនួនប្រជាជនក្នុងរយៈពេល១០ឆ្នាំកន្លងមក ហើយបម្រែបម្រួលអាកាសធាតុកំពុងតែធ្វើឲ្យស្ថានការណ៍កាន់តែធ្ងន់ធ្ងរផងដែរ »។
អ្នកជំនាញគិតថា ដើម្បីធ្វើឲ្យផលិតកម្មអង្ករកាន់តែមានសក្តានុពលខ្ពស់ និងឆ្លងកាត់ការគំរាមកំហែងបាននោះ ភាគីដែលចូលរួមទាំងអស់ត្រូវតែសហការដើម្បីស្វែងរកដំណោះស្រាយថ្មីៗសម្រាប់វិស័យអង្ករដែលមានចីរភាព និងសមធម៌ ៕
ចែករំលែកព័តមាននេះ