ខេត្តប៉ៃលិន ៖ ប្រជាពលរដ្ឋជាច្រើននាក់ដែលធ្វើដំណើរតាមដងផ្លូវនាំគ្នាភ័យព្រលឹងចុងសក់ ខណ:រថយន្តក្រឡុកស៊ីម៉ង់តិ៍របស់ក្រុហ៊ុន ហុង ហួតលី មួយគ្រឿង បើកបរសុខៗនៅកន្លែងការដ្ឋានធ្វើផ្លូវ ស្រាប់តែដាច់ហ្វ្រាំង ជ្រុលចង្កូតបុកចូលទៅក្នុងផ្ទះប្រជាពលរដ្ឋ បណ្តាលឱ្យខូចខាតម៉ូតូអស់ចំនួន៩គ្រឿង ខ្ទេចទាំងស្រុង៤គ្រឿង និងខូចខាតរថយន្ត១គ្រឿង ។
ហេតុការណ៍រថយន្តដាច់ហ្វ្រាំងបុករះចូលផ្ទះប្រជាពលរដ្ឋនេះ បានកើតឡើងកាលពីវេលាម៉ោង១១និង១០នាទីព្រឹកថ្ងៃទី៥ ខែវិច្ឆិកា ឆ្នាំ២០១៨ ស្ថិតនៅផ្លូវក្រាលកៅស៊ូ១កន្លែង ក្បែរផ្សារសាមគ្គី ហៅ ប៉ាហ៊ី ក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ។
ប្រភពព័ត៌មានពីនគរបាលក្រុងប៉ៃលិនបានឱ្យដឹងថា រថយន្តក្រឡុកស៊ីម៉ង់តិ៍របស់ក្រុមហ៊ុន ហុង ហួតលី មួយគ្រឿងម៉ាកហ៊ីយិនដាយ ពាក់ស្លាកលេខ បាត់ដំបង ៥A-០០៣២ រងការខូចខាតផ្នែកខាងមុខស្រាល ។
ចំណែកអ្នកបើកបររថយន្តបន្ទាប់ពីទទួលរងការបុកចូលផ្ទះប្រជាពលរដ្ឋបានបើកទ្វាររថយន្ត រត់គេចខ្លួនបាត់ស្រមោល ដោយទុកឱ្យម្ចាស់ក្រុមហ៊ុនធ្វើការដោះស្រាយ ។
ប្រភពបន្តទៀតថា មុនពេលកើតហេតុ គេឃើញរថយន្តក្រឡុកស៊ីម៉ង់តិ៍ខាងលើត្រូវបានខាងមន្ទីរសាធារណការ និងដឹកជញ្ជូនខេត្តប៉ៃលិនជួលឱ្យទៅក្រឡុកស៊ីម៉ង់តិ៍ធ្វើផ្លូវ១កន្លែង លុះបន្ទាប់ពីលាយស៊ីម៉ង់ត៍រួចរាល់ គេឃើញអ្នកបើកបរចាប់ផ្តើមបញ្ឆេះរថយន្តបើកបរក្នុងទិសដៅពីកើតទៅលិច លុះមកដល់ត្រង់ចំណុចផ្លូវចោតចុះទួល ក៏រេចង្កូតចុះឡើងៗ ស្រាប់តែឃើញមនុស្សក្បែរចិញ្ចើមផ្លូវនាំគ្នារត់គេចព្រាត ដោយអ្នកខ្លះស្រែកឱ្យទាញយកកូនចៅចេញពីផ្លូវ ។
ពេលនោះមានមនុស្សក្មេងចាស់ជាច្រើននាក់កំពុងតែឈរនៅក្បែរកន្លែងផ្ទះកើតហេតុ លុះក្រឡេកឃើញរថយន្តតម្រង់ក្បាលមកចំ ក៏ស្ទុះរត់គេចខ្លួនភ្លាម ទើបបុករោងលក់គុយទាវ និងរោងដាក់តាំងម៉ូតូលក់ពេញទំហឹង បណ្តាលឱ្យខូចខាតម៉ូតូម៉ាកឌ្រីមអស់ចំនួន៩គ្រឿង ក្នុងនោះខូចខាតធ្ងន់ធ្ងរចំនួន៤គ្រឿង និងរថយន្តកាមរីគូទស្វិតពណ៌ស១គ្រឿង ព្រមទាំងសម្ភារ:ផ្សេងៗទៀតជាច្រើន ។
ក្រោយពេលកើតហេតុ អបន្ទាប់ពីនគរបាលធ្វើការវាស់វែងរួច ក៏យករថយន្តទៅរក្សាទុកនៅអធិការដ្ឋាននគរបាលក្រុងប៉ៃលិន រង់ចាំម្ចាស់ក្រុមហ៊ុនចូលខ្លួនដោះស្រាយ និងសងថ្លៃខូចខាតទាំងអស់ផងដែរ ៕
ចែករំលែកព័តមាននេះ