រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានអះអាងថា គ្មានការប្រយុទ្ធប្រឆាំងឱសថក្លែងក្លាយ និងអន់គុណភាព ដែលគ្មានការចួលរួមពីភាគីពាក់ព័ន្ធទទួលបានជោគជ័យនោះទេ ។ ដូច្នេះករណីប្រយុទ្ធប្រឆាំងឱសថក្លែងក្លាយត្រូវមានការសហការគ្នាទាំងជាតិ និងអន្តរជាតិ។ ការលើកឡើងរបស់ប្រមុខរាជរដ្ឋាភិបាលធ្វើឡើងក្នុងសន្និសីទអន្តរជាតិ ថ្នាក់តំបន់ស្តីពី «ការប្រយុទ្ធប្រឆាំងឱសថក្លែងក្លាយ និងអន់គុណភាព» នាព្រឹកថ្ងៃទី៥ វិច្ឆិកា ឆ្នាំ២០១៨ នៅសណ្ឋាគាសូហ្វីទែលភូកេត្រា។
សម្តេចបញ្ជាក់ថា «ការប្រយុទ្ធប្រឆាំងឱសថក្លែងក្លាយនេះ គ្មានប្រទេសអ្នកណាមួយធ្វើតែម្នាក់ទទួលបានជោគជ័យនោះទេ ។ ដូច្នេះយើងទាំងអស់គ្នា ត្រូវបន្តធ្វើកិច្ចសហប្រតិបត្តិការឲ្យបានជិតស្និតបន្ថែមទៀត ទាំងការបង្កើន ការផ្លាស់ប្តូរព័ត៌មានឲ្យគ្នាទៅវិញទៅមក ការអនុវត្តច្បាប់តឹងរឹង និងការទទួលខុសត្រូវដូចគ្នារវាងប្រទេសដែលមានប្រភពផលិត ប្រទេសដែលបានប្រើប្រាស់ឱសថក្លែងក្លាយ និងអន់គុណភាព ដើម្បីទប់ស្កាត់ និងលុបបំបាត់ សកម្មភាពឲ្យមានប្រសិទ្ធភាព»។
សម្តេចលើកឡើងទៀតថា ដើម្បីប្រយុទ្ធប្រឆាំងឱសថក្លែងក្លាយ និងអន់គុណភាពត្រូវរៀបចំ និងចាត់វិធានការណ៍លើការកែទម្រង់ច្បាប់ និងតាមដានចាប់រាល់ជនទាំងឡាយណាដែលមានការពាក់ព័ន្ធ ។ ប្រទេសនីមួយៗគួរបង្កើតក្រុមការងារប្រយុទ្ធប្រឆាំងនឹងអំពើបទល្មើសឱសថក្លែងក្លាយ និងអន់គុណភាពក្នុងគោលដៅសម្របសម្រួលផ្តល់ព័ត៌មានផ្សេងដល់សាធារណជន និងក្នុងតំបន់ ។
សម្តេចក៏លើកឡើងថា ដើម្បីប្រយុទ្ធប្រឆាំងឱសថក្លែងក្លាយឲ្យមានប្រសិទ្ធភាពផងដែរ អាជ្ញាធរនៅតាមច្រកព្រំដែននៃប្រទេសនីមួយៗត្រូវធ្វើកិច្ចសហប្រតិបត្តិការជិតស្និតជាមួយគ្នាក្នុងការស្វែងរកបទល្មើសផលិតឱសថក្លែងក្លាយ និងបង្កើកកម្មវិធីផ្លាស់ប្តូរព័ត៌មានគ្នា ដើម្បីធ្វើ ស៊ើបពីការផលិត ការចែកចាយ និងអត្តសញ្ញាណជនទាំងនោះ ។ ធ្វើការសហការគ្នារវាងស្ថាប័នរដ្ឋ និងឯកជន ជាពិសេសនោះម្ចាស់ក្រុមហ៊ុនផលិត ដើម្បីស្រាវជ្រាវរកឱសថក្លែងក្លាយ និងអន់គុណភាព និងរាយការណ៍ទៅសមត្ថកិច្ចចាត់វិធានការ ៕
ចែករំលែកព័តមាននេះ