រាជធានីភ្នំពេញ ៖ យុវជន២នាក់ស្រវឹងស្រាជិះម៉ូតូមួយគ្រឿងក្នុងល្បឿនលឿនមិនបានប្រយ័ត្នក៏ជ្រុលទៅបុកអ្នកដើរឆ្លងផ្លូវបណ្តាលអោយដួលរងរបួសពកក្បាលម្ខាងនឹងរលាត់ដៃរលាត់ជើងមិនដោះស្រាយគ្នាទេ បែរជាឈ្លោះប្រកែកគ្នាផ្អើលពេញផ្លូវយកត្រូវរៀងៗខ្លួន ។
ហេតុការណ៍នេះបានកើតឡើងកាលពីវេលាម៉ោង១និង១០នាទីរំលងអាធាត្រឈានចូលថ្ងៃទី៥ ខែវិច្ឆិកា ឆ្នាំ២០១៨ តាមបណ្តោយផ្លូវសុរាម្រិតនៅចំណុចមុខណាហ្គាវើរ ស្ថិតនៅក្នុងសង្កាត់ចតុមុខ ខណ្ឌដូនពេញ។
សាក្សីដែលឃើញហេតុការណ៍បានអោយដឹងថា មុនពេលកើតហេតុ គេបានឃើញយុវជនម្នាក់មិនស្គាល់អត្តសញ្ញាណ មានអាយុប្រហែល១៧ទៅ១៨ឆ្នាំ ដើរកាន់យីហ៊ឺអាំងឆ្លងផ្លូវយកទៅកិនអោយភ្ញៀវ លុះពេលកំពុងតែដើរឆ្លងបានពាក់កណ្តាលផ្លូវ ក៏ស្រាបតែមានយុវជន២នាក់ទៀតជិះម៉ូតូមួយគ្រឿងម៉ាកស៊ូមមើ ពណ៌ក្រហមលាយស អត់ស្លាកលេខ បើកបរតាមបណ្តោយផ្លូវសុរាម្រិតក្នុងទិសដៅពីកើតទៅលិចក្នុងស្ថានភាពស្រវឹង ។
ប្រភពដដែលបានឱ្យដឹងថា ម៉ូតូម៉ាកស៊ូមមើ អិច បានបើកលឿនហើយជែងម៉ូតូម៉ាកហុងដាឌ្រីមនៅពីមុខក៏ជ្រុលទៅបុកអ្នកដើរឆ្លងផ្លូវ បណ្តាលអោយរងរបួសពកក្បាលនឹងរលាត់ដៃរលាត់ជើង រីឯខាងម៉ូតូវិញអ្នកអង្គុយពីក្រោយរងរបួសបែកក្បាលត្រូវមិត្តភក្តិដឹកតាមម៉ូតូយកទៅពេទ្យដែលនៅក្បែរនឹងកន្លែងកើតហេតុ ចំណែកអ្នកបើកបររងរបួសស្រាល និងម៉ូតូវិញខូចខាតបែកក្បាំងម៉ូតូខាងឆ្វេង ប៉ុន្តែភាគីទាំងសងខាងជជែកនឹងឈ្លោះប្រកែកគ្នាយកត្រូវរៀងៗខ្លួនឡើងផ្អើលពេញផ្លូវ ហើយបងប្រុសខាងភាគីម្ចាស់ម៉ូតូក៏បានមកដល់រឹតតែមិនបានដោះស្រាយជួយចេញថ្លៃព្យាបាលទេ បានមកឈ្លោះជាមួយភាគីម៉ូតូម៉ាកហុងដា និងពលរដ្ឋអ្នកដើរឆ្លងផ្លូវថែមទៀត ។
ក្រោយពេលកើតហេតុ សមត្ថកិច្ចក៏បានធ្វើការវាសវែងយកម៉ូតូទៅរក្សាទុកនៅអធិការដ្ឋាននគរបាលខណ្ឌដូនពេញរង់ចាំដោះស្រាយគ្នានៅពេលក្រោយទៀត ៕
ចែករំលែកព័តមាននេះ