ខេត្តរតនគិរី ៖ បុរសម្នាក់លួចម៉ូតូថៅកែស្រីរបស់ខ្លួនពីខេត្តព្រះវិហារជិះមករកជួបសង្សារនៅខេត្តរតនគិរី ហើយត្រូវប៉ូលិសចាប់បាននៅលើផ្លូវជាតិលេខ៧៨ កាលពី ម៉ោង១១និង២០នាទីព្រឹក ថ្ងៃទី៤ ខែវិច្ឆិកា ឆ្នាំ២០១៨ ស្ថិតនៅភូមិ1កាចាញ…
ខេត្តរតនគិរី ៖ បុរសម្នាក់លួចម៉ូតូថៅកែស្រីរបស់ខ្លួនពីខេត្តព្រះវិហារជិះមករកជួបសង្សារនៅខេត្តរតនគិរី ហើយត្រូវប៉ូលិសចាប់បាននៅលើផ្លូវជាតិលេខ៧៨ កាលពី ម៉ោង១១និង២០នាទីព្រឹក ថ្ងៃទី៤ ខែវិច្ឆិកា ឆ្នាំ២០១៨ ស្ថិតនៅភូមិ1កាចាញ សង្កាត់កាចាញ ក្រុងបានលុង ខេត្តរតនគីរី ។
ជនសង្ស័យខាងលើឈ្មោះ ពុំ ភ័ក្ត្រ ភេទប្រុស អាយុ២៤ឆ្នាំ មុខរបរជាងឈើ មានស្រុកកំណើតនៅភូមិអង្គខ្លើយ ឃុំត្បែង ស្រុកកណ្តាលស្ទឹង ខេត្តកណ្ដាល បានលួចម៉ូតូ១គ្រឿងម៉ាកនិច ពណ៌ក្រហម អត់ស្លាកលេខ ជារបស់ស្ត្រីរងគ្រោះឈ្មោះ ប៉េង សុថិត ភេទស្រី អាយុ៥៦ឆ្នាំ មុខរបរបើករោងសិប្បកម្ម មានទីលំនៅបច្ចុប្បន្ននៅភូមិស្រះឈូក សង្កាត់កំពង់ប្រណោក ខេត្តព្រះវិហារ។
បើតាមរបាយការណ៍ប៉ូលិសក្រុងបានលុង បានឱ្យដឹងថា ដោយទទួលបណ្តឹងពីស្ត្រីរងគ្រោះដែលមកប្ដឹងពាក់ព័ន្ធទៅនឹងករណីលួចម៉ូតូប្រព្រឹត្តិម៉ោងប្រហែល៨និង៣០នាទីព្រឹកនៅថ្ងៃទី០៣ ខែតុលា ឆ្នាំ២០១៦ នៅចំណុចផ្ទះជនរងគ្រោះខេត្តព្រះវិហារតែម្តង។
ក្រោយពីទទួលបណ្តឹងភ្លាមសមត្ថកិច្ចខេត្តព្រះវិហាររាយការណ៍ជូនកម្លាំងជំនាញព្រហ្មទណ្ឌកម្រិតស្រាលសហការជាមួយកម្លាំងអធិការក្រុងបានលុងខេត្តរតនគិរី ដាក់កម្លាំងធើ្វការស្រាវជ្រាវឃាត់ខ្លួនជនសង្ស័យខាងលើម្នាក់កាលពីម៉ោង១១និង២០នាទីព្រឹកថ្ងៃទី៤ វិច្ឆិ នៅភូមិ1កាចាញ សង្កាត់កាចាញ ក្រុងបានលុង ដោយបានដកហូតម៉ូតូ១គ្រឿងម៉ាកនិចដែលជារបស់ជនរងគ្រោះ។
ក្រោយពីចាប់ខ្លួនបាន ជនសង្ស័យសារភាពប្រាប់សមត្ថកិច្ចថា ខ្លួនពិតជាបានយកម៉ូតូពីថៅកែរបស់ខ្លួនពិតមែន ហើយជិះម៉ូតូមកខេត្តរតនគិរីនេះ មានបំណងមកជួបសង្សាររបស់ខ្លួនដែលស្គាល់គ្នាតាមហ្វេសប៊ុក មិនទាន់ទាំងបាននឹងជួបផង ស្រាប់តែត្រូវប៉ូលិសចាប់ដាក់ខ្នោះទៅហើយ។
បច្ចុប្បន្នជនសង្ស័យបានឃាត់ខ្លួននៅការិយាល័យជំនាញនៃស្នងការដ្ឋាននគរបាលខេត្តរតនគិរី រួមទាំងវត្ថុតាងម៉ូតូ រង់ចាំកម្លាំងជំនាញនគរបាលខេត្តព្រះវិហារមកទទួលយកទៅអនុវត្តនីតិវិធីបន្ត៕
ចែករំលែកព័តមាននេះ