រាជធានីភ្នំពេញ ៖ មន្ត្រីជាន់ខ្ពស់និងជាអ្នកនាំពាក្យគណបក្សប្រជាជនកម្ពុជា លោក សុខ ឥសាន បានស្នើឲ្យគ្រប់មជ្ឈដ្ឋានចូលរួមលុបបំបាត់និងប្រឆាំងអំពើពុករលួយនៅកម្ពុជា។ លោក សុខ ឥសាន…
រាជធានីភ្នំពេញ ៖ មន្ត្រីជាន់ខ្ពស់និងជាអ្នកនាំពាក្យគណបក្សប្រជាជនកម្ពុជា លោក សុខ ឥសាន បានស្នើឲ្យគ្រប់មជ្ឈដ្ឋានចូលរួមលុបបំបាត់និងប្រឆាំងអំពើពុករលួយនៅកម្ពុជា។ លោក សុខ ឥសាន បានឲ្យដឹងនៅថ្ងៃទី៣ ខែវិច្ឆិកាថា ប្រជាជនទូទៅអ្នកណាក៏ចង់បានភាពស្អាតស្អំដែរ ដូច្នេះអ្នកណាក៏ស្អប់អំពើពុករលួយ ហើយចង់ប្រឆាំងអំពើពុរលួយដែរ ទោះបីតូចក្តី ធំក្តី ។ ហេតុដូច្នេះហើយ បានជារាជរដ្ឋាភិបាលកម្ពុជាខិតខំណាស់ដើម្បីបង្កើតច្បាប់ប្រឆាំងអំពើពុករលួយ ធ្វើឲ្យអំពើពុករលួយថយចុះមួយកម្រិត
និងបើនៅមានក៏មិនចំហដូចមុនពេកដែរ ។
លោកបញ្ជាក់ថា «ដើម្បីអាចលុបបំបាត់អំពើពុករលួយឲ្យអស់ពីក្នុងសង្គម ចាំបាច់ត្រូវមានការចូលរួមពីគ្រប់មជ្ឈដ្ឋានក្នុងសង្គម រួមមានទាំងអ្នកធំ អ្នកតូច មន្ត្រីរាជការ សមត្ថកិច្ច អង្គការសង្គមសុីវិល អ្នកសារព័ត៌មាន តុលាការ កម្មករ កសិករ និងប្រជាពលរដ្ឋទូទៅផង ។ ក្នុងនេះ បើមានមួយណាមិនស្មោះត្រង់ទេ នោះក៏មិនអាចធ្វើឲ្យអំពើពុកលួយត្រូវលុបបំបាត់ដែរ» ។
លោក សុខ ឥសាន បន្តថា បើយ៉ាងដូច្នេះ ទាមទារការស្មោះត្រង់ជាមូលដ្ឋានបឋម ។ បើគ្មានការស្មោះត្រង់ទេ ធ្វើអី្វក៏មិនកើតដែរ ។ មន្ត្រីរាជការត្រូវប្រតិបត្តិតួនាទីឲ្យបានត្រឹមត្រូវ បម្រើប្រជាជនដោយស្មារតីទទួលខុសត្រូវមានក្រមសីលធ៌មល្អ និងប្រកបដោយវិជ្ជាជីវៈបម្រើសេវាសាធារណ:ដោយស្មោះត្រង់នឹងប្រជាជន ។ ប្រជាជនក៏ត្រូវកុំធ្វើអ្វីឲ្យខុសច្បាប់ដែរ ។ បើធ្វើខុសច្បាប់ហើយ ចង់រួចខ្លួនទៅសូកប៉ាន់ នោះហើយជាអំពើរលួយ។
ជាមួយគ្នានេះ លោក សុខ ឥសាន ក៏ស្នើឲ្យអង្គការសង្គមសុីវិលត្រូវប្រកាន់ខ្ជាប់ក្រមសីលធម៌និងវិជ្ជាជីវ:របស់ខ្លួនឲ្យបានល្អ កុំកាន់ខាងព្រៃឈើលួចលាក់យកលុយកាក់ពីអ្នកលួចកាប់ព្រៃឈើ បើមិនអាចបិទបាំងបានទើបលាតត្រដាងយកស្នាដៃ ឬឃើញគេពុករលួយហើយតែបើមិនចែកអញខ្លះ អញនឹងប្រតិកម្ម តែបើចែកអញបានសុីខ្លះក៏ស្ងាត់ទៅមិនកើតទេ ។
លោកបន្តថា ចំណែកអ្នកសារព័ត៌មានត្រូវនិយាយការពិត មិនត្រូវងាកឆ្វេង ស្តាំដើម្បីផលប្រយោជន៍ឡើយ ។ សូមកុំនៅចាំស្ទាក់យកព័ត៌មាន បើស្ងាត់លួចយកលុយ តែបើបែកការណ៍ទើបលាតត្រដាង ឬមួយបើមិនចែកអញស៊ីផង អញនឹងលាតត្រដាងចេញជាព័ត៌មានយកស្នាដៃក៏មិនកើតដែរ ។
លោក សុខ ឥសាន បន្ថែមថា បញ្ហាខាងលើនេះ តែងតែកើតមានឡើងជាញយៗដែរ នៅក្នុងការជាក់ស្តែង ។ ហេតុនេះ គួរនាំគ្នាលុបបំបាត់ចោលឲ្យអស់តាមជំនាញនិងតួនាទីរបស់ខ្លួនដោយព្រមៗគ្នា ទើបសង្គមកម្ពុជាយើងអាចរកឃើញនូវភាពស្អាតស្អំនិងគ្មានអំពើពុករលួយបាន ៕
ចែករំលែកព័តមាននេះ