ខេត្ដកោះកុង ៖ លោកស្បោង សារ៉ាត ទីប្រឹក្សាផ្ទាល់សម្ដេចអគ្គមហាសេនាបតីតេជោ ហ៊ុន សែន និងជាអភិបាលខេត្ដព្រះសីហនុ បានអញ្ជើញសួរសុខទុក្ខកងទ័ពតំបន់ ប្រតិបត្ដិការសឹករងខេត្ដ ដែលមានភារកិច្ចការពារតំបន់ព្រំដែនជួរមុខទិសខេត្ដកោះកុង កាលពីព្រឹកថ្ងៃទី២៣ ឧសភា ឆ្នាំ២០១០ ។ នៅក្នុងឱកាសនោះ លោកអភិបាលខេត្ដព្រះសីហនុ ក៏បាននាំយកនូវអំណោយមួយចំនួនទៅចែកជូនផងដែរ ។ ក្នុងនាមគណៈអភិបាលខេត្ដលោក ស្បោង សារ៉ាត បានថ្លែងនូវការកោតសរសើរ ចំពោះវីរភាពរបស់នាយទាហាន នាយទាហានរង និងពលទាហានគ្រប់រូបដែលបានយកចិត្ដទុកដាក់ជំនះគ្រប់ការលំបាក ខិតខំការពារបូរណភាពទឹកដី ការពារប្រទេសជាតិ ហើយសកម្មភាពនេះត្រូវបានការឧបត្ថម្ភ គាំទ្រទាំងស្មារតី និងសំភារពីសំណាក់មន្ដ្រីរាជការ និងប្រជាពលរដ្ឋដែលនៅខាងក្រោយជាបន្ដបន្ទាប់ ។
ចំពោះអំណោយ ដែលលោកអភិបាលខេត្ដឧបត្ថម្ភក្នុងឱកាស នេះរួមមានថវិកាមួយលានរៀល និងសំភារម្ហូបអាហារជាច្រើនទៀត ។នៅក្នុងថ្ងៃដដែលនោះដែរ លោកស្បោង សារ៉ាត ក៏បានអញ្ជើញទៅពិនិត្យមើលដំណើរ ការសាងសង់អគារទីបញ្ជាការកងអនុសេនាធំរៀបរយទី២ ស្ថិតក្នុងភូមិបឹងរាំង ឃុំសាមគ្គី ស្រុកព្រៃនប់ ដែលបច្ចុប្បន្នសាងសង់បាន ប្រមាណជាង៩០ភាគរយនៃគំរោង ធ្វើពីបេតុងប្រក់ហ្វីប្រូស៊ីម៉ង់ត៍ទំហំ៧ម៉ែត្រគុណ១២ម៉ែត្រ ចំណាយថវិកាអស់ប្រមាណ ១៣.៦២៥ដុល្លារអាមេរិក ។ ជាមួយគ្នានេះ លោកអភិបាលខេត្ដក៏បានជួយឧបត្ថម្ភដំណើរការជីកស្រះទឹកចំនួន៤កន្លែងសំរាប់កងទ័ព ព្រមទាំងឧបត្ថម្ភនូវថវិកា និងសំភារ ម្ហូបអាហារជូនដល់កងអនុសេនាធំរៀបរយទី២ នៅស្រុកព្រៃនប់ផងដែរ ។
ចែករំលែកព័តមាននេះ