ខេត្តកំពង់ឆ្នាំង ៖ មានការភ្ញាក់ផ្អើលមួយដល់ក្រុមអ្នកសារព័ត៌មាន និងសមត្ថកិច្ច ព្រមទាំងប្រជាពលរដ្ឋ បានចុះទៅពិនិត្យដល់កន្លែងកើតហេតុ ដោយសារតែក្រុមហ៊ុនមួយអះអាងថា៖ បានច្បាប់ស្ដារបាតអាង ជួសជុលទ្វារទឹក និងទំនប់កុមារ ប៉ុន្តែបែរជាដាក់គ្រឿងចក្រធំៗឈូសឆាយ និងបូមខ្សាច់ខុសពីច្បាប់ស្នើសុំទៅវិញ ។ ហេតុការណ៍នេះបានកើតឡើងនៅថ្ងៃទី០៣ ខែវិច្ឆិកា ឆ្នាំ២០១៨ នៅភូមិអ្នកតាហាង ឃុំកំពង់ត្រឡាច ស្រុកកំពង់ត្រឡាច។
គួរបញ្ជាក់ដែរថា៖ ក្នុងលិខិតស្នើសុំរបស់ប្រធានសហគមន៍ទំនប់កុមារ ដែលបានស្នើសុំទៅអភិបាលស្រុកកំពង់ត្រឡាច មន្ត្រីជំនាញ និងអាជ្ញាធរខេត្ត បានបញ្ជាក់ថា សំណើសុំជួសជុលទំនប់កុមារមានប្រវែង ១.៧០០ម៉ែត្រ ទ្វារទឹកចំនួន២ និងស្តារបាតអាង សម្រាប់ស្រោចស្រពលើផ្ទៃដីស្រែជាង១ពាន់ហិកតា។ ប៉ុន្តែក្រោយពីបានច្បាប់នោះមកស្រាប់តែថ្មីៗនេះ ក្រុមហ៊ុនដែលជារបស់លោក រឿន ថាវរិទ្ធ មានទីលំនៅខេត្តព្រះសីហនុ ដែលជាម្ចាស់ក្រុមហ៊ុនបានដាក់ គ្រឿងចក្របូមយកខ្សាច់ទៅវិញ ធ្វើឲ្យមានការភ្ញាក់ផ្អើលព្រោះតែអនុវត្តខុសនឹងច្បាប់ដែលបានស្នើសុំ។
លោក ជិន សុផាត ប្រធានការិយាល័យសេដ្ឋកិច្ច របស់ស្នងការនគរបាលដ្ឋានខេត្ត កំពង់ឆ្នាំង ដែលបានចុះពិនិត្យដល់កន្លែង កើតហេតុបានបញ្ជាក់ថា លោកបានពិនិត្យលើលិខិតស្នើសុំនោះ គឺជួសជុលទំនប់ស្តារបាតអាង និងជួសជុលទ្វាទ្វឹក។ ប៉ុន្តែពេលពិនិត្យនៅកន្លែងកើតហេតុគឺបូមយកខ្សាច់ទៅវិញ វាខុសពីច្បាប់ដែលបានស្នើសុំ។ ជាមួយគ្នានេះលោក ដោក ប៊ុនថុន ប្រធានមន្ទីរធនធានទឹក និងឧតុនិយម បានបញ្ជាក់ថា លោកពិតជាបានចុះ ហត្ថលេខាឲ្យមានការជួសជុលទំនប់ស្តារអាងពិតប្រាកដមែន ដោយសារតែសហគមន៍បានស្នើសុំថា៖ មានសប្បុរសជន គេជួយហើយបើសិនជាមានករណីបូមខ្សាច់គឺវាខុសគ្នាពីរឿងជួសជុលទំនប់ គឺខុសគ្នាដាច់ស្រឡះតែម្តង វាមិនអាចដូចគ្នានោះទេ បើសិនជាមានបែបនេះមែនគឺវាខុសនឹងច្បាប់ ហើយលោកមិនបានដឹងឮនោះទេ។
យ៉ាងនេះក្តីប្រជាពលរដ្ឋរស់នៅភូមិអ្នកតាហាងក៏ដូចជាប្រជាពលរដ្ឋ ស្រុកកំពង់ត្រឡាច បានស្នើសុំដល់មន្ត្រីជំនាញមេត្តាចុះពិនិត្យ លើលិខិតស្នើសុំ និងចុះពិនិត្យ ដល់កន្លែកើតហេតុ ឲ្យបានច្បាស់លាស់ព្រោះថា៖ ការយករ៉ែ ឬទ្រង់ទ្រាយធំមិនមែនតូចតាចនេះ បើនៅតែបណ្ដែតបណ្ដោយបែបនេះ រ៉ែ នៅក្នុងដីពិតជាអស់ជាមិនខានឡើយ។ ពិសេសឯកឧត្តមអភិបាលខេត្តកំពង់ឆ្នាំង សូមមេត្តាជួយមើលមន្ត្រីជំនាញ ច្រើនស្ថាប័នកំពុងធ្វើមន្ត្រីកន្ទេលធំបន្លំដេកហើយ៕
https://youtu.be/iKgcL64yq_Q
ចែករំលែកព័តមាននេះ