ប្រទេសឥណ្ឌា ៖ ខ្លាញីមួយក្បាលជាប្រភពនៃការសម្លាប់មនុស្ស១៣នាក់នៅឥណ្ឌា បានត្រូវគេបាញ់សម្លាប់ហើយ កាលពីយប់ថៃ្ងទី២ វិច្ឆិកា ២០១៨ ក្នុងព្រៃនៃរដ្ឋMAHARASHTRA របស់ឥណ្ឌា។
ការសម្លាប់មេខ្លាដ៏កាចសាហាវនោះ នាំឲ្យពួកអ្នកភូមិនៃតំបន់នាភាគកណ្ដាលប្រទេសឥណ្ឌា មានការធូរស្បើយក្នុងអារម្មណ៍ ប៉ុន្តែមានការចម្រូងចម្រាស់មួយកើតឡើងលើលក្ខខណ្ឌនៃការសម្លាប់មេខ្លានោះ។មេខ្លាសាហាវនេះត្រូវបានពួកអ្នកបរបាញ់សត្វដាក់រហស្សនាមឲ្យថា T1 ហើយពួកអ្នកការពារសត្វព្រៃហៅឈ្មោះថា AVNI។
វាត្រូវបាញ់សម្លាប់ក្រោយការតាមប្រមាញ់ខ្លាមួយដែលមានទ្រង់ទ្រាយធំបំផុត ពុំធ្លាប់មានចាប់តាំងពីច្រើនទសវត្សមកហើយនៅឥណ្ឌា។ដើម្បីតាមរកមេខ្លានេះ គេបានប្រមូលមនុស្សជាង១៥០នាក់ ហើយប្រើពេលដល់ច្រើនខែព្រមទាំងមធ្យោបាយសំខាន់ៗ ដូចជាកាមេរ៉ាអាំងហ្វ្រារ៉ូនិងពួកអ្នកបរបាញ់ជើងឆើតដែលជិះដំរីតាមរក។
មេខ្លានោះជាអ្នកសម្លាប់មនុស្ស១៣នាក់ចាប់តាំងពីខែមិថុនាឆ្នាំ២០១៦មក។ជនរងគ្រោះដំបូងគេគឺនារីម្នាក់ដែលសាកសពរបស់គេ រកឃើញក្នុងចម្ការកប្បាសមួយ។ចាប់តាំងពីពេលនោះមកជនរងគ្រោះភាគច្រើនជាអ្នកគង្វាលសត្វភេទប្រុស។
មានភាពចម្រូងចម្រាស់ផ្ទុះឡើងពេលបណ្ដាសារព័ត៌មានលាតត្រដាងថា ពុំមានថ្នាំធ្វើឲ្យសន្លប់ត្រូវបានប្រើឡើយដើម្បីចាប់មេខ្លានេះ ដែលកំពុងមានកូនតូច២ក្បាលទើបមានអាយុ១០ខែ។ ចាំបាច់តុលាការកំពូលត្រូវផ្ដល់ភ្លើងខៀវសម្រាប់ប្រតិបត្តិការប្រមាញ់វា ព្រោះខ្លាប្រភេទនេះជាពូជកំពុងឈានទៅបាត់បង់។ប៉ុន្តែស្ថាប័ននោះបានសម្រេចថានោះជាលក្ខណៈពិសេសដែលអាចបាញ់សម្លាប់វា ប្រសិនបើការប្រើថ្នាំធ្វើឲ្យវាសន្លប់ពុំអាចទៅរួច៕
ចែករំលែកព័តមាននេះ