ខេត្តកំពង់ចាម ៖ អាងទឹករូបដំរីក្បាលបួនត្រង់ចំណុចមុខសណ្ឋាគារមេគង្គ បានស្រុតបន្ថែមទៀត មានជម្រៅរហូតដល់ទៅជាង១ម៉ែត្រហើយ នាថ្ងៃទី០៤ វិច្ឆិកា ២០១៨នេះ ក្នុងសង្កាត់កំពង់ចាម ក្រុងកំពង់ចាម…
ខេត្តកំពង់ចាម ៖ អាងទឹករូបដំរីក្បាលបួនត្រង់ចំណុចមុខសណ្ឋាគារមេគង្គ បានស្រុតបន្ថែមទៀត មានជម្រៅរហូតដល់ទៅជាង១ម៉ែត្រហើយ នាថ្ងៃទី០៤ វិច្ឆិកា ២០១៨នេះ ក្នុងសង្កាត់កំពង់ចាម ក្រុងកំពង់ចាម ដែលធ្វើឲ្យអាងទឹកមានរូបដំរីនៅចំកណ្តាលអាង បានស្រុតផ្អៀងទ្រេតជាបណ្តើរៗ។
ក្រោយពីបានត្រូវភ្លៀងមួយមេនោះ ប្រជាពលរដ្ឋមកពីគ្រប់ទិសទីមានក្មេងចាស់ប្រុសស្រី បានសម្ដែងនូវការសោកស្តាយសមិទ្ធផលដែលកកើត ត្រូវខូចខាតដោយគ្រោះធម្មជាតិ ខឿនបេតុងនៅផ្នែកខាងក្រោមក៏រងការស្រុត ហើយមានបេតុងត្រូវបានប្រេះកាន់តែខ្លាំងឡើងត្រង់តោ២ចុះនៅផែរបស់ឧកញ៉ាម្នាក់។
អាជីវករផ្សារបឹងកុកឈ្មោះ សុខុម ភេទប្រុស អាយុ៦០ឆ្នាំ ប្រាប់ឲ្យដឹងថា រូបលោកបានចាប់ផ្តើមលក់ដូរនៅត្រង់កំពង់កាណូតចាស់តាំងតែមានឆ្នេរខ្សាច់ ដែលគេមិនបានកែច្នៃ ហើយនៅផ្នែកខាងក្រោមកាលណោះច្រាំងដីបានបាក់បន្តិចម្តងៗពីមួយឆ្នាំទៅមួយឆ្នាំ ក្រោយៗមកទៀតដល់អាណត្តិរបស់លោក លន់ លឹមថៃ អតីតអភិបាលខេត្តចាស់ ប្រឹងប្រែងកសាងសួនច្បារនៅតាមជួរដងទន្លេមេគង្គមានដាំផ្កាចំរុះពណ៌ រួមនឹងរូបសំណាក់ផ្សេងៗឲ្យកាន់តែមានសោភ័ណ្ឌភាព។
អាជីវករផ្សារបឹងកុករូបនេះប្រាប់បន្តថា ប៉ុន្តែនៅពេលថ្មីៗនេះបង្កាន់ដៃបេតុងសួនច្បារចាប់ត្រង់ចំណុចតោ២បានបាក់ស្រុតរងការខូចខាត ដំបូងមានសភាពតិចៗនោះទេ តែមកដល់ព្រឹកថ្ងៃទី៤ វិច្ឆិកា បានបាក់ស្រុតកាន់តែខ្លាំងឡើងៗ អាងទឹកមានរូបសំណាក់ដីរីក្បាលបួន បានស្រុតផ្អៀងម្ខាង និងមានការសោកស្តាយជាខ្លាំង ។
ក្នុងនាមរូបលោកជាអាជីវករលក់ដូរក៏ដូចជាពលរដ្ឋផ្សេងៗទៀត សំណូមពរដល់លោក គួច ចំរើន អភិបាលនៃគណៈអភិបាលខេត្តសព្វថ្ងៃ មេត្តាមានវិធានការជួសជុលនូវសមិទ្ធផលដែលរងការខូចខាត ដោយគ្រោះធម្មជាតិឲ្យបានស្អាតដូចមុន ដើម្បីជាការទាក់ទាញភ្ញៀវជាតិនៅជិតឆ្ងាយមកលេងនៅក្រុងកំពង់ចាម ជាពិសេសនៅសួនច្បារមាត់ទន្លេមេគង្គ ដើម្បីស្រូបយកខ្យល់អាកាស និងកាត់បន្ថយនូវភាពតានតឹងក្នុងខ្លួនបានមួយកំរិតដែរ។
លោកអ៊ុំ វិបុល ប្រធានមន្ទីរធនធានទឹក និងឧតុនិយមខេត្ត ប្រាប់ឲ្យដឹងនៅរសៀលថ្ងៃទី៤ វិច្ឆិកាថា រូបលោកបានរាយការណ៍ពីស្ថានភាពបាក់ស្រុតសួនច្បារនៅត្រង់មុខសណ្ឋាគារមេគង្គ និងមុខសណ្ឋាគារមនោរម្យវីអាយភី ទៅថ្នាក់លើហើយ ដែលការខូចខាតនេះមានទំហំធំ ដែលត្រូវការថវិកាទ្វេរដងឯណោះ កន្លែងស្រុតមិនអាចជួសជុលបាននោះទេ គឺត្រូវកាយធ្វើថ្មីទាំងអស់ ដើម្បីឲ្យមានគុណភាព៕
ចែករំលែកព័តមាននេះ