ខេត្តកំពត ៖ មន្ត្រីថ្នាក់ដឹកនាំខណ្ឌរដ្ឋបាលព្រៃឈើកំពត-កែបដឹកនាំដោយលោកស៊ឹម ឡាប៉័ង នាយខណ្ឌរដ្ឋបាលព្រៃឈើ នៅថ្ងៃទី៨ និងទី៩ ខែមីនា បានដឹកនាំមន្ត្រីក្នុងខណ្ឌរដ្ឋបាលព្រៃឈើកំពត ចុះទៅពិនិត្យទីតាំងសង្កាត់រដ្ឋបាលព្រៃឈើ ដែលមានស្រាប់កន្លងមកនៅក្នុងខេត្តទាំងពីរ កំពត-កែប ។ ជាមួយនេះ រៀបចំទីតាំងថ្នាលបណ្តុះកូនឈើនិងលើកស្លាកសញ្ញាតាមបណ្តាសង្កាត់ដែលមានតែទីស្នាក់ការតែគ្មានស្លាកសម្គាល់ទីស្នាក់ការដូចជាស្នាក់ការសង្កាត់រដ្ឋបាលព្រៃឈើកំពង់បាយ បឹងទូក សង្កាត់រដ្ឋបាលព្រៃឈើកែប សង្កាត់រដ្ឋបាលព្រៃឈើស្រុកអង្គរជ័យ និងនៅមានស្នាក់ការសង្កាត់រដ្ឋបាលព្រៃឈើតាមបណ្តាស្រុកមួយចំនួនទៀតនៅក្នុងខេត្តកំពត ។
នៅជំហានដំបូងនេះ លោកស៊ឹម ឡាប៉័ង បានចុះមកដល់ទីស្នាក់ការសង្កាត់រដ្ឋបាលព្រៃឈើកំពង់បាយបឹងទូក ។ លោកគាម តឹប នាយសង្កាត់រដ្ឋបាលព្រៃឈើកំពង់បាយបឹងទូក បានរាយការណ៍ពីទំហំដីនៅក្នុងសង្កាត់គឺមានដីទំហំមួយហិកតាកន្លះ ដែលមានប្លង់សម្គាល់កម្មសិទ្ធិរបស់រដ្ឋបាលព្រៃឈើស្របច្បាប់ ។ កន្លងមក ទីតាំងនេះគ្រាន់តែដាក់ស្លាកសញ្ញាថា ជាស្ថានីយបណ្តុះកូនឈើប៉ុណ្ណោះ ទោះបីជានាយសង្កាត់មកស្នាក់នៅធ្វើការនៅទីស្នាក់ការនេះក្តីក៏ការរៀបចំដាក់ស្លាកសញ្ញាសម្គាល់គ្មានទេ ពេលនេះលោកស៊ឹម ឡាប៉័ង ដែលទើបនឹងមកទទួលការគ្រប់គ្រងផ្នែករដ្ឋបាលព្រៃឈើថ្មី បានចុះពង្រឹងការងារស្នូលរបស់មន្ត្រីរដ្ឋបាលព្រៃឈើគ្រប់ផ្នែកផង រៀបចំដាក់ស្លាកសញ្ញាផង និងពិនិត្យឡើងវិញការធ្វើថ្នាលបណ្តុះកូនឈើឱ្យត្រូវតាមស្តង់ដារបស់ក្រសួងកសិកម្ម រុក្ខាប្រមាញ់និងនេសាទផង។ មិនតែប៉ុណ្ណោះក្នុងការរៀបចំនេះ លោកបានចំណាយទាំងសំភារនិងថ្លៃឈ្នួលដល់កម្មករថែមទៀត ។
លោកស៊ឹម ឡាប៉័ង បានថ្លែងថា ផ្អែកតាមអនុសាសន៍ លោកច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោកប្រធានរដ្ឋបាលព្រៃឈើ និងលោកអភិបាលខេត្តទាំង៣ បានចង្អុលណែនាំដល់អង្គភាពរដ្ឋបាលព្រៃឈើឱ្យបណ្តុះកូនឈើគ្រប់ប្រភេទឱ្យបានច្រើនក្នុងឆ្នាំ២០១១នេះ ដើម្បីចែកជូនប្រជាពលរដ្ឋក្នុងការដាំដុះ ។ មកដល់ពេលនេះ លោកបានដឹកនាំមន្ត្រីរដ្ឋបាលព្រៃឈើនៅក្នុងអង្គភាពខណ្ឌរដ្ឋបាល ចុះពិនិត្យថ្នាលបណ្តុះកូនឈើដែលមានទាំងថ្នាលចាស់និងថ្នាលបណ្តុះកូនឈើថ្មីមានជាអាទិ៍ដូចជា ថ្នាលបណ្តុះកូនឈើភ្នំតាម៉ៅ ថ្នាលបណ្តុះកូនឈើនៅសង្កាត់រដ្ឋបាលព្រៃឈើត្រាំកក់ គិរីវង់ ស្រុកអង្គរជ័យ សង្កាត់រដ្ឋបាលព្រៃឈើឈូក និងជុំគិរី ។
លោកស៊ឹម ឡាប៉័ង បន្តទៀតថា ការចុះពង្រឹងសកម្មភាពការងារស្នូលរបស់ជំនាញរដ្ឋបាលព្រៃឈើនេះ លោកជួបការលំបាកជាច្រើនអន្លើដែរ ។ ដូចជាការរៀបចំធ្វើទីតាំងនិងថ្នាលបណ្តុះ មន្ត្រីនៅក្រោមឱវាទមួយចំនួននៅខ្វះបច្ចេកទេសក្នុងការរៀបចំទីតាំងនិងធ្វើថ្នាលបណ្តុះ ការយល់ដឹងបច្ចេកទេសនៅមានកំរិតទាប ទីស្នាក់ការរបស់សង្កាត់មានតែឈ្មោះគ្មានកន្លែងធ្វើការ និងគ្មានស្លាកសញ្ញាសម្គាល់ឱ្យបានច្បាស់លាស់ ។ ពេលនេះ ជាបន្ទុករបស់លោកហើយ ដូច្នេះលោកត្រូវតែខំធ្វើបន្តដើម្បីសម្រេចជោគជ័យតាមអនុសាសន៍និងការណែនាំរបស់ថ្នាក់ដឹកនាំខេត្តផងដែរ ៕
ចែករំលែកព័តមាននេះ