រាជធានីភ្នំពេញ ៖ បុរសជាអ្នករត់ម៉ូតូឌុបម្នាក់ត្រូវជនសង្ស័យ២នាក់ កាប់ប្លន់យកម៉ូតូមួយគ្រឿងទៅបាត់ បណ្ដាលឲ្យរបួសដៃស្រាល ខណៈពេលដែលរូបគាត់នៅអង្គុយចាំយកលុយពីនារីម្នាក់បង្កឲ្យមានការណ៍ភ្ញាក់ផ្អើលកាលពីម៉ោង៨និង៤៥នាទីយប់ នៅថ្ងៃទី៣ ខែវិច្ឆិកា ឆ្នាំ២០១៨ តាមបណ្ដោយផ្លូវទំនប់៧០ កែងផ្លូវរថភ្លើង ស្ថិតក្នុងភូមិចុងខ្សាច់ សង្កាត់ទួលសង្កែ ១ខណ្ឌឫស្សីកែវ ។
ជនរងគ្រោះខាងលើឈ្មោះ កន នាង ភេទប្រុស អាយុ៤៧ឆ្នាំ មុខរបរអ្នករត់ម៉ូតូឌុប ស្នាក់នៅបន្ទប់ជួលភូមិទ្រុងមាន់ សង្កាត់អូបែកក្អម ខណ្ឌសែនសុខ មានស្រុកកំណើតនៅឃុំព្រែកកុយ ស្រុកកងមាស ខេត្តកំពង់ចាម ហើយម៉ូតូដែលក្រុមជនសង្ស័យកាប់ប្លន់យកទៅនោះម៉ាកSUZUKI SMASH ពណ៌ខ្មៅលាយក្រហម ពាក់ស្លាកលេខភ្នំពេញ.2BL-8439។
បើតាមសំដីជនរងគ្រោះប្រាប់ឲ្យដឹងថា មុនកើតហេតុ គាត់បានឌុបនារីម្នាក់ក្នុងតម្លៃ៤០០០រៀលចេញពីវិហារឥស្លាមនៅម្តុំបឹងកក់ សង្កាត់ស្រះចក ខណ្ឌដូនពេញ ទៅចំណុចកើតខាងលើ ខណៈឌុបមកដល់នារីម្នាក់នោះចុះពីលើម៉ូតូមិនទាន់ឲ្យលុយទេ បានប្រាប់គាត់ឲ្យចាំគាត់មួយភ្លែត ហើយដើរចូលទៅតាមបណ្តោយផ្លូវរថភ្លើងបាត់ មួយសន្ទុះក្រោយមកស្រាប់តែលេចមុខជនសង្ស័យ២នាក់បានធ្វើសកម្មភាពយកកាំបិតកាប់ប្លន់យកម៉ូតូគាត់ បណ្ដាលឲ្យរងរបួសដៃខាងឆ្វេងស្រាល ។
ជនរងគ្រោះបន្តថា នៅពេលនោះរូបគាត់ក៏បានស្រែកហៅឲ្យប្រជាពលរដ្ឋនៅទីនោះជួយ ប៉ុន្តែគ្មានអ្នកហ៊ានចូលជួយទេ ព្រោះជនសង្ស័យមានកាំបិតជាប់ដៃ ក៏បណ្ដោយឲ្យជនសង្ស័យទាំង២នាក់យកម៉ូតូជិះទៅគេចខ្លួនបាត់ដោយសុវិត្តភាព។
ក្រោយពេលកើតហេតុជនរងគ្រោះបានត្រឹមតែទៅដាក់ពាក្យបណ្ដឹងទាំងអស់សង្ឃឹមនៅប៉ុស្តិ៍នគរបាលទួលសង្កែ១តែប៉ុណ្ណោះ៕
ចែករំលែកព័តមាននេះ