រាជធានីភ្នំពេញ ៖ នៅទីបំផុតក្ដីស្រម៉ៃរបស់កីឡាករវ័យក្មេងជើងខ្លាំង ង៉ែត វុធ មិនអាចធ្វើទៅបាននោះទេ ដោយសារតែពេលគេបើកការប្រកួតជាមួយកីឡាករជើងខ្លាំងម្នាក់ទៀត គឺ អេ រដ្ឋា…
រាជធានីភ្នំពេញ ៖ នៅទីបំផុតក្ដីស្រម៉ៃរបស់កីឡាករវ័យក្មេងជើងខ្លាំង ង៉ែត វុធ មិនអាចធ្វើទៅបាននោះទេ ដោយសារតែពេលគេបើកការប្រកួតជាមួយកីឡាករជើងខ្លាំងម្នាក់ទៀត គឺ អេ រដ្ឋា គេមិនអាចទៅរួចនោះទេ បើទោះជាការប្រកួតរបស់គេត្រូវអ្នកគាំទ្រកត់សម្គាល់ថា ខ្លាំងមិនធម្មតា។ នេះជាការប្រកួតជម្រុះក្នុងវគ្គ៣២នាក់ យក១៦នាក់ ដើម្បីបោះជំហានទៅប្រជែងយកជើងឯកក្នុងប្រភេទទម្ងន់៥៧គីឡូក្រាម ដែលជាការប្រកួតរដូវកាលទី៤របស់ប៉ុស្ដិ៍លេខ៥។
កីឡាករ ង៉ែត វុធ បង្គោលក្រហម បានបង្ហាញអារម្មណ៍សោកស្ដាយមិនតិចនោះទេ បន្ទាប់ពីបានចំណាយពេលវាយសម្រុកគូប្រកួត ពេញរយៈពេល៥ទឹក ប៉ុន្តែចុងក្រោយនៅតែមិនអាចទៅរួច ដែលមានន័យថា បំណងដែលគេចង់បានតាំងពីមុនបើកការប្រកួតមិនអាចទៅរួច។
យ៉ាងណាមិញ កីឡាករូបនេះ បានធ្វើឱ្យម្នាក់ៗមានការចាប់អារម្មណ៍យ៉ាងខ្លាំង ដោយសារតែគេប្រកួតបានល្អ ហើយមិនបានលាក់ដៃលាក់ស្នៀតសូម្បីតែបន្តិចនោះទេ ដោយបានទាំងធ្វើឱ្យម្នាក់ៗពេញចិត្តនោះផង។ លទ្ធផលដែលគេហាលអាវ គឺដោយសារតែគេភ្លាត់ឱ្យកីឡាករ អេ រដ្ឋា វ័ធត្រូវមួយដៃ ហើយបណ្ដាលឱ្យបែកលើផ្ទៃមុខប៉ុណ្ណោះ ប៉ុន្តែគេនៅតែឃើញកីឡាកររូបនេះ ស្ទុះវាយចេញល្អ ដោយបានទាំងវាយកែងឱ្យកីឡាករជាគូប្រកួត ទ័លច្រកម្ដងជាពីរដងនោះផង។
ង៉ែត វុធ និយាយថា លោកមានអារម្មណ៍ខកបំណងយ៉ាងខ្លាំង ដែលការប្រកួតទាំងស្រុងធ្វើឱ្យលោកក្លាយជាអ្នកបរាជ័យ ទាំងលោកប្រឹងប្រែងហ្វឹកហាត់អស់ពីសមត្ថភាពទៅហើយ។
ទោះជាកីឡាករ អេ រដ្ឋា ធ្លាប់ប្រឡូកក្នុងព្រឹត្តិការណ៍ជម្រើសជើងឯកនេះមុនខ្លួន តែលោកមិនដែលខ្លាចការប្រកួតនៅពេលប៉ះគ្នានោះទេ ដោយលោកបានទាំងរំពឹងថានឹងស៊ីរៀមច្បងបង្គោលនោះផង ទើបលោកមានអារម្មណ៍ពិបាកទទួលយកដែលលោកប្រឹងប្រែងហ្វឹកហាត់ច្រើនថ្ងៃមកហើយ នៅតែមិនអាចឆ្លងផងការប្រកួត ហើយធ្លាក់ហាលអាវទាំងមិនអស់ចិត្ត។
យ៉ាងណាមិញ លោកមិនមានឱកាសសងសឹកនោះទេ ដោយសារតែ អេ រដ្ឋា បានក្លាយជាបេក្ខភាពបន្តទៅកាន់វគ្គ១៦នាក់ ហើយង៉ែត វុធ បានត្រឹមតែឈរមើលជើងខ្លាំងៗបន្តប្រកួតគ្នា ព្រោះតែលែងមានឱកាសឡើងប្រកួតជម្រើសយកជើងឯក៕
ចែករំលែកព័តមាននេះ