ខេត្តបន្ទាយមានជ័យ ៖ នៅថ្ងៃទី០៣ ខែវិច្ឆិកា ឆ្នាំ២០១៨ កងកម្លាំងនគរបាលព្រហ្មទណ្ឌកំរិតស្រាលបង្ហាញមុខជាសាធារណៈជនសង្ស័យចំនួន៣នាក់ដែលបានធ្វើសកម្មភាពលួចគាស់ហាងលក់ទូរស័ព្ទដៃនៅវេលាម៉ោង៣និង២០នាទីយប់ថ្ងៃទី០២ ខែវិច្ឆិកា ឆ្នាំ២០១៨ នៅចំណុចហាងទូរស័ព្ទ គឹម…
ខេត្តបន្ទាយមានជ័យ ៖ នៅថ្ងៃទី០៣ ខែវិច្ឆិកា ឆ្នាំ២០១៨ កងកម្លាំងនគរបាលព្រហ្មទណ្ឌកំរិតស្រាលបង្ហាញមុខជាសាធារណៈជនសង្ស័យចំនួន៣នាក់ដែលបានធ្វើសកម្មភាពលួចគាស់ហាងលក់ទូរស័ព្ទដៃនៅវេលាម៉ោង៣និង២០នាទីយប់ថ្ងៃទី០២ ខែវិច្ឆិកា ឆ្នាំ២០១៨ នៅចំណុចហាងទូរស័ព្ទ គឹម ឆាយ ភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ។
លោកវរសេនីយ៍ឯក ខែម សោភ័ណ នាយការិយាល័យនគរបាលព្រហ្មទណ្ឌកំរិតស្រាលបានឲ្យដឹងថា បន្ទាប់ពីទទួលបានពាក្យបណ្តឹងរបស់ជនរងគ្រោះជាម្ចាស់ហាងដែលមានឈ្មោះ មួន គឹមឆាយ ភេទប្រុស អាយុ៣០ឆ្នាំ រស់នៅភូមិសង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ថាមានចោរបានគាស់ទ្វារហាងយកទូរស័ព្ទអស់មួយចំនួនមក ។
សមត្ថកិច្ចក៏បានចុះធ្វើការស្រាវជ្រាវតាមវិធានការជំនាញ និងឈានដល់ការបង្ក្រាបចាប់ឃាត់ខ្លួនជនសង្ស័យចំនួន៣នាក់ក្នុងផ្ទះជួលមួយកន្លែងស្ថិតក្នុងភូមិគោរដ្ឋាន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ នៅវេលាម៉ោង៦ល្ងាចថ្ងៃទី០២ ខែវិច្ឆិកា ឆ្នាំ២០១៨ ដែលមានទី១-ឈ្មោះ ញឹម ចាន់លី ភេទប្រុស អាយុ៣៥ឆ្នាំ, ទី២-ឈ្មោះ ញ៉ូញ ស្រីនាង ភេទស្រី អាយុ១៦ឆ្នាំ និងទី៣-ឈ្មោះ ពេជ្រ ស្រីល័ក្ខ ភេទស្រី អាយុ២០ឆ្នាំ រស់នៅសង្កាត់កាកាប ខណ្ឌពោធិសែនជ័យ រាជធានីភ្នំពេញ ។
លោកនាយការិយាល័យបានបញ្ជាក់ទៀតថា ជាមួយនឹងការបង្ក្រាបនេះសមត្ថកិច្ចបានធ្វើការឆែកឆេររកឃើញវត្ថុតាងក្នុងបន្ទប់ដែលពួកគេជួលមានម៉ូតូ១គ្រឿង ហុងដាឌ្រីម ស៊េរីឆ្នាំ២០១៦ ជាមធ្យោបាយ, ដងសោរ១, គ្រាប់សោរលេខ៨ចំនួន១ លេខ១០ចំនួន១ ដែកចុងស្រួចសំរាប់កាច់សោរចំនួន២ ដែកចុងស្រួចឆ្កិះសោរចំនួន២ ទូរស័ព្ទដៃប្រភេទចុចពិល៥៨គ្រឿង ម៉ាកសាមសុងJ2 ពណ៌ស១គ្រឿង ទូរស័ព្ទគំរូ១១គ្រឿង ស្ពិចឃ័រ២ ថងហូវៃ១ ព្រមទាំងកាបូបស្ពាយខ្មៅ១ ខោជើងវែងពណ៌ស្លែរ១ អាវពណ៌ប្រផេះ១ មួកកាតឹប១ ដែលស្លៀកធ្វើសកម្មភាព ។
លោកឧត្តមសេនីយ៍ត្រីសិទ្ធ ឡោះ ស្នងការរង ទទួលផែន នគរបាលព្រហ្មទណ្ឌបានបញ្ជាក់ផងដែរថា នៅចំពោះមុខសមត្ថកិច្ចជនសង្ស័យគេបានសារភាពពីសកម្មភាពបស់ពួកគេគឺពិតជាបានលួចគាស់ទ្វារហាងយកទូរស័ព្ទទាំងនោះមែន ៕
ចែករំលែកព័តមាននេះ