ខេត្តសៀមរាប ៖ វត្ត«បារាយណ៍នទី រតនារាម» ហៅវត្តស្វាយរមៀត ជាវត្តបុរាណមួយក្នុងចំណោមវត្តបុរាណជាច្រើននៅក្នុងខេត្តសៀមរាប បច្ចុប្បន្ននេះបាន និងកំពុងក្លាយជាគោលដៅសម្រាប់ភ្ញៀវទេសចរបរទេស ដោយសារទីអារាមនេះបានសាងសង់ឡើងនៅលើខ្នងទំនប់បុរាណអាងបារាយណ៍ទឹកថ្លា ។ មានភ្ញៀវទេសចរបរទេសជាច្រើននាក់ ចូលទស្សនាវត្តនោះជារៀងរាល់ថ្ងៃ ។
វត្តបារាយណ៍នទីរតនារាម ហៅវត្តស្វាយរមៀត បើទៅពីក្រុងសៀមរាប តាមបណ្តោយផ្លូវទៅប្រាសាទអង្គរវត្តបត់ទៅព្រលានយន្តហោះអន្តជាតិសៀមរាប នឹងឃើញខ្លោងទ្វារវត្តនៅពីខាងស្តាំដៃផ្លូវចូលជាប់នឹងរបងភោជនីយដ្ឋានប្រាសាទនាងពៅ ប្រហែលជិត៧គីឡូម៉ែត្រ ពីទីរួមក្រុងសៀមរាប ។
តាមសង្ឃដីការបស់ព្រះតេជគុណវិមុលសំវភទ្ទកោនឿម វុទ្ធី ព្រះគ្រូចៅអធិការវត្តស្វាយរមៀត កាលពីពេល ថ្មីៗកន្លងមកថា ដោយផ្អែកលើសក្តានុពលដែលមានស្រាប់ គឺអាងបាយណ៍ទឹកថ្លា ទីអារាមដែលភ្ញៀវចាប់អារម្មណ៍ និងភូមិសាស្ត្រមូលដ្ឋាន ហើយនៅពេលដែលទីអារាមមួយនេះត្រូវបានក្លាយជាគោលដៅទេសចរណ៍នៃវត្តអារាមពិតប្រាកដនោះ ព្រះអង្គនឹងសហការជាមួយសហគមន៍ប្រជាពលរដ្ឋដែលរស់នៅជុំវិញបរិវេណវត្តចងក្រងឯកសារ និងបង្កើតឱ្យមានការកម្សាន្តដូចជា៖ជូនភ្ញៀវជិះរទេះគោ និងការជិះទូកកម្សាន្ត នៅក្នុងសហគមន៍មូលដ្ឋានមួយជុំវិញវត្ត ។
បារាយណ៍ទឹកថ្លា ឬហៅថា បារាយណ៍ខាងលិច ដើរតួយ៉ាងសំខាន់សម្រាប់ផ្គត់ផ្គង់ទឹកក្នុងតំបន់អង្គរ ជាពិសេសសម្រាប់បម្រើបម្រាស់ក្នុងវិស័យកសិកម្ម ។ យោងតាមតួលេខបានបង្ហាញថា ក្នុង មួយឆ្នាំៗទឹកបារាយណ៍ខាងលិច ប្រមាណ៣០លានម៉ែត្រគូប ដែលបានបង្ហូរបញ្ជូនទៅដល់ការធ្វើស្រូវប្រាំងរបស់សហគមន៍នៅជាប់តំបន់នោះ ដែលសរុបលើផ្ទៃប្រមាណ៤ពាន់ហិកតា ។
ជារៀងរាល់ឆ្នាំអាជ្ញាធរជាតិអប្សរា តែងតែបើកទ្វារទឹកដើម្បីបង្ហូរទឹកពីបារាយណ៍ខាងលិចទៅដល់សហគមន៍អ្នកប្រើប្រាស់ទឹកបារាយណ៍ ក្នុងអំឡុងខែធ្នូ ឆ្នាំ២០១៤កន្លងទៅដើម្បីឱ្យចរន្តទឹកបង្ហូរទៅលឿន តម្រូវឱ្យមានការកាប់ឆ្ការ និងសម្អាតមាត់បារាយណ៍ឱ្យបានស្អាត ហើយសកម្មភាពចុះសម្អាតបារាយណ៍ របស់សហគមន៍អ្នកប្រើប្រាស់ទឹកបារាយណ៍ខាងលិច ដោយមានការចូលរួមពីប្រជាពលរដ្ឋយ៉ាងផុសផុល ៕
ចែករំលែកព័តមាននេះ