ខេត្តក្រចេះ ៖ មន្ត្រីនៃមន្ទីរអប់រំខេត្តក្រចេះរំពឹងថា គម្រោង«ងាយស្រួលរៀន»ដែលនឹង ត្រូវចាប់ផ្តើមអនុវត្តដំណើរការដោយផ្តោតសំខាន់លើវិស័យអប់រំ កំរិតបឋមសិក្សាមាននៅតាម សាលាគោលដៅចំនួន៧កន្លែងក្នុងស្រុកសំបូរ គឺនឹងអាចលើកស្ទួយនូវវិស័យអប់រំក្នុងស្រុកមួយនេះ ឲ្យកាន់តែមានភាពប្រសើរឡើង ខណៈចំនួនសិស្សបោះបង់ចោលការសិក្សានៅស្រុក តំបន់ដាច់ស្រយ៉ាលមួយនេះកាន់តែមានតួរលេខប្រឈមឡើងខ្ពស់។
គម្រោង«ងាយស្រួលរៀន» ត្រូវបានធ្វើពិធីបើកសិក្ខាសាលាដើម្បីចាប់ផ្តើម អនុវត្តលើផែនការនៅថ្ងៃទី២ វិច្ឆិកា នៅក្នុងសាលាស្រុកសំបូរ ខណៈគម្រោងនេះត្រូវបានក្រុមមន្ត្រីរបស់អង្គ ការជាដៃគូគាំទ្រមានដូចជាអង្គការឆាលហ្វាន់ និងអង្គការកាហ្វដុក បានអះអាងថា ធ្លាប់បាន ទទួលជោគជ័យខ្ពស់ គួរឲ្យកត់សម្គាល់ ក្រោយពីធ្លាប់បានអនុវត្តនៅតាមបណ្តាសាលាបឋម សិក្សាជាគោលដៅមួយចំនួននៅស្រុកចិត្របុរី នាឆ្នាំកន្លងមក។ នេះជាគំរោងទី២ ដែល និងត្រូវចាប់ផ្តើមបើកដំណើរការជាមួយនិងសាលាគោលដៅចំនួន៧កន្លែង ក្នុងកំរិត បឋមសិក្សានៅស្រុកសំបូរ។
អនុប្រធានមន្ទីរអប់រំយុវជននិងកីឡា លោក ឃី ម៉េង បានបញ្ជាក់ឲ្យដឹងទៀតថា គម្រោង «ងាយស្រួលរៀន» ដែលនឹងត្រូវចាប់ផ្តើមអនុវត្តដំណើរការទៅលើសាលាជាគោលដោទាំង៧កន្លែង ក្នុងកំរិតបឋមសិក្សានៅស្រុកសំបូរនេះ គឺផ្តោតសំខាន់មានដូចជាការជម្រុញឲ្យកុមារ បានចូលរៀនឲ្យបានគ្រប់គ្នាទាំងកុមារមានជីវភាពក្រីក្រ និងកុមារងាយរងគ្រោះដោយពិការ។ ជាងនេះទៅទៀត រាល់ការចូលរៀនរបស់កុមារគឺត្រូវទទួលបាននូវគុណភាពសិក្សាយ៉ាងពិត ប្រាកដ ដូចជាការអាន ការស្តាប់ និងការសរសេរជាដើម។
លោកអនុប្រធានមន្ទីររូបនេះបានបញ្ជាក់ថា ដោយសារកត្តាជីវភាព និងការខ្វះខាត សាលារៀន ជាបញ្ហាមួយដែលជម្រុញឲ្យកុមារ រស់នៅតាមតំបន់ដាច់ស្រយាលនៃស្រុកសំបួរនេះ បានសម្រេចបោះបង់ចោលការសិក្សាទាំងនៅក្មេងខ្ចី។ កត្តានេះធ្វើឲ្យប៉ះពាល់យ៉ាងធ្ងន់ ធ្ងរ ដល់វិស័យអប់រំនៅកម្ពុជា។
លោកថា ប្រសិនបើគម្រោង «ងាយស្រួលរៀន» នេះចាប់ផ្តើមដំណើរ គឺនឹងអាចធ្វើឲ្យកុមារ ទទួលបានការសិក្សាប្រកបដោយគុណភាព ហើយតួរលេខនៃការបោះបង់ការសិក្សារបស់ សិស្សក៏នឹងមានការធ្លាក់ចុះវិញ៕
ចែករំលែកព័តមាននេះ