សហរដ្ឋអាមេរិក ៖ ក្នុងសេចក្ដីថ្លែងការណ៍មួយស្ដីពីពួកអន្តោប្រវេសន៍ ប្រធានាធិបតីអាមេរិកលោកដូណាល់ ត្រាំ បានអះអាងនាថ្ងៃទី១ វិច្ឆិកាថា កងទាហានអាចបាញ់លើពួកអន្តោប្រវេសន៍ ដែលប៉ុនប៉ងចូលដោយខុសច្បាប់ក្នុងសហរដ្ឋអាមេរិក ប្រសិនបើពួកគេគប់ដុំថ្មដាក់។
លោកត្រាំថ្លែងនៅសេតវិមានថា ប្រសិនបើពួកគេគប់ដុំថ្មមកលើកងទ័ពយើង នោះកងទាហានយើងនឹងតបតវិញ។មុននេះលោកប្រកាសពីការបញ្ជូនទាហានរហូតដល់១៥.០០០នាក់ មកដាក់ពង្រាយនៅព្រំដែនជាមួយម៉ិកស៊ិកទប់ពួកអន្តោប្រវេសន៍។
ខណៈដែលពួកអន្តោប្រវេសន៍អាមេរិកកណ្ដាលច្រើនពាន់នាក់ បច្ចុប្បន្នកំពុងតែលើកគ្នាឆ្ពោះមកកាន់សហរដ្ឋអាមេរិក លោកត្រាំរំឭកថាពួកនោះមួយចំនួនបានគប់ដុំថ្មដាក់កងកម្លាំងប៉ូលិសមិុកសិុក ពេលឆ្លងកាត់ព្រំដែនរវាងហ្គាតេម៉ាឡានិងម៉ិកស៊ិក។លោកថាខ្ញុំបានប្រាប់ទៅកងទាហានឲ្យចាត់ទុកដុំថ្មមួយ ដូចកាំភ្លើងមួយដើមដែរ។ប្រសិនបើពួកគេគប់ដុំថ្ម ដូចពួកគេធ្វើលើប៉ូលិសនិងកងទ័ពម៉ិកស៊ិក ខ្ញុំថាចូរចាត់ទុកដុំថ្មដូចកាំភ្លើងមួយដើម។
ប៉ុន្មានថ្ងៃមុនការបោះឆ្នោតសភាថ្ងៃទី៦ វិច្ឆិកា លោកដូណាល់ត្រាំ បានបង្កើនការប្រកាសក្នុងបំណងទាក់ទាញពួកអ្នកបោះឆ្នោត ពិសេសផ្ដោតលើប្រធានបទអន្តោប្រវេសន៍។ លោកពោលថា នោះជាការលុកលុយមួយ និងប្រកាសថាលោកនឹងចុះហត្ថលេខានាសប្ដាហ៍ខាងមុខលើក្រឹត្យមួយអំពីរឿងនេះ តែលោកមិនបញ្ជាក់ច្រើនជាងនេះឡើយ។
លោកនិយាយម្យ៉ាងទៀតថា សហរដ្ឋអាមេរិកនឹងមិនទទួលសំណើសុំសិទ្ធិជ្រកកោន ពីសំណាក់មនុស្សណាម្នាក់ដែលពុំធ្វើដំណើរកាត់តាមព្រំដែនផ្លូវការឡើយ។ ពួកអន្តោប្រវេសន៍ដែលឃាត់ខ្លួននៅព្រំដែន នឹងយកទៅដាក់ក្នុងជំរំនានា ដែលកសាងជាតង់ ឬទៅកាន់ទីតាំងឯទៀតៗ រហូតដល់ពួកគេត្រូវបណ្ដេញចេញឬរង់ចាំទាល់តែសំណើពួកគេត្រូវបានអនុម័ត៕
ចែករំលែកព័តមាននេះ