ទីក្រុងតូក្យូ ៖ កសិករក្នុងប្រទេសជប៉ុនបានបង្ហាញពីកង្វល់កាលពីថ្ងៃពុធទៅលើកំណើនការនាំចូលដែលនឹងកើតមានឡើងព្រោះតែកិច្ចព្រមព្រៀងទូលំទូលាយនិងរីកចម្រីនសម្រាប់ភាពជាដៃគូពាណិជ្ជកម្មអន្តរប៉ាស៊ីហ្វិក(CPTPP) នឹងចាប់មានប្រសិទ្ធភាពនៅថ្ងៃទី៣០ ខែធ្នូខាងមុខនេះ ។ លោក Tatsumi Jedima កសិករនៅភូមិ…
ទីក្រុងតូក្យូ ៖ កសិករក្នុងប្រទេសជប៉ុនបានបង្ហាញពីកង្វល់កាលពីថ្ងៃពុធទៅលើកំណើនការនាំចូលដែលនឹងកើតមានឡើងព្រោះតែកិច្ចព្រមព្រៀងទូលំទូលាយនិងរីកចម្រីនសម្រាប់ភាពជាដៃគូពាណិជ្ជកម្មអន្តរប៉ាស៊ីហ្វិក(CPTPP) នឹងចាប់មានប្រសិទ្ធភាពនៅថ្ងៃទី៣០ ខែធ្នូខាងមុខនេះ ។
លោក Tatsumi Jedima កសិករនៅភូមិ Sarabetsu ស្ថិតនៅកោះHokkaido បាននិយាយថា សមាជិកជាប្រទេសបានផ្តល់សច្ចាប័នដល់កិច្ចព្រមព្រៀងក្នុងអំឡុងពេលយ៉ាងលឿន ។
លោកបានបន្តថា ៖« ប្រសិនបើផលិតផលសត្វថោកៗចាប់ផ្តើមចូលពីបរទេស អតិថិជនប្រហែលជានឹងជ្រើសយកផលិតផលដែលនាំចូលហើយ ។ ខ្ញុំខ្លាចថា វាយឺតពេល ប្រសិនបើរដ្ឋាភិបាលចេញវិធានការឆ្លើយតប បន្ទាប់ពីពួកយើងទទួលរងការប៉ះពាល់ហើយ »។
នៅតំបន់ Kagoshima វិញ លោក Michio Ushidome ប្រធានសមាគមកសិករចិញ្ចឹមសត្វជ្រូកខ្មៅបានបង្ហាញភាពមិនជឿទុកចិត្តទៅលើអត្ថប្រយោជន៍ដែលសន្យាថា កិច្ចព្រមព្រៀងនេះនឹងផ្តល់ឲ្យ ។
លោកបានឲ្យដឹងថា ៖« កសិករតូចៗដូចពួកយើងប្រហែលជាមិនអាចទទួលបានអត្ថប្រយោជន៍ពីវាទេ »។ លោកបានបន្ថែមថា ៖« ពួកយើងចង់ឲ្យរដ្ឋាភិបាលធានាថា ពួកគេនឹងចេញវិធានការគាំទ្រ ប្រសិនបើអាជីវកម្មចិញ្ចឹមសត្វជ្រូកចាប់ផ្តើមរងការប៉ះពាល់ »។
កសិករដទៃទៀតដែលរួមមានកសិករដាំស្រូវ លោក Mitsuo Ota នៅតំបន់ភ្នំ Daisen ក៏ព្រួយបារម្ភពីការបន្ទាបពន្ធនាំចូលដែរ ។ លោក Ota បាននិយាយថា ៖« វាជាអ្វីដែលរដ្ឋាភិបាលបានសម្រេចដោយយោងតាមការធ្វើពាណិជ្ជកម្មទាំងអស់របស់ប្រទេស ។ មិនថា កសិករដូចពួកយើងប្រឆាំងប៉ុនណាឡើយ ពួកយើងនៅតែត្រូវធ្វើតាមការសម្រេចចិត្តនេះ »។
ផ្ទុយមកវិញ វិស័យអាជីវកម្មបែរជាស្វាគមន៍ការចូលជាធរមានរបស់កិច្ចព្រមព្រៀងខាងលើ។ លោក Hiroaki Nakanishi ប្រធានសហព័ន្ធអាជីវកម្មជប៉ុនបានឲ្យដឹងថា ៖« វាជាការសម្រេចជោគជ័យដ៏ធំមួយ ។ ពួកយើងដែលជាអ្នកគ្រប់គ្រងក្រុមហ៊ុនពិតជាស្វាគមន៍ការសម្រេចចិត្តនេះណាស់ »៕
ចែករំលែកព័តមាននេះ