ទីក្រុងបាងកក ៖ ខណៈដែលប្រទេសដទៃក្នុងអាស៊ីប៉ាស៊ីហ្វិក ជាពិសេសជប៉ុន កូរ៉េ និងវៀតណាម នឹងមើលឃើញពីចំនួនភ្ញៀវទេសចរចិនកើនឡើងនៅត្រីមាសទី៣នាឆ្នាំនេះ ប្រទេសថៃបែរជាជួបនឹងឧបសគ្គក្នុងការទាក់ទាញភ្ញៀវចិនឲ្យមកកាន់ប្រទេសខ្លួនទៅវិញ ពិសេសបន្ទាប់ពីឧបទ្ទវហេតុលិចទូកនៅភូកេត(Phuket)មក ។
កាលពីត្រីមាសទី៣ ចំនួនភ្ញៀវទេសចរជនជាតិចិនដែលធ្វើដំណើរទៅកាន់ប្រទេសថៃបានធ្លាក់ចុះអស់២៣ម៉ឺននាក់ ឬធ្លាក់ចុះ៨,៨% បើធៀបនឹងឆ្នាំមុន ។
យោងតាមទិន្នន័យថ្មីៗបានឲ្យដឹងទៀតថា ចំនួនភ្ញៀវទេសចរជនជាតិចិនដែលទៅកាន់ជប៉ុនបានកើនឡើង១២,៦%កាលពីខែកក្កដា និងកើនឡើងបាន៤,៩%កាលពីខែសីហា ខណៈដែលចំនួនទៅកាន់កូរ៉េខាងត្បូងបានកើនឡើង ៤៥,៩%នៅខែកក្កដា និង៤០,៩%នៅខែសីហា។ ចំណែកភ្ញៀវទេសចរចិនទៅវៀតណាមបានកើនឡើង២១,៦%ផងដែរ ក្នុងត្រីមាសទី៣ ឆ្នាំនេះ ។
ទិន្នន័យនេះបង្ហាញថា ភ្ញៀវទេសចរជនជាតិចិនមិនមែនឈប់ធ្វើដំណើរទៅកាន់ប្រទេសថៃព្រោះតែការអន់ថយនៃសេដ្ឋកិច្ចចិនទេ តែមកពីពួកគេធ្វើដំណើរទៅកាន់ប្រទេសដទៃ ។ កំណើនតម្លៃប្រាក់បាត ក៏កាន់តែធ្វើឲ្យស្ថានការណ៍ធ្ងន់ធ្ងរឡើងដែរ ព្រោះការចំណាយក្នុងប្រទេសថៃកាន់តែកើនឡើងសម្រាប់ក្រុមហ៊ុនទេសចរណ៍ចិន ។
គេហទំព័រ Ctrip ដែលជាគេហទំព័រកក់ការធ្វើដំណើរធំជាងគេរបស់ប្រទេសចិន បានឲ្យដឹងថា ប្រទេសជប៉ុនបានយកឈ្នះប្រទេសថៃជាលើកដំបូង និងក្លាយជាទីតាំងទេសចរណ៍លេខ១ក្នុងអំឡុងពេលបុណ្យប្រពៃណីជនជាតិចិនកាលពីពេលថ្មីៗនេះ ។
អាជ្ញាធរវិស័យទេសចរណ៍ថៃ កំពុងតែចាប់ផ្តើមវិធានការសន្តិសុខ ដើម្បីបង្កើនជំនឿចិត្តភ្ញៀវទេសចរចិនឡើងវិញ ខណៈដែលសមាគមភ្នាក់ងារទេសចរណ៍ថៃកំពុងតែជំរុញដល់រដ្ឋាភិបាលឲ្យចេញវិធានការដើម្បីទាក់ទាញជនជាតិចិនមកវិញដូចជា មិនយកថ្លៃធ្វើទិដ្ឋាការជាដើម ។
ប្រធានសមាគមភ្នាក់ងារទេសចរណ៍ថៃ លោក Vichit Prakobkosol បាននិយាយថា លោកនឹងបន្តជំរុញដល់រដ្ឋាភិបាលឲ្យផ្តល់អត្ថប្រយោជន៍ផ្នែកទិដ្ឋាការដើម្បីទាក់ទាញភ្ញៀវទេសចរ ជាពិសេសអ្នកដែលមកពីប្រទេសចិន ។
លោកសង្កត់ធ្ងន់ថា ៖« បើមិនមានការផ្តល់អត្ថប្រយោជន៍ដែលទាក់ទាញសម្រាប់ជនជាតិចិនទេ ចំនួនភ្ញៀវទេសចរមកពីប្រទេសនេះ នឹងបន្តធ្លាក់ចុះប្រមាណ១៥%ក្នុងមួយខែពីខែតុលាទៅរហូតដល់បុណ្យចូលឆ្នាំចិននៅឆ្នាំក្រោយ »។
យោងតាមរបាយការណ៍រួមរបស់វិទ្យាស្ថាន China Tourism Academy និងក្រុមហ៊ុនទេសចរណ៍Ctrip បានឲ្យដឹងថា ប្រទេសថៃគឺជាទីកន្លែងដែលទាក់ទាញភ្ញៀវទេសចរជនជាតិចិនច្រើនជាងគេលើពិភពលោក ។
របាយការណ៍នេះបន្ដថា មានភ្ញៀវទេសចរជនជាតិចិនប្រមាណ៧១,៣លាននាក់បានធ្វើដំណើរចេញពីក្រុងចំនួន២០០ក្នុងប្រទេសចិនទៅកាន់គោលដៅចំនួន១៣០ប្រទេសកាលពីឆមាសទី១កន្លងមកនេះ ខ្ពស់ជាងឆ្នាំមុន១៥%។
ក្រសួងទេសចរណ៍ និងកីឡារបស់ប្រទេសថៃបានឲ្យដឹងថា ប្រទេសថៃទទួលភ្ញៀវទេសចរបានប្រមាណ១៩,៤លាននាក់កាលពីឆមាសទី១កន្លងមក ឬច្រើនជាងឆ្នាំមុន១២%។ ក្នុងនោះ ភ្ញៀវទេសចរជនជាតិចិនជាប់ចំណាត់ថ្នាក់លេខមួយ ឬមាន៥,៩លាននាក់ និងច្រើនជាងឆ្នាំមុនដល់ទៅ២៦% ។
ក្រសួងគិតថា ចំនួនភ្ញៀវទេសចរចិនទៅកាន់ប្រទេសថៃនឹងកើនដល់១០លាននាក់ក្នុងឆ្នាំនេះបើទោះជាមានឧបទ្ទវហេតុទូកនៅPhuket កាលពីខែកក្កដាដែលបង្កឲ្យជនជាតិចិនចំនួន៤២នាក់បាត់បង់ជីវិតពិតមែនក្តី ៕
ចែករំលែកព័តមាននេះ