រាជធានីភ្នំពេញ ៖ រាជរដ្ឋាភិបាលកម្ពុជាបានត្រៀមកែលម្អផ្លូវជាតិលេខ១ និងផ្លូវជាតិលេខ៦ នៅដើមឆ្នាំ២០១៩ ខាងមុខ ដើម្បីលើកកម្ពស់គុណភាពផ្លូវសម្រាប់បម្រើដល់ការប្រើប្រាស់ជាប់បានយូរ ។ លោក ស៊ុន…
រាជធានីភ្នំពេញ ៖ រាជរដ្ឋាភិបាលកម្ពុជាបានត្រៀមកែលម្អផ្លូវជាតិលេខ១ និងផ្លូវជាតិលេខ៦ នៅដើមឆ្នាំ២០១៩ ខាងមុខ ដើម្បីលើកកម្ពស់គុណភាពផ្លូវសម្រាប់បម្រើដល់ការប្រើប្រាស់ជាប់បានយូរ ។
លោក ស៊ុន ចាន់ថុល ទេសរដ្ឋមន្ដ្រីរដ្ឋមន្ដ្រីក្រសួងសាធារណការ និងដឹកជញ្ជូនបានមាន ប្រសាសន៍ថា សម្រាប់គម្រោងកែលម្អផ្លូវជាតិលេខ១ ពីអ្នកលឿងដល់បាវិត និងផ្លូវជាតិលេខ៦ ពីក្រុងសៀមរាបដល់ក្រឡាញ់ដែលមានប្រវែងសរុបចំនួនជិត១៤៦គីឡូម៉ែត្រ គឺរាជរដ្ឋាភិបាលកម្ពុជាបានទទួលកម្ចីសម្បទានពីធនាគារអភិវឌ្ឍន៍អាស៊ីនូវទឹកប្រាក់ចំនួន៧០លានដុល្លារ ។
លោកបានបញ្ជាក់ថា ក្រុមហ៊ុនដែលទទួលត្រួតពិនិត្យគម្រោងស្ថាបនាផ្លូវទាំងពីរនេះ ត្រូវពិនិត្យការសាងសង់ឱ្យបានត្រឹមត្រូវស្របតាមស្ដង់ដារបច្ចេកទេស ដើម្បីធានាគុណភាពប្រើប្រាស់ ជាប់បានយូរ ។ លោកបានលើកឡើងថា ក្នុងកម្ចីសម្បទានពីធនាគារអភិវឌ្ឍន៍អាស៊ីនូវទឹកប្រាក់ចំនួន៧០លានដុល្លារនេះមួយផ្នែកស្ថិតក្នុងគម្រោងស្ថាបនាមន្ទីរពិសោធន៍ចំនួន៤កន្លែង នៅក្នុងខេត្ដក្រចេះ កំពត សៀមរាប និងខេត្ដពោធិ៍សាត់ ដើម្បីបង្កលក្ខណៈឱ្យក្រសួងសាធារណការ និងដឹកជញ្ជូនធ្វើការត្រួតពិនិត្យបច្ចេកទេស ការស្ថាបនាផ្លូវថ្នល់ឱ្យកាន់តែមានគុណភាពរឹងមាំបន្ថែមទៀត ។
ក្នុងពិធីចុះហត្ថលេខាលើកិច្ចព្រមព្រៀងរវាងក្រសួងសាធារណការ និងដឹកជញ្ជូនជាមួយក្រុម ហ៊ុនទីប្រឹក្សាបច្ចេកទេស Korea Consultants International កាលពីល្ងាចថ្ងៃទី៣១ ខែតុលា នៅទីស្ដីការក្រសួងសាធារណការលោក ស៊ូ ដុង ផាក (Soo Dong Park) ប្រធានក្រុមហ៊ុន Korea Consultants International នៃប្រទេសកូរ៉េដែលទទួលបានការត្រួតពិនិត្យ និងជាទីប្រឹក្សាបច្ចេកទេសក្នុងការស្ថាបនាគម្រោងទាំងពីរនេះបានសន្យាថា ក្រុមហ៊ុននឹងគោរពទៅតាមកិច្ចព្រមព្រៀងនេះព្រមទាំងអនុវត្តតាមលក្ខណៈបច្ចេកទេស ដើម្បីធានាគុណភាពស្របតាមស្ដង់ដារ ។
សូមបញ្ជាក់ថា គម្រោងស្ថាបនាកំណាត់ផ្លូវជាតិទាំងពីរនេះនឹងធ្វើការលើកកម្រិតផ្លូវពីកម្រាល កៅស៊ី DBST បច្ចុប្បន្នទៅជាកម្រាលកៅស៊ូ AC និងធ្វើការស្ថាបនាលូសងខាងផ្លូវ ដើម្បីរំដោះទឹកភ្លៀងចេញ ៕
ចែករំលែកព័តមាននេះ