រាជធានីភ្នំពេញ ៖ កម្លាំងវិស្វកម្មយោធាចំនួន២១៦នាក់ ស្រី១០នាក់ នឹងត្រូវបញ្ជូនចេញទៅបំពេញបេសកកម្មដើម្បីរក្សាសន្តិភាពរបស់ UN នៅសាលាធារណរដ្ឋអាហ្វ្រិចកណ្តាល នៅព្រឹកថ្ងៃទី២ ខែវិច្ឆិកា ឆ្នាំ២០១៨ នេះហើយនឹងត្រូវជំនួសកម្លាំង២១៦នាក់ ស្រី១៤នាក់ និងកម្លាំងអាវុធ៧៣នាក់ ស្រី៩នាក់ ដែលបានបញ្ចប់បេសកកម្មវិលមកប្រទេសកម្ពុជាវិញ ។ ពិធីនេះជូនដំណើរ និងទទួលកម្លាំងមាតុភូមិវត្តន៍នេះធ្វើឡើងក្រោមអធិបតីភាពសម្តេចពិន័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ។
ក្រសួងការពារជាតិបានលើកឡើងថា យោងតាមកិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និងអង្គការសហប្រជាជាតិ (អ.ស.ប) និងក្រសួងការពារជាតិនឹងបញ្ជូនកម្លាំងកងវិស្វកម្មលេខ៥៩៤ ចំនួន២១៦នាក់ ក្នុងនោះរួមទាំងនារីចំនួន១០នាក់ ទៅចូលរួមរក្សាសន្តិភាព អ.ស.ប នៅសាធារណរដ្ឋអាហ្វ្រិចកណ្តាល ពិធីជូនដំណើរនឹងប្រព្រឹត្តទៅក្រោមអធិបតីភាពលោកនាយឧត្តមសេនីយ៍ ប៉ុល សារឿន ទេសរដ្ឋមន្ត្រីទទួលបន្ទុកបេសកកម្មពិសេសរនៅវេលាម៉ោង៨ព្រឹកថ្ងៃទី២ ខែវិច្ឆិកា ឆ្នាំ២០១៨ នៅមូលដ្ឋានកងទ័ពអាកាសពោធិ៍ចិនតុង ។
ក្រសួងការពារជាតិបានបញ្ជាក់ក្នុងសេចក្តីប្រកាសព័ត៌មានរបស់ខ្លួនចុះថ្ងៃទី៣១ ខែតុលា ឆ្នាំ២០១៨ ទៀតថាកងវិស្វកម្មលេខ៥៩៤គឺជាកងវិស្វកម្មលើកទី៥ហើយដែលបានបញ្ជូនទៅចូលរួមបេសកកម្មរក្សាសន្តិភាព អ.ស.ប នៅសាធារណរដ្ឋអាហ្វ្រិចកណ្តាលហើយកងនេះនឹងត្រូវប្តូរវេនជំនួសកងវិស្វកម្មលេខ៩៥៤ដែលបានសម្រេចភារកិច្ចដោយជោគជ័យក្នុងបេសកកម្ម អ.ស.ប អាណត្តិ១ឆ្នាំនៅសាធារណរដ្ឋអាហ្វ្រិចកណ្តាល ៕
ចែករំលែកព័តមាននេះ