មន្ត្រីជំនាញនិងអាជ្ញាធរ មិនត្រូវចុះហត្ថលេខាលើការទិញ-លក់ដីស្រែអំបិល
- កំពត
ខេត្តកំពត ៖ លោក ជាវ តាយ អភិបាលខេត្ត បានធ្វើការអំពាវនាវដល់អាជ្ញាធរក្រុង ស្រុក ឃុំ សង្កាត់…
ខេត្តកំពត ៖ លោក ជាវ តាយ អភិបាលខេត្ត បានធ្វើការអំពាវនាវដល់អាជ្ញាធរក្រុង ស្រុក ឃុំ សង្កាត់ កុំចុះហត្ថលេខាលើការទិញ-លក់ស្រែអំបិល ។ លោកអភិបាលខេត្ត បានអំពាវនាវបែបនេះ នៅក្នុងកិច្ចប្រជុំការងារសហគមន៍ផលិតអំបិលសាខាខេត្តកំពត-កែប កាលពីរសៀលថ្ងៃទី៣១ ខែតុលា នៅសាលប្រជុំសាលាខេត្ត ដោយមានការអញ្ជើញចូលរួមពីសំណាក់អភិបាលក្រុង-ស្រុក ចៅសង្កាត់ មេឃុំ ប្រធានមន្ទីរជំនាញនៅក្នុងខេត្ត និងមន្ត្រីការិយាល័យពាក់ព័ន្ធក្នុងរដ្ឋបាលខេត្ត ។
លោកអភិបាលខេត្ត ជាវ តាយ បានសំណូមពរឲ្យប្រធានមន្ទីរជំនាញពាក់ព័ន្ធនីមួយៗ មានយោបល់លើកឡើងរាយការណ៍ជូនអង្គប្រជុំនូវរាល់បាតុភាពផ្សេងៗជុំវិញការលក់ដីស្រែអំបិលកន្លងមកទៅឲ្យឯកជន ឬឈ្មួញដី និងបញ្ហាអសកម្មនៃការផលិតអំបិលរបស់សហគមន៍ផលិតអំបិលសាខាកំពត-កែប នាពេលបច្ចុប្បន្ន ។
លោក ប៊ុន បារាំង សហប្រធានសហគមន៍ផលិតអំបិលសាខាកំពត-កែប បានលើកឡើងថា កន្លងមកក្នុងឆ្នាំ២០១៧ សហគមន៍អ្នកផលិតអំបិលយើងផលិតអំបិលបានកើនឡើងច្រើនរាប់ម៉ឺនតោន ហើយនៅពេលនោះកន្លែងផលិតខ្លះស្ទើរតែរកឃ្លាំងដាក់អំបិលគ្មាន រហូតដល់ដាក់អំបិលនៅក្រៅឃ្លាំងទៀតផង ។ រីឯទីផ្សារទៀតសោតនៅពេលនោះ អំបិលដែលយើងផលិតបាននៅក្នុងស្រុកក៏មានទីផ្សារតិចតួច ដោយសារការនាំចូលអំបិលពីក្រៅប្រទេសមកក្នុងទីផ្សារកម្ពុជាយើង ។
បើនិយាយពីគុណភាពអំបិលរបស់យើង គឺគុណភាពល្អ ការផលិតដោយធម្មជាតិ មិនដូចអំបិលនាំចូលពីក្រៅមកគេផលិតដោយរ៉ែនោះទេ ប៉ុន្តែគ្រាន់តែចាញ់ពណ៌អំបិលនាំចូលបន្តិចប៉ុណ្ណោះ ទើបប្រជាពលរដ្ឋយើងងាកមកនិយមប្រើប្រាស់អំបិលនាំចូលវិញ ។ លោក បុ៊ន បារាំង បន្តថា ការដែលអំបិលក្នុងស្រុករបស់យើងផលិតបានហើយខ្វះទីផ្សារនាពេលកន្លងមកនេះហើយ ដែលធ្វើឲ្យអ្នកផលិតអំបិលមួយចំនួនបាក់ទឹកចិត្តក្នុងការផលិតអំបិលនាពេលនេះ ។ មិនត្រឹមតែចង់ឈប់ផលិតប៉ុណ្ណោះទេ កន្លងមកមានក្រុមកសិករផលិតអំបិលមួយចំនួនដែលមានដីកម្មសិទ្ធផ្ទាល់ខ្លួន បានចេញពីសហគមន៍ផលិតអំបិល ហើយបានលក់ស្រែអំបិលមួយចំនួនដែលធ្លាប់ផលិតអំបិលឲ្យទៅអ្នកផ្សេង ។ ប៉ុន្តែអ្នកដែលទិញនោះមិនដឹងថា គេយកទៅផលិតអំបិលឬយកដីស្រែអំបិលនេះទៅច្នៃធ្វើអ្វីផ្សេងនោះទេ បញ្ហានេះស្ថិតនៅលើមន្ទីរពាក់ព័ន្ធជាអ្នកតាមដានសកម្មភាពខាងលើនេះ ។
លោកអភិបាលខេត្ត មានប្រសាសន៍ថា រឿងស្រែអំបិលនេះសម្តេចតេជោលោកគិតគូរខ្លាំងណាស់ ។ រាល់ការទិញ-លក់ដីស្រែអំបិលរបស់ម្ចាស់ស្រែ លោកមិនហាមឃាត់ទេ ប៉ុន្តែបើយកស្រែអំបិលទៅចាក់ដីលុបហើយច្នៃជាសំណង់អ្វីផ្សេងទៀតនោះ លោកមិនហ៊ានអនុញ្ញាតទេ តែបើទិញយកមកផលិតអំបិលវិញលោកគាំទ្រ១០០% ។ចំពោះមតិបូកសរុបអង្គប្រជុំ ដែលសមាជិកបានលើកឡើងមួយចំនួនដូចជា ផលិតផលនាំចូលមកពីក្រៅចូលក្នុងទីផ្សាររបស់យើង ចំណុចនេះសមាជិកខ្លះមានសំណូមពរកុំឲ្យនាំចូលផលិតផលក្រៅស្រុក គឺយើងមិនអាចឃាត់ឃាំងគេបានទេ ពីព្រោះគេក៏ជាសមាជិកសមាគមអាស៊ានដូចជាយើងដែរ ។ ដូច្នេះគឺសិទ្ធិទីផ្សារសេរីទៅហើយ យើងមិនអាចឃាត់គេទេ មានតែយើងខិតខំផលិតប្រកួតប្រជែងទិន្នផល ទាំងបរិមាណនិងគុណភាពលើទីផ្សារពិភពលោក ដូចបណ្តាប្រទេសសមាគមអាស៊ានដទៃទៀតទើបល្អ ។
ជុំវិញការផលិតអំបិលរបស់សហគមន៍យើងវិញ ដោយមើលឃើញរដូវនេះទៅហើយ អ្នកផលិតអំបិលទាំងអស់ដូចជាពុំទាន់អ្នកណាមួយអើពើក្នុងការរៀបចំផលិតនោះ លោកអភិបាលខេត្ត ក៏បានសំណូមពរដល់លោកសហប្រធានសហគមន៍អ្នកផលិតអំបិល ឲ្យអញ្ជើញសមាជិកទាំងអស់ ធ្វើការប្រជុំ ហើយឲ្យគេចូលរួមមានយោបល់អំពីបញ្ហាអ្វីដែលគេមើលឃើញចំណុចខ្វះខាតនៅក្នុងសហគមន៍ តើគេថ្នាំងថ្នាក់រឿងអ្វី? ហើយគេចង់សំណូមពរអ្វីដល់សហគមន៍ឲ្យជួយដោះស្រាយវិញ ។ ក្រោយពីការការក្តាប់សំណូមពរពីសមាជិកហើយ យើងត្រូវធ្វើផែនការដោះស្រាយរួមគ្នា ដើម្បីរកច្រកចេញទើបយើងទទួលបានជោគជ័យ ។
លោកអភិបាលខេត្តក៏បានណែនាំងផងដែរដល់មន្ទីរជំនាញពាក់ព័ន្ធដូចជា មន្ទីរឧស្សាហកម្មនិងសិប្បកម្ម ត្រូវគិតគូរឡើងវិញចំពោះសហគមន៍ដែលត្រូវផលិតអំបិលនៅក្រោមការក្តោបក្តាប់និងគ្រប់គ្រងរបស់ខ្លួន កុំចាំតែទទួលផលបានប៉ុន្មានក៏បានទៅ ដីផលិតគេលក់ជិតអស់ហើយក៏មិនដឹងនោះ ៕
ចែករំលែកព័តមាននេះ