ខេត្តរតនៈគីរី ៖ ក្មេងស្រីម្នាក់រងការធ្វើបាបពីឪពុកម្តាយពេក នាងទ្រាំមិនបានក៏រត់ចោលផ្ទះទៅតាមស្ត្រីម្នាក់ ស្រាប់តែឪពុកម្ដាយនាងបានមកប្ដឹងសមត្ថកិច្ចឱ្យឃាត់ខ្លួន ដោយចោទថា ស្ត្រីម្នាក់ចាប់ពង្រាត់កូនក្រមុំរបស់គាត់ ហេតុការណ៍នេះកើតឡើងកាលពីម៉ោង៩ព្រឹក នៅថ្ងៃទី០១ ខែវិច្ឆិកា ឆ្នាំ២០១៨ ខណៈអ្នកទាំង២ខាងលើមកចាំជិះឡានឈ្នួលលើផ្លូវជាតិលេខ78A ជិតវត្តអូចេង ស្ថិតនៅភូមិតាអង ឃុំតាអង ស្រុកកូនមុំ។
បើតាមលោក ភោគ ណារិទ្ធ អធិការស្រុកកូនមុំបានឱ្យដឹងថា ក្មេងស្រីដែលឪពុកម្ដាយចោទគេនោះឈ្មោះថេង ស្រីលិន អាយុ១៧ឆ្នាំ មុខរបរដើរស៊ីឈ្នួលជៀជ័រកៅស៊ូ និងស្ត្រីដែលរងការចោទប្រកាន់ឈ្មោះ ញ៉ែម ឡា អាយុ៣១ឆ្នាំ មុខរបរដូចគ្នា អ្នកទាំង២នាក់មានផ្ទះជាប់គ្នាស្ថិតនៅភូមិការឡែង ឃុំការឡែង ស្រុកលំផាត់។
លោកបន្តទៀតថា ដោយមានសេចក្ដីរាយការណ៍ពីសមត្ថកិច្ចប៉ូលិសស្រុកលំផាត់ ឱ្យជួយអន្តរាគមន៍ដោយមានឪពុកម្ដាយក្មេងស្រីរាយការណ៍ថា មានស្ត្រីម្នាក់នៅភូមិជាមួយគ្នាចាប់ពង្រាត់កូនស្រីគាត់មកចាំជិះឡានឈ្នួលចំណុចខាងលើ ទើបសមត្ថកិច្ចប៉ូលិសស្រុកកូនមុំបានស្ទាក់ និងឃាត់ខ្លួនទាំង២នាក់មកសួរនាំនៅអធិកាស្រុក ។
ក្រោយពីសមត្ថកិច្ចឃាត់ខ្លួនបាន ក្មេងស្រីឈ្មោះថេង ស្រីលិន បានបំភ្លឺប្រាប់ថា សព្វថ្ងៃគ្រួសារនាងមានមុខរបរដើរស៊ីឈ្នួលជៀជ័រចល័ត ហើយពេលជិត២ឆ្នាំនេះនាងមានអារម្មណ៍ថា ចង់តែរត់ចោលឪពុកម្ដាយដោយមូលហេតុទី1 ពេលនាងមានជំងឺចង់គ្រុនចាញ់ម្ដងៗនាងធ្វើការមិនកើតឪពុកម្ដាយនាងបង្ខំដេញនាងឱ្យទៅជៀជ័រឱ្យថៅកែទាំងមេឃភ្លៀងរលឹម ពេលនាងប្រាប់ថាទៅមិនកើតទេនាងឈឺ ។ ពេលលឺនាងនិយាយថា ឈឺ ឪពុកនាងទាញដំបងដេញវាយនាង និងជេរប្រមាថនាងជាកូនគ្រប់បែបយ៉ាង មិនតែប៉ុណ្ណោះម្ដាយនាងថែមទាំងទាញដំបងដេញវាយនាងត្រូវ2ទៅ3ដំបងក៏មានដែ។
ក្មេងស្រីខាងលើប្រាប់បន្តថា អារឿងជេរប្រមាថ និងយកដំបងវាយនោះកើតឡើងញឹកញាប់ណាស់ ជួនកាលនាងទ្រាំមិនបានរត់គេចខ្លួននៅពេលយប់ទៅដេកផ្ទះអ្នកជិតខាង ក្នុងមួយខែៗ៥-៦ដង ទើបនៅថ្ងៃកើតហេតុនេះនាងសម្រេចចិត្តរត់តាមមីងម្នាក់ជាអ្នកភូមិជាមួយគ្នាទៅខេត្តសៀមរាបដើម្បីគេចពីឪពុកម្ដាយឱ្យនាងមានសេរីភាពដូចគេដូចឯង និងស្វែងរកការងារធ្វើ ស្រាប់តែឪពុកម្ដាយដឹងប្ដឹងឱ្យប៉ូលិសឃាត់ខ្លួនតែម្ដង ដោយចោទប្រកាន់ថា គេចាប់ពង្រាត់ ។
ដោយឡែកស្ត្រីឈ្មោះ ញ៉ែមឡា រងការចោទបានបំភ្លឺប្រាប់ថា គាត់មានផ្ទះជាប់គ្នាជាមួយក្មេងស្រីខាងលើក្នុងមួយថ្ងៃៗឃើញក្មេងស្រីរូបនោះទឹកភ្នែកស្ទើររាល់ថ្ងៃ ដោយសារតែម្ដាយឪពុកនាងជេរប្រមាថ និងវាយដំជាញឹកញាប់ ហើយគាត់មហាសែនអាណិតខ្លាំងណាស់ ស្រាប់តែថ្ងៃកើតហេតុគាត់ទៅលេងម្ដាយនៅខេត្តសៀមរាប ក្មេងស្រីរូបនេះរត់តាមគាត់សុំទៅជាមួយដើម្បីរកកាងារធ្វើ ទោះហាមនាងយ៉ាងណាក៏មិនព្រមស្ដាប់ដែរ ទើបមានរឿងចោទប្រកាន់នេះកើតឡើងតែម្តង។
សមត្ថកិច្ចបានប្រាប់ឱ្យដឹងថា ក្រោយពីសួរនាំភាគគីទាំងសងខាង ទើបសមត្ថកិច្ចដឹងរឿងពិតគឺគ្មានរឿងចាប់ពង្រាត់ទេ រឿងកើតឡើងនេះមកពីម្ដាយឪពុកនាងវាយធ្វើបាបកូនស្រីញឹកញាប់ពេក ក្រោយពីសួរនាំហើយ សមត្ថកិច្ចសុំយោបល់ទៅតំណាងអយ្យការសាលាដំបូងខេត្ត ទើបតំណាងអយ្យការសម្រេចដោះលែងស្ត្រីរងការចោទឱ្យមានសេរីភាពវិញ ។
ដោយឡែកក្មេងស្រីខាងលើសមត្ថកិច្ចតេទូរស័ព្ទហៅឪពុកម្ដាយនាងមកទទួលកូនស្រីឱ្យត្រឡប់ទៅផ្ទះវិញ ប៉ុន្តែពេលមកជួបមុខកូន នាងប្រកែកមិនព្រមទៅតាមទេសុខចិត្តរស់នៅជាមួយប៉ូលិសល្អជាង ហើយសមត្ថកិច្ចលួងលោមនាងអស់ជាច្រើនម៉ោង និងធ្វើកិច្ចសន្យាលាយលក្ខណ៍ជាអក្សរជាមួយម្ដាយឪពុកនាងឱ្យថ្ងៃក្រោយឈប់វាយធ្វើបាបនាងតទៅទៀត ទើបនាងយល់ព្រមទៅជាមួយគ្រួសារនាងវិញ។ ហើយនាងក៏បញ្ជាក់ប្រាប់ថា កើតមកជាតិនេះមិនដឹងជាមានបាបកម្មអ្វីទេ បានជាម្ដាយឪពុកនាងវាយធ្វើបាបមិនឈប់ឈរបែបនេះ។
ចែករំលែកព័តមាននេះ