រាជធានីភ្នំពេញ ៖ បុរសម្នាក់ពេលដើររើសអេតចាយឃើញដែកទ្វារបងផ្ទះរបស់គេទុកប្រហែស ឆ្លៀតឱកាសលួច តែត្រូវម្ចាស់គេទាន់ ចាប់ប្រគល់អោយសមត្ថកិច្ចប៉ុស្តិ៍នគរបាលទួលស្វាយព្រៃដើម្បីធ្វើការសាកសួរតែម្តង ។
ហេតុការណ៍នេះបានកើតឡើងកាលពីវេលាម៉ោង២និង៤៥នាទីរំលងអាធ្រាត្រឈានចូលថ្ងៃទី ២ ខែវិច្ឆកា ឆ្នាំ២០១៨ ទល់មុខកន្លែងផលិតការ៉ែម ផ្លូវ៣៥៥ សង្កាត់ទួលស្វាយព្រៃ២ ខណ្ឌចំការមន ហើយឃាត់ខ្លួនបាននៅផ្លូវ៤០២ កែងនិងផ្លូវ១៩៩ សង្កាត់ទំនប់ទឹក ខណ្ឌចំការមន ។
ជនសង្ស័យដែលត្រូវសមត្ថកិច្ចឃាត់ខ្លួនឈ្មោះ សន សាវុធ អាយុ២៥ឆ្នាំ ជាអ្នកដើររើសអេតចាយ ស្នាក់នៅសង្កាត់ក្រាំងធ្នង់ ខណ្ឌសែនសុខ ។ សមត្ថកិច្ចបានដកហូតវត្ថុតាងមានម៉ូតូសណ្តោងរ៉ឺម៉កមួយគ្រឿង និងទ្វារ
របងផ្ទះចំនួន៤ផ្ទាំង ។ ចំណែកម្ចាស់ផ្ទះសុំមិនបញ្ចេញឈ្មោះ ។
បើតាមសម្តីបុគ្គលិកនៅកន្លែងកើតហេតុ បានអោយដឹងថា មុនពេលកើតហេតុ ពួកគាត់បានរៀបទ្វាររបងផ្ទះទុកគរលើគ្នា ដើម្បីអោយជាងជួសជុលផ្សារនៅថ្ងៃស្អែក លុះដល់ម៉ោងកើតហេតុ ពួកគាត់កំពុងតែសំរាន្តយ៉ាងលង់លក់ ក៏ស្រាប់តែឮសំលេងក្តុងក្តាំង ពេលនោះពួកគាត់បានបើកទ្វារផ្ទះចេញមកមើល ក៏ស្រាប់តែឃើញជនសង្ស័យខាងលើបានជិះម៉ូតូសណ្តោងរ៉ឺម៉កដឹកទ្វាររបងផ្ទះចេញទៅយ៉ាងលឿន ។
ពេលនោះពួកក៏បាននាំគ្នាស្រែកឆោឡោដេញតាមជនសង្ស័យរហូតដល់ផ្លូវ១៩៩កែងនឹងផ្លូវ៤០២ ស្របពេលនោះក៏ជួបកម្លាំងសមត្ថកិច្ចប៉ុស្តិ៍នគរបាលទំនប់ទឹកដែលកំពុងតែល្បាតឆ្លងកាត់ទីនោះ ក៏បានជួយឃាត់ខ្លួនជនសង្ស័យខាងលើ ប្រគល់អោយសមត្ថកិច្ចប៉ុស្តិ៍នគរបាលទួលស្វាយព្រៃ២ យកទៅសាកសួរតែម្តង ។
នៅចំពោះមុខសមត្ថកិច្ច ជនសង្ស័យខាងលើបានសារភាពថា ខ្លួនពិតជាបានលួចទ្វាររបងរបស់គេពិតប្រាកដមែន ។
ក្រោយពេលកើតហេតុ បន្ទាប់ពីសាករួចហើយ ជនរងគ្រោះដែលជាម្ចាស់ទ្វាររបងផ្ទះបានដាក់ពាក្យបណ្តឹងអោយសមត្ថកិច្ចចាត់ការតាមផ្លូវច្បាប់ ចំណែកជនសង្ស័យព្រមទាំងវត្ថុតាងត្រូវបានសមត្ថកិច្ចកសាងសំណុំរឿងបញ្ជួនខ្លួនទៅអធិការដ្ឋានខណ្ឌចំការមនដើម្បីចាត់ការបន្តតាមនិតិវិធី ៕
ចែករំលែកព័តមាននេះ