រាជធានីភ្នំពេញ ៖ សេចក្តីរាយការណ៍បឋមឲ្យដឹងថា កាលពីវេលាម៉ោង៧ និង២០នាទីយប់ ថ្ងៃទី៣០ តុលា កម្លាំងសមត្ថកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ បានធ្វើការស្រាវជ្រាវ និង ឈានដល់ឃាត់ខ្លួនមុខសញ្ញាលួចរថយន្តម្នាក់ជាបទល្មើសជាក់ស្តែងនៅចំណុចមុខសណ្ឋាគារឡឺរ៉ូយ៉ាល់ ស្ថិតក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។ ជនសង្ស័យឈ្មោះ សំអាត សម្បត្តិ ហៅភ័ស្ត ភេទប្រុស អាយុ១៦ឆ្នាំ មុខរបរ រត់ម៉ូតូកង់បី ទីលំនៅមិនពិតប្រាកដ។
វត្ថុតាងចាប់យករថយន្តមួយគ្រឿងម៉ាក TOYOTA HIGH LANDER ពណ៌ខ្មៅ បិទស្កុតស ផលិតឆ្នាំ២០០២ ពាក់ស្លាកលេខ ភ្នំពេញ ២M-៥៧៥៩។ សេចក្តីរាយការណ៍បន្តថា កាលពីវេលាម៉ោង៥ទៀបភ្លឺ ថ្ងៃទី២៧ តុលា ២០១៨ មានករណីចោរលួចយករថយន្ត ដូចមានភិនភាគខាងលើ នៅចំណុចផ្លូវលំ ភូមិបាក់ទូក សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ យកទៅបាត់។ រថយន្តដែលចោរលួចទៅនោះជាកម្មសិទ្ធរបស់ជនរងគ្រោះឈ្មោះ ម៉ោល សុគា ភេទប្រុស អាយុ៣៦ ឆ្នាំ មុខរបរ រត់តាក់ស៊ី ស្នាក់នៅផ្ទះជួល ផ្លូវលំ ភូមិបាក់ទូក សង្កាត់ទួលសង្កែទី១ ខណ្ឌឫស្សីកែវ។
ក្រោយពីកើតមានអំពើលួចនោះមក ជនរងគ្រោះបានទៅដាក់ពាក្យបណ្តឹងនៅសមត្ថកិច្ចទើបបានការិយាល័យ នគរបាលព្រហ្មទណ្ឌកម្រិតស្រាលស្រាវជ្រាវ និងចាប់ខ្លួនមុខសញ្ញាលួចខាងលើម្នាក់នេះ។ លោកវរៈសេនីយ៍ឯក ប៊ុន សត្យា នាយការិយាល័យនគរបាលព្រហ្មទណ្ឌកម្រិតស្រាលបានឲ្យដឹងថា បន្ទាប់ឃាត់ខ្លួនជនសង្ស័យបាន និងកំពុងកសាងសំណុំទៅកាន់សាលាដំបូងរាជធានីភ្នំពេញតាមនីតិវិធី ចំណែករថយន្តបានប្រគល់ឲ្យទៅម្ចាស់វិញ ៕
https://youtu.be/NAZtvwsXrNY
ចែករំលែកព័តមាននេះ