ប្រទេសអ៊ីរ៉ង ៖ ប្រធានាធិបតីអ៊ីរ៉ង់លោកហាសាន់រ៉ូហានី អះអាងកាលពីថ្ងៃទី៣១ តុលាថា ក្រុងតេហេរ៉ង់ ពុំខ្លាចទណ្ឌកម្មរបស់អាមេរិកប្រឆាំងផ្នែកប្រេងកាតអ៊ីរ៉ង់ ដែលចូលជាធរមានចាប់ពីថ្ងៃទី៤ វិច្ឆិកា ទៅឡើយ។
ប្រធានាធិបតីអ៊ីរ៉ង់លើកឡើងថា ថ្ងៃទី៤វិច្ឆិកាឆ្នាំនេះ នឹងកំណត់ពីអំពើអយុត្តិធម៌ថ្មីរបស់សហរដ្ឋអាមេរិក។ទោះ បីយ៉ាងនោះក្ដីប្រជាជនត្រូវមានការជឿជាក់ ដែលរដ្ឋាភិបាលពុំខ្លាចការគំរាមកំហែងរបស់អាមេរិកឡើយ។ លោកទទួលស្គាល់ថានាប៉ុន្មានខែខាងមុខនេះ នឹងជួបការលំបាកនានា តែលោកអះអាងថាអាជ្ញាធរនឹងធ្វើអ្វីគ្រប់យ៉ាងតាមដែលអាចទៅរួច ដើម្បីកាត់បន្ថយបណ្ដាបញ្ហា។
ការដាក់ទណ្ឌកម្មឡើងវិញសម្រេចដោយលោកដូណាល់ត្រាំ ក្រោយការដកខ្លួនរបស់អាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ចុះហត្ថលេខាកាលពីឆ្នាំ២០១៥ នាំឲ្យប្រាក់រៀលអ៊ីរ៉ង់ធ្លាក់ថ្លៃ និងនាំឲ្យមានការខ្វះប្រាក់ដុល្លារ។ក្រុងវ៉ាស៊ិនតោនមានបំណងដាក់ការហ៊ុមព័ទ្ធប្រេងកាតអ៊ីរ៉ង់ទាំងស្រុង ខណៈប្រេងជាប្រភពចំណូលដ៏សំខាន់របស់ប្រទេសនោះ។
រដ្ឋមន្ត្រីប្រេងកាតអ៊ីរ៉ង់លោកBIJAN ZANGNEHថ្លែងនាថ្ងៃទី៣១តុលាថា ប្រេងកាតប្រមាណជា២៨០.០០០ធុងត្រូវបានលក់ឲ្យផ្សារភាគហ៊ុនថាមពល ហើយគ្រោងស្នើលក់ប្រេង៧២០.០០០ធុងបន្ថែមទៀត។ អ៊ីរ៉ង់កាលពិថ្ងៃទី២៨តុលា ក៏ចាប់ផ្ដើមលក់ប្រេងឲ្យដល់បណ្ដាក្រុមហ៊ុនឯកជនដែលទទួលបន្ទុ្ទកនាំចេញ ប៉ុនប៉ងវាងទណ្ឌកម្មរបស់អាមេរិក៕
ចែករំលែកព័តមាននេះ