បើគិតមកដល់ពេលនេះ ប្រជាកសិករទូទាំងប្រទេសទើបតែធ្វើស្រែវស្សាបានប្រមាណ៥៧%ប៉ុណ្ណោះ បើប្រៀបធៀបទៅនឹងផ្ទៃដីសរុបសំរាប់ធ្វើស្រែវស្សាតាមផែនការឆ្នាំចំនួន២.២៧៩.១៨០ហិកតា ។ យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានចេញផ្សាយកាលពីថ្ងៃទី៤ ខែសីហា ឆ្នាំ២០១០ អោយដឹងថា ផ្ទៃដីដែលប្រជាកសិករនៅទូទាំងប្រទេសធ្វើស្រែវស្សាទើបតែបានប្រមាណ១.៣០០.០០ហិកតា នៃផែនការឆ្នាំ ហើយថយចុះប្រមាណជាង១២% បើប្រៀបធៀបទៅនឹងរយៈពេលដូចគ្នាកាលពីឆ្នាំ២០០៩ ដែលកាលនោះធ្វើបានរហូតដល់១.៥៩០.០០០ហិកតាឯណោះ ។
របាយការណ៍បានបង្ហាញទៀតថា ខេត្តដែលប្រជាកសិករធ្វើស្រូវវស្សា បានច្រើនជាងគេគឺ ខេត្តបន្ទាយមានជ័យ ដោយកសិករអនុវត្តបានផ្ទៃដី២៣៣.០០០ហិកតា និងខេត្តបាត់ដំបង អនុវត្តបានផ្ទៃដីប្រមាណ២១០.៧៩០ហិកតា ចំណែកខេត្តដែលបានអនុវត្តផ្ទៃដីធ្វើស្រែវស្សាតិចជាងគេ គឺខេត្តក្រចេះ ធ្វើបានតែ៤.៩០០ហិកតាប៉ុណ្ណោះ ។ លោកច័ន្ទ តុងអ៊ីវ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានថ្លែងប្រាប់កោះសន្តិភាព កាលពីថ្ងៃចន្ទ ថា មូលហេតុដែលនាំអោយប្រជាកសិករធ្វើស្រែយឺតយ៉ាវបែបនេះ គឺបណ្តាលមកពីភ្លៀងធ្លាក់មិនគ្រប់គ្រាន់កាលពីដើមរដូវ ។ ទោះបីជាមានភ្លៀងធ្លាក់មិនគ្រប់គ្រាន់កាលពីដើមរដូវ និងមានភ្លៀងធ្លាក់ដោយកន្លែងក៏ដោយ ក៏មិនមានបញ្ហាអ្វីគួរអោយបារម្ភឡើយ ព្រោះកសិករអាចបន្តអនុវត្តរហូតដល់ខែកញ្ញាឯណោះ ។
លោកអ៊ុំ រីណា អនុប្រធាននាយកដ្ឋានឧតុនិយម នៃក្រសួងធនធានទឹក និងឧតុនិយម បានមានប្រសាសន៍ថា កំរិតកំពស់ទឹកភ្លៀងនៅដើមរដូវវស្សាក្នុងខែឧសភា ឆ្នាំ២០១០នេះមានកំពស់ទាបជាងកាលពីឆ្នាំ២០០៩ បើប្រៀបធៀបក្នុងរយៈពេលដូចគ្នា ។ ប៉ុន្តែចាប់ពីខែមិថុនា រហូតដល់ខែតុលា ឆ្នាំ២០១០នេះ គឺកំរិតទឹកភ្លៀងមានកំពស់ប្រហាក់ប្រហែលកាលពីឆ្នាំ២០០៩ដែរ បើគិតក្នុងរយៈពេលដូចគ្នា ។ ដោយឡែកក្នុងឆ្នាំនេះ ភ្លៀងធ្លាក់មានលក្ខណៈរប៉ាត់រប៉ាយ ពោលគឺធ្លាក់ដោយកន្លែង ហើយខេត្តដែលទទួលទឹកភ្លៀងច្រើនជាងគេក្នុងរយៈពេលនេះ គឺខេត្តកោះកុង និងខេត្តព្រះសីហនុ ចំណែកខេត្តដែលទទួលទឹកភ្លៀងតិចជាងគេវិញ គឺខេត្តស្ទឹងត្រែង ។ លោកបានបន្ថែមថា លោកមានការព្រួយបារម្ភដែរ ដោយនៅក្នុងអំឡុងខែសីហានេះ អាចនឹងមានភ្លៀងធ្លាក់ច្រើនដែលអាចបង្កអោយមានគ្រោះទឹកជំនន់ ដែលបណ្តាលមកពីមានខ្យល់ព្យុះនៅសមុទ្រចិនខាងត្បូង ។
លោកបញ្ជាក់ថា ប្រសិនបើមានបញ្ហាអ្វីដែលចាំបាច់នោះ ក្រសួងនឹងធ្វើការប្រកាសដើម្បីអោយប្រជាពលរដ្ឋបានដឹង ងាយស្រួលក្នុងការប្រុងប្រយ័ត្នជាមុន ។ លោកដុក សុផាត ជាកសិករមួយរូបនៅភូមិពានមាសខាងកើត ឃុំលំពង់ ស្រុកបាទី ខេត្តតាកែវ បានថ្លែងប្រាប់កោះសន្តិភាពថា ការធ្វើស្រូវវស្សារបស់លោកអនុវត្តបានប្រមាណជាង៨០% ហើយមកទល់នឹងពេលនេះ គឺមិនមានភាពយឺតយ៉ាវអ្វីឡើយ បើប្រៀបធៀបទៅនឹងឆ្នាំមុនៗ ដោយមានទឹកភ្លៀងគ្រប់គ្រាន់សំរាប់បង្កបង្កើនផល ។ លោកបន្តទៀតថា លោកសង្កេតឃើញប្រជាកសិករនៅក្នុងភូមិទាំងអស់អនុវត្តបានប្រមាណជិត៩០%ហើយ ។ លោកសង្ឃឹមថា ក្នុងឆ្នាំនេះ ប្រជាកសិករក្នុងភូមិរបស់លោកនឹងអាចប្រមូលផលស្រូវបានច្រើនមិនខានឡើយ ៕
ចែករំលែកព័តមាននេះ