រាជធានីភ្នំពេញ ៖ ទីបំផុតសាលាដំបូងរាជធានីភ្នំពេញ នាសៀលថ្ងៃទី៣១ តុលា នេះ បានប្រកាសសាលក្រមផ្តន្ទាទោសស្ត្រីជនជាតិចិនម្នាក់ ជាប់ចោទបើករថយន្តបំបុក ក្រុមជនសង្ស័យជាចោរឆក់ទូរស័ព្ទបណ្តាលឱ្យម្នាក់ស្លាប់ និងម្នាក់រងរបួសធ្ងន់ សម្រេចផ្ដន្ទាទោសកំណត់២ឆ្នាំ តែតម្រូវឲ្យអនុវត្តក្នុងពន្ធនាគារ៣ខែ ទោសនៅសល់ប៉ុន្មានត្រូវព្យួរ និង ពិន័យជាប្រាក់ចំនួន៤លានរៀល ក្រោមការចោទប្រកាន់ពីបទហិង្សាដោយចេតនា មានស្ថានទម្ងន់ទោស ដោយមរណៈភាព នៃជនរងគ្រោះ និងបទបើកបរដោយគ្មានប័ណ្ណបើកបរ។ សាលក្រមសម្រេចបង្គាប់ឲ្យជនជាប់ចោទសងទៅគ្រួសារសពចំនួន១ម៉ឺនដុល្លារអាមេរិក និង ជំងឺចិត្តចំនួន៣០លានរៀល។ តម្រូវឲ្យសងទៅអ្នករបួសចំនួន ១៤.០០០ដុល្លារអាមេរិក និង ជំងឺចិត្តចំនួន៣០លានរៀល។
សាលក្រមប្រកាសធ្វើឡើងចំពោះមុខជនជាប់ចោទឈ្មោះ ថាង យៀន អាយុ២៦ឆ្នាំ សាលក្រមបើកផ្លូវឲ្យប្តឹងឧទ្ធរណ៍តាមកំណត់ច្បាប់ បើសិនភាគីណាមួយកើតទុក្ខមិនសុខចិត្ត ចំពោះការកាត់ក្តីនេះ។ អង្គហេតុក្នុងសំណុំរឿងនេះ កាលពីវេលាម៉ោងប្រហែល១១យប់ ថ្ងៃទី១២ សីហា ២០១៨ ស្ត្រីជាប់ចោទ និងមិត្តភក្តិម្នាក់បានអង្គុយក្នុងរថយន្តម៉ាកឡិចស៊ីស RX-៣០០ រង់ចាំគ្នា ហើយបានបើកបង្អួចរថយន្តចំហរ ពេលនោះស្រាប់តែមានចោរ២នាក់ បានជិះម៉ូតូ១គ្រឿងបានធ្វើសកម្មភាពឆក់យកទូរស័ព្ទដៃ ដោយបានជិះម៉ូតូបម្រុងគេចខ្លួន។ ឃើញដូច្នោះជនជាប់ចោទ (ស្ត្រីចិន) បានបើករថយន្តដេញតាម ក្នុងគោលបំណងតាមយកទូរស័ព្ទមកវិញ តែពេលនោះក្រុមចោរបានជិះម៉ូតូដល់ផ្លូវទាល់ ទើបជនជាប់ចោទសម្រេចចិត្តបើករថយន្តបំបុកពីចំហៀង បណ្ដាលឲ្យម៉ូតូដួល ហើយជនជាប់ចោទក៏ចុះទៅរើសយកទូរស័ព្ទវិញតែទូរស័ព្ទបែកខ្ទេចខ្ទីអស់។
ពេលសវនាការមេធាវីតំណាងឲ្យជនសង្ស័យជាចោរឆក់ ដែលស្លាប់បានទាមទារសំណងចំនួន ៣ម៉ឺនដុល្លារអាមេរិក។ ចំណែកមេធាវីការពារឲ្យជនសង្ស័យដែលរងរបួសបានទាមទារសំណងលើ ទឹកប្រាក់ចំនួន ៥ម៉ឺនដុល្លារអាមេរិកផងដែរ។ សំណុំរឿងនេះត្រូវបាន តំណាងអយ្យការសាលាដំបូង សម្រេចឃុំខ្លួនជនសង្ស័យឈ្មោះ ថាង យៀន ដាក់ពន្ធនាគារជាបណ្ដោះអាសន្ន កាលពីថ្ងៃទី១៦ សីហា ក្រោមការចោទប្រកាន់ពីបទ បើកបរគ្មានប័ណ្ណបើកបរ និងបទហិង្សាដោយចេតនាមានស្ថានទម្ងន់ទោស ដោយមរណៈភាព នៃជនរងគ្រោះមាត្រា២២៤ នៃក្រមព្រហ្មទ និងបទបើកបរដោយមានមានប័ណ្ណបើកបរ ច្បាប់ស្តីពីចរាចរផ្លូវគោក។ ជនត្រូវចោទត្រូវបាននគរបាលខណ្ឌចម្ការឃាត់ខ្លួន និងបញ្ជូនទៅកាន់សាលាដំបូងរាជធានីភ្នំពេញ កាលពីល្ងាចថ្ងៃទី១៥ សីហា ២០១៨។
ក្រោយកើតមានហេតុការណ៍នេះ អគ្គស្នងការដ្ឋាននគរបាលជាតិ ចេញផ្សាយនៅព្រឹកថ្ងៃទី១៥ ខែសីហា នេះបានបញ្ជាក់ថានៅថ្ងៃអាទិត្យ ទី១២ ខែសីហា ឆ្នាំ២០១៨ វេលាម៉ោង១២ និង១០នាទីរំលងអាធ្រាត្រ មានករណីមនុស្សឃាតដោយអចេតនា (បើករថយន្តដេញបុកជនសង្ស័យឆក់ទូរស័ព្ទដៃស្លាប់-របួស) នៅចំណុចផ្លូវលេខ១២៣ កែងផ្លូវលេខ៤៥៦ មុខផ្ទះលេខ៥៤ ក្រុម២២ ភូមិ៤ សង្កាត់ទួលទំពូង១ ខណ្ឌចំការមន រាជធានីភ្នំពេញ អ្នករងរបួសធ្ងន់ ប្រុសម្នាក់ និងស្លាប់ប្រុសម្នាក់ ជាជនសង្ស័យឆក់ទូរស័ព្ទដៃ។ ជនសង្ស័យជាចោរឆក់ម្នាក់ឈ្មោះ សារុន ពិសិដ្ឋ ភេទប្រុស អាយុ២៨ឆ្នាំ មុខរបរនៅផ្ទះ ស្នាក់នៅផ្ទះលេខ២៥០ ផ្លូវលេខ៤៦០ ក្រុម២២ ភូមិ៤ សង្កាត់ទួលទំពូង១ ខណ្ឌចំការមន រងរបួសធ្ងន់កំពុងព្យាបាលនៅមន្ទីរពេទ្យមិត្តភាពខ្មែរ-សូវៀត និងម្នាក់ឈ្មោះ បេ សុភាដេវីត ភេទប្រុស អាយុ២៤ឆ្នាំ មុខរបរនៅផ្ទះ ស្នាក់នៅផ្ទះលេខ៣២A ផ្លូវលេខ២៨០ ក្រុម៤៣ ភូមិ៥ សង្កាត់បឹងកេងកង២ ខណ្ឌចំការមនស្លាប់ នៅមន្ទីរពេទ្យមិត្តភាពខ្មែរ សូវៀត។
ស្ត្រីចិនដែកត្រូវឃាត់ខ្លួនបញ្ជូនឡើងតុលាការ ឈ្មោះ YUAN TANG ថាង យៀន ភេទស្រី អាយុ២៦ឆ្នាំ ជនជាតិចិន មុខរបរលក់ដូរ ស្នាក់នៅផ្ទះជួលគ្មានលេខ ផ្លូវលំ សង្កាត់ទឹកថ្លា ខណ្ឌសែនសុខ មិនចាំលេខលិខិតឆ្លងដែន មិនបានយកមកតាមខ្លួន ជាអ្នកបើករថយន្ត។ វត្ថុតាងដកហូត ម៉ូតូ០១គ្រឿងម៉ាកSCOOPY ពណ៌ស ស្លាកលេខ ភ្នំពេញ 1CL-7241 (របស់អ្នកឆក់ទូរស័ព្ទដៃខូចខាតយ៉ាងដំណំ) រថយន្តម៉ាក LEXUS RX-300 ពណ៌ស ស្លាកលេខ 2AN-9745 ភ្នំពេញ (ខូចខាតដូចគ្នា) និងទូរស័ព្ទដៃ០១គ្រឿង ម៉ាក Meitu ពណ៌ខ្មៅ-បៃតង លេខស៊ីម 096 696 7899 (បែកអេក្រង់ របស់ជនសង្ស័យ បើកឡានបុក)។
តាយរបាយការណ៍របស់សមត្តកិច្ចនគរបាលខណ្ឌចំការមនបានឲ្យដឹងថា មុនកើតហេតុជនសង្ស័យឈ្មោះ សារុន ពិសិដ្ឋ និងឈ្មោះ បេ សុភាដេវីត បានជិះម៉ូតូ ១គ្រឿងខាងលើ ឌុបគ្នា មកដល់ចំណុចមុខផ្ទះខាងលើ ឃើញស្ត្រីជាតិចិន២នាក់ ឈប់រថយន្តទូរស័ព្ទ ចំហរកញ្ចក់ ខាងមុខផ្នែកខាងឆ្វេង ហើយឈ្មោះ សារុន ពិសិដ្ឋ និងឈ្មោះ បេ សុភាដេវីត ក៏ធ្វើសកម្មភាពឆក់ យកទូរស័ព្ទដៃ ជនជាតិចិនឈ្មោះ Yuan Tang បានសម្រេច រួចបើកម៉ូតូគេចខ្លួន។ ភ្លាមនោះស្ត្រីជាតិចិនឈ្មោះ Yuan Tang ដែលជា ម្ចាស់ ទូរស័ព្ទ បានបើករថយន្តដេញតាមបុកម៉ូតូ ពីក្រោយបណ្តាលឲ្យដួលខ្ទាតទៅក្បែរជញ្ជាំងរបងផ្ទះលេខ៣៩ ផ្លូវលេខ ១២៣ កែងផ្លូវលេខ៤៥៦ បណ្តាលឲ្យរងរបួសធ្ងន់ធ្ងរ៕
ចែករំលែកព័តមាននេះ